To The Word – Day 154

₁Inkulumo yesiphambeko komubi,

isekujuleni kwenhliziyo yami, ithi:

Akukho ukumesaba uNkulunkulu phambi kwamehlo akhe.

₂Ngokuba ukonakala kwakhe kuyamthopha emehlweni akhe,

ukuze kungafunyanwa,

azondeke ngakho.

₃Amazwi omlomo wakhe angukona nenkohliso;

ukuyekile ukuhlakanipha nokwenza okulungileyo.

₄Uceba okubi ecansini lakhe,

uzimisa endleleni engalungile;

okubi kakwenyanyi.

₅Jehova, ububele bakho bufinyelela ezulwini,

nokuthembeka kwakho kuze kube semafwini.

₆Ukulunga kwakho kunjengezintaba ezinkulukazi,

ukwahlulela kwakho kulutwa olukhulu;

usindisa abantu nezilwane, Jehova.

₇Ububele bakho, Nkulunkulu, buyigugu elingaka;

abantwana babantu bakhosela ethunzini lamaphiko akho.

₈Bayakusutha ngamanoni endlu yakho,

ubaphuzise okomfula wokuthokoza kwakho.

₉Ngokuba ukuwe umthombo wokuphila;

ekukhanyeni kwakho siyakubona ukukhanya.

₁₀Mawume umusa wakho kubo abakwaziyo,

nokulunga kwakho kubo abaqotho ngenhliziyo.

₁₁Unyawo loziqhenyayo malungangifikeli;

nesandla somubi masingangixoshi.

₁₂Bheka, bawile abenza okubi;

bawiswe phansi, abasenakuvuka.

₁Ungazikhathazi ngababi,

ungabi namhawu ngabenza okungalungile.

₂Ngokuba bayakusikwa masinyane njengotshani,

babune njengemithana eluhlaza.

₃Themba kuJehova,

wenze okulungileyo;

hlala ezweni, uzondle ngokukholeka;

₄zithokozise ngoJehova,

yikhona ezakukunika okufiswa yinhliziyo yakho.

₅Nikela indlela yakho esandleni sikaJehova, umethembe;

yena uzakukwenza.

₆Uzakuhlalukisa ukulunga kwakho njengokukhanya,

nokufanele wena njengemini.

₇Thula phambi kukaJehova,

ulindele yena;

ungakhathazeki ngonenhlanhla endleleni yakhe,

ngomuntu osongoza amacebo amabi.

₈Pheza ukuthukuthela;

yeka ulaka, ungakhathazeki;

kubanga ukona nje.

₉Ngokuba ababi bazakuchithwa,

kepha abalindela uJehova bazakudla ifa lomhlaba.

₁₀Kuse ngumzuzwana, omubi angabe esabakho;

kuyakuthi lapho uhlola indawo yakhe,

uyakube engasekho.

₁₁Kepha abathobekileyo bazakulidla ifa lomhlaba,

bathokoze ngokuthula okukhulu.

₁₂Omubi uyamsongela olungileyo ngokubi,

amgedlele amazinyo.

₁₃INkosi iyakumhleka,

ngokuba iyabona ukuthi usuku lwakhe luyeza.

₁₄Ababi bahosha inkemba,

bansale umnsalo wabo

ukuba bamwise phansi ohluphekileyo nompofu,

babulale abandlela ilungile.

₁₅Inkemba yabo izakungena kweyabo inhliziyo,

iminsalo yabo yaphulwe.

₁₆Okuncane anakho olungileyo kungcono

kunemfuyo yababi abaningi.

₁₇Ngokuba izingalo zababi ziyakwaphulwa,

kepha uJehova uyabaphasa abalungileyo.

₁₈UJehova uyazazi izinsuku zabaqotho;

ifa labo liyakuma kuze kube phakade.

₁₉Abayikujabha esikhathini esibi;

bayakusutha ezinsukwini zendlala.

₂₀Ngokuba ababi bayakubhubha;

izitha zikaJehova zinjengobuhle bamadlelo:

ziyakunyamalala,

zinyamalale njengentuthu.

₂₁Omubi uyatsheleka, angabuyiseli;

kepha olungileyo unesihawu, aphane.

₂₂Ngokuba ababusisiweyo bakhe bazakulidla ifa lomhlaba,

kepha abaqalekiswa nguye bazakuchithