To The Word – Day 107

₁Bheka, isandla sikaJehova asifinyeziwe

ukuba singasindisi,

nendlebe yakhe ayinzima

ukuba ingezwa.

₂Kepha ububi benu

bunahlukanisile noNkulunkulu,

nezono zenu zibusithile ubuso bakhe kini

ukuba angezwa.

₃Ngokuba izandla zenu zingcolile igazi,

neminwe yenu ububi;

izindebe zenu zomlomo zikhuluma amanga,

nezilimi zenu zinyenyeza okubi.

₄Akakho omemeza ngokulunga,

akakho owahlulela ngeqiniso;

bethemba kokuyize, bakhuluma amanga;

bakhulelwe yingozi, bazala ububi.

₅Bachamisela amaqanda ebululu,

baluka ubulembu bolwembu;

odlayo amaqanda abo uyafa,

okuchotshozwayo kuqhamuka kuyibululu.

₆Ubulembu babo abuyikuba yizingubo,

futhi abanakuzimboza ngemisebenzi yabo;

isenzo sendluzula sisezandleni zabo.

₇Izinyawo zabo zigijimela ebubini,

bashesha ukuchitha igazi elingenacala;

imicabango yabo iyimicabango yobubi;

incithakalo nokubhujiswa kusezindleleni zabo.

₈Indlela yokuthula abayazi,

nokwahlulela akukho emikhondweni yabo;

bazenzele izindlela eziyisigwegwe,

bonke abahamba ngazo abazi ukuthula.

₉Ngalokho ukwahlulela kukude nathi,

nokulunga akusifumani;

sihlalela ukukhanya,

kepha bheka, ubumnyama;

silindela imini,

kepha sihamba ekuhlweni.

₁₀Siphuthaza udonga njengempumputhe,

yebo, siphumputha njengabangenamehlo;

sikhubeka emini njengasekuhweleleni;

phakathi kwabaphilayo sinjengabafileyo.

₁₁Siyagwavuma sonke njengamabhere,*

siyalilisela nokulilisela njengamajuba;

silindela ukwahlulela, kepha akukho,

nokusindiswa, kepha kukude nathi.

₁₂Ngokuba iziphambeko zethu

zandile phambi kwakho,

nezono zethu ziyafakaza ngathi;

ngokuba iziphambeko zethu zikithi,

nokona kwethu siyakwazi:

₁₃ukuphambuka nokumphika uJehova,

nokumhlubuka uNkulunkulu wethu,

nokukhuluma ukucindezela nokwambuka,

nokucabanga nokukhuluma amazwi amanga

aphuma enhliziyweni.

₁₄Ukwahlulela kubuyiselwa emuva,

nokulunga kumi kude,

ngokuba iqiniso liyakhubeka esigcawini,

nobuqotho abunakungena.

₁₅Iqiniso lisilele;

osuka ebubini uzenza impango;

uJehova wakubona lokho,

kwaba kubi emehlweni akhe

ukuthi ukwahlulela akukho.

₁₆Wabona ukuthi akukho muntu,

wamangala ukuthi wayengekho omelayo;

yayisimsindisa ingalo yakhe,

nokulunga kwakhe kwamphasa.

₁₇Wafaka ukulunga njengebhantshi lensimbi,

nesigqoko sensindiso ekhanda lakhe;

wagqoka izingubo zokuphindisela zaba ngezokwembatha,

wazembesa ukushisekela njengengubo.

₁₈Njengokwenza kwabo,

kanjalo uyakubaphindisela:

ukufutheka kuzo izitha zakhe,

nokwenza kwabo kwabamelene naye,

abuyisele eziqhingini izenzo zazo.

₁₉Bayakulesaba igama likaJehova entshonalanga,

nenkazimulo yakhe empumalanga,

ngokuba uyakufika njengomfula okhahlamezayo,

oqhutshwa ngumoya kaJehova.

₂₀“Kepha uyakufika eSiyoni engumhlengi,

nakulabo abakwaJakobe ababuya eziphambekweni,”

usho uJehova.

₁“Vuka ukhanye,

ngokuba ukukhanya kwakho kuyeza;

inkazimulo kaJehova iphumela phezu kwakho.

₂Ngokuba bheka,

ubumnyama buyasibekela umhlaba,

nesigayegaye abantu;

kepha uJehova uyaphuma phezu kwakho,

nenkazimulo yakhe iyakubonakala phezu kwakho.

₃Izizwe ziyakuhamba ekukhanyeni kwakho,

namakhosi ekukhazimuleni kokuphuma kwakho.

₄“Phakamisa amehlo akho nxazonke, ubone;

babuthana bonke, beza kuwe;

amadodana akho ayakuvela kude,

namadodakazi akho ayakuphathwa ngezingalo.

₅Khona uyakubona, ukhazimule;

inhliziyo yakho iyakugquma, yanuleke,

ngokuba ingcebo yolwandle iyakuphendulelwa kuwe,

nemfuyo yezizwe iyakuza kuwe.

₆Ubuningi bamakamela buyakukusibekela,

amakamela amasha akwaMidiyani nase-Efa;

bonke abaseSheba bayakuza,

balethe igolide nenhlaka,

bamemezele izindumiso zikaJehova.

₇Yonke imihlambi yaseKedari iyakubuthelwa kuwe,

nezinqama zakwaNebayoti ziyakukukhonza,

zikhuphukele e-altare lami ngokuthanda kwami,

ngiyidumise indlu yodumo lwami.

₈“Ngobani laba abandiza njengefu,

nanjengamajuba aya ezidlekeni zawo, na?

₉Iziqhingi ziyangihlalela,

imikhumbi yaseTharishishi kuqala,

ukuletha amadodana akho evela kude,

enesiliva negolide lawo

kulo igama likaJehova uNkulunkulu wakho

nakoNgcwele ka-Israyeli,

ngokuba uyakudumisa.

₁₀“Abezizwe bayakuzakha izingange zakho,

amakhosi abo akukhonze;

noma ngakushaya ngentukuthelo yami,

sengiyakuhawukela ngomusa wami.

₁₁Amasango akho ayakuvuleka njalo,

awayikuvalwa imini nobusuku,

ukuze imfuyo yezizwe ilethwe kuwe,

amakhosi azo eqhutshwa eboshiwe.

₁₂Ngokuba isizwe nombuso ongakukhonzi uyakuphela;

yebo, lezo zizwe ziyakuqedwa impela.

₁₃“Inkazimulo yaseLebanoni iyakuza kuwe,

umsayipuresi,* nomthidari,* nomkhoba kanyekanye,

ukuyihlobisa indawo yendlu yami engcwele,

ngiyikhazimulise indawo yezinyawo zami.

₁₄Amadodana abakucindezelayo ayakufika kuwe efolile,

nabo bonke abakudelelayo bayakukhothama

ngasematheni ezinyawo zakho,

bakubize ngokuthi uMuzi kaJehova

neSiyoni loNgcwele ka-Israyeli.

₁₅“Esikhundleni sokuba ushiywe, uzondwe,

kungabe kusabakho muntu odabulayo,

ngiyakwenza isivunulo esiphakade

nentokozo yezizukulwane ngezizukulwane.

₁₆Uyakuncela ubisi lwezizwe,

uncele namabele amakhosi;

uyakwazi ukuthi mina Jehova nginguMsindisi wakho,

noMhlengi wakho,

uMninimandla kaJakobe.

₁₇Esikhundleni sethusi ngiyakuletha igolide,

nasesikhundleni sensimbi ngiyakuletha isiliva;

esikhundleni somuthi ithusi,

nasesikhundleni samatshe insimbi,

ngibeke ukuthula kube ngababonisi bakho,

nokulunga kube ngababusi bakho.

₁₈Indluzula ayisayikuzwakala ezweni lakho,

nencithakalo nokubhubhisa phakathi kwemikhawulo yakho,

kepha uyakubiza izingange zakho ngokuthi iNsindiso,

namasango akho ngokuthi iNdumiso.

₁₉Ilanga alisayikuba ngukukhanya kuwe emini,

nenyanga ayisayikukukhanyisela ngokukhazimula ebusuku;

uJehova uyakuba ngukukhanya okuphakade kuwe,

uNkulunkulu wakho abe ludumo lwakho.

₂₀Ilanga lakho alisayikushona,

nenyanga yakho ayisayikuncipha,

ngokuba uJehova uyakuba ngukukhanya okuphakade kuwe,

nezinsuku zokulila kwakho ziyakuphela.

₂₁Abantu bakho bayakuba ngabalungileyo bonke,

badle ifa lezwe kuze kube phakade,

igatsha lokutshala kwami,

umsebenzi wezandla zami,

ukuba ngidunyiswe.

₂₂Omncane uyakuba yinkulungwane,

ophansi abe yisizwe esinamandla;

mina nginguJehova,

ngiyakukusheshisa ngesikhathi sakho.”

₁UMoya weNkosi uJehova uphezu kwami,

ngokuba uJehova ungigcobile

ukuba ngishumayele izindaba ezinhle

kwabathotshisiweyo;

ungithumele ukubopha abanhliziyo ezaphukileyo,

nokumemezela ukukhululwa kwabathunjwa

nokuvulelwa kweziboshwa itilongo,

₂ngimemezele umnyaka womusa kaJehova

nosuku lokuphindisela lukaNkulunkulu wethu,

ngiduduze bonke abalilayo,

₃ngenze ukuba abalilayo eSiyoni

baphiwe amaqhele esikhundleni somlotha,

amafutha enjabulo esikhundleni sokulila,

ingubo yokudumisa esikhundleni somoya odangeleyo,

ukuze babizwe ngokuthi imithi yokulunga

nokutshaliwe nguJehova ukuba adunyiswe.

₄Bayakwakha izincithakalo ezindala,

bavuse izindawo ezichithekileyo zakuqala,

balungise imizi ebhujisiweyo,

izindawo eziyihlane izizukulwane ngezizukulwane.

₅Abezizwe bayakumela ukwalusa imihlambi yenu,

abafokazi babe ngabalimi benu nabaphathi bezivini zenu.

₆Kepha nina niyakuthiwa abapristi bakaJehova,

niyakubizwa ngokuthi izikhonzi zikaNkulunkulu wethu;

niyakudla imfuyo yezizwe,

nizibonge ngodumo lwazo.

₇Esikhundleni sehlazo lenu niyakuphiwa ngokuphindweyo;

abadumeleyo,

ukujabula kuyakuba yisabelo sabo;

ngalokho ezweni lakubo bayakudla ifa ngokuphindiweyo,

intokozo engapheliyo ibe ngeyabo.

₈“Ngokuba mina Jehova ngithanda ukulunga,

ngizonda ukuphanga kanye nokubi;

ngiyakubanika umvuzo wabo ngeqiniso,

ngenze isivumelwano esiphakade nabo.

₉Inzalo yabo iyakwaziwa phakathi kwezizwe,

nabantwana babo phakathi kwabantu;

bonke abababonayo bayakubavuma

ukuthi bayinzalo uJehova ayibusisile.”

₁₀Ngiyathokoza nokuthokoza ngoJehova,

umphefumulo wami wenama ngoNkulunkulu wami,

ngokuba ungembathisile izingubo zensindiso,

wangisibekela ngesambatho sokulunga,

njengomyeni efaka iqhele ngokompristi,

nanjengomakoti ezihlobisa ngezimvunulo zakhe.

₁₁Ngokuba njengokuba umhlaba uveza ihlumela lawo,

nanjengensimu ehlumisa okutshalwe kuyo,

kanjalo iNkosi uJehova iyakuveza

ukulunga nodumo phambi kwezizwe zonke.

₁Ngenxa yeSiyoni angiyikuthula,

nangenxa yeJerusalema angiyikuphumula,

ukulunga kwalo kungakaphumi njengokukhanya

nokusindiswa kwalo njengesibani esivuthayo.

₂Izizwe ziyakubona ukulunga kwakho,

namakhosi onke inkazimulo yakho;

uyakubizwa ngegama elisha

eliyakunqunywa ngumlomo kaJehova.

₃Uyakuba ngumqhele wodumo esandleni sikaJehova,

neqhele lobukhosi esandleni sikaNkulunkulu wakho.

₄Awusayikuthiwa Oshiyiweyo,

nezwe lakini alisayikuthiwa iNcithakalo,

kepha uyakubizwa ngokuthi Ontokozo yami ikuye,

nezwe lakini ngokuthi Oganileyo,

ngokuba uJehova uyathokoza ngawe,

nezwe lakini lendile.

₅Ngokuba njengensizwa iganwa yintombi,

kanjalo amadodana akho ayakuganwa nguwe;

nanjengokuthokoza komyeni ngomakoti wakhe

uNkulunkulu wakho uyakuthokoza ngawe.

₆Ngimisile abalindi

phezu kwezingange zakho, Jerusalema;

abayikuthula nakanye imini nobusuku;

nina eningabakhumbuzi ngoJehova maningaphumuli,

₇futhi ningamniki ukuphumula,

aze akhe iJerusalema,

alibeke libe yindumiso emhlabeni.

₈UJehova ufungile ngesandla sakhe sokunene

nangengalo yamandla akhe, wathi:

“Impela angisayikuzinika izitha zakho

amabele akho abe ngukudla kwazo;

abezizwe abayikuliphuza iwayini lakho olikhandlekeleyo,

₉kodwa abawaqoqileyo bayakuwadla,

bamdumise uJehova,

nabaliqoqileyo bayakuliphuza

emagcekeni endlu yami engcwele.”

₁₀Phumani, niphume ngamasango,

niyilungise indlela yabantu;

hlelani, niwuhlele umendo,

niwakhiphe amatshe;

niphakamisele izizwe ibhanela.*

₁₁Bhekani, uJehova uyezwakala

kuze kube sekugcineni komhlaba, ethi:

“Yishoni kuyo indodakazi yaseSiyoni ukuthi:

‘Bheka, insindiso yakho iyeza.

Bheka, umvuzo wakhe unawo,

nenkokhelo yakhe iphambi kobuso bakhe.’ ”

₁₂Bayakubizwa ngokuthi abantu abangcwele,

abahlengiweyo bakaJehova;

wena uyakuthiwa Ofuniweyo,

uMuzi Ongashiyiwe.

₁Ngubani lona ovela kwa-Edomi

enezingubo ezibomvu zakwaBosira,

lona ohlobile ngezambatho zakhe

ehamba ngobukhulu bamandla akhe, na?

“Yimi engikhuluma ngokulunga

nenginamandla okusindisa.”

₂Kungani ukuba izambatho zakho zibomvu,

nezingubo zakho zinjengezonyathela

esikhamweni sewayini, na?

₃“Isikhamo sewayini ngisinyathele ngingedwa;

kwakungekho nami noyedwa kubantu;

ngabanyathela ngentukuthelo yami,

ngabaciphiza ngokufutheka kwami,

negazi labo lasaphazeka ezingutsheni zami,

ngazingcolisa zonke izambatho zami.

₄Ngokuba usuku lokuphindisela lwalusenhliziyweni yami;

umnyaka wokuhlenga kwami usufikile.

₅Ngabheka, kepha kwakungekho osizayo;

ngamangala, kepha kwakungekho osekelayo;

yayisingisindisa ingalo yami,

nokufutheka kwami kwangisekela.

₆Ngase nginyathela abantu ngentukuthelo yami,

ngabachoboza ngokufutheka kwami,

ngathululela phansi igazi labo.”

₇Ngiyakubonga umusa kaJehova,

ngimdumise uJehova

ngakho konke uJehova asenzele khona,

nokuhle okuningi phezu kwendlu ka-Israyeli

ayisebenzele khona ngobubele bakhe

nangobuningi bomusa wakhe.

₈Wathi: “Nempela bangabantu bami,

abantwana abangakhohlisi,”

waba ngumsindisi wabo.

₉Ezinhluphekweni zabo zonke wahlupheka naye,

ingelosi yobuso bakhe yabasindisa;

ngothando lwakhe nangokuhawukela

kwakhe wabahlenga,

wabanqukula,

wabathwala zonke izinsuku zakuqala.

₁₀Kepha bahlubuka,

badabukisa uMoya wakhe oNgcwele,

waphenduka isitha sabo, walwa nabo.

₁₁Abantu bakhe base bekhumbula

izinsuku zakuqala zikaMose, bathi:

Uphi yena owabakhipha elwandle

kanye nabelusi bomhlambi wakhe, na?

Uphi yena owabeka uMoya wakhe oNgcwele phakathi kwabo,

₁₂owenza ukuba ingalo yakhe emangalisayo

ihambe ngakwesokunene sikaMose,

owahlukanisa amanzi phambi kwabo

ukuba azenzele igama eliphakade;

₁₃owabadabulisa elwandle njengehhashi ehlane,

ukuze bangakhubeki, na?

₁₄Njengezinkomo ezehlela esigodini

uMoya kaJehova wabaphumuza.

Wahola kanjalo abantu bakho

ukuba uzenzele igama elimangalisayo.

₁₅Bheka usezulwini,

ubone usendaweni yobukhosi bakho neyodumo lwakho:

kuphi ukushisekela kwakho nemisebenzi yakho yamandla na?

Ukuvutha kwesihe sakho nobumnene bakho kugodliwe kimi.

₁₆Ngokuba wena unguBaba;

ngokuba u-Abrahama akasazi,

no-Israyeli akasivumi.

Wena Jehova unguBaba;

igama lakho linguMhlengi wethu waphakade.

₁₇Jehova, usidukiselani ezindleleni zakho,

uzenze lukhuni izinhliziyo zethu zingakwesabi, na?

Buya ngenxa yezinceku zakho,

izizwe zefa lakho.

₁₈Abantu bakho abangcwele

balidla ifa isikhashana nje;

izitha zethu

zinyathele phansi indlu yakho engcwele.

₁₉Sinjengalabo ongazange ubuse phezu kwabo,

nabangabizwanga ngegama lakho.

₁Sengathi ungadabula amazulu, wehle,

zizamazame izintaba phambi kwakho

₂njengokuphenjwa komlilo ezinsabeni,

nalapho umlilo ubilisa amanzi,

ukuze wazise izitha zakho igama lakho,

izizwe zithuthumele phambi kwakho.

₃Ekwenzeni kwakho okwesabekayo esingakubhekanga wehla;

izintaba zathuthumela phambi kwakho.

₄Kusukela endulo abantu abezwanga,

abacoshanga nangendlebe,

futhi iso alibonanga uNkulunkulu ngaphandle kwakho

osebenzela omhlalelayo.

₅Wahlangabeza labo ababethokoza ngokwenza ukulunga,

labo abakukhumbulayo ezindleleni zakho.

Wena wathukuthela, thina sona;

sahlala kukho nasendulo;

siyakusindiswa na?

₆Sonke saba njengongcolileyo,

nokulunga kwethu konke kwakunjengengubo enindiweyo;

sabuna sonke njengeqabunga,

nobubi bethu basisusa njengomoya.

₇Kwakungekho owalibiza igama lakho,

owazivusela ukubambelela kuwe,

ngokuba wabusitheza ubuso bakho kithi,

wasiqeda ngenxa yobubi bethu.

₈Kepha manje, Jehova, unguBaba;

thina siyibumba, wena ungumbumbi wethu,

singumsebenzi wesandla sakho sonke.

₉Ungathukutheli kakhulu, Jehova,

ungakhumbuli njalo ububi.

Bheka, mawubone ukuthi sonke singabantu bakho.

₁₀Imizi yakho engcwele iphendukile ihlane;

iSiyoni liphendukile ihlane,

neJerusalema liyincithakalo.

₁₁Indlu yethu engcwele nemangalisayo,

lapho obaba babekudumisa khona,

ishisiwe ngomlilo,

nazo zonke izindawo zethu ezithandekayo ziphendukile izincithakalo.

₁₂Ungazibamba kukho konke lokhu, Jehova?

Ungathula, uze usihluphe kangaka, na?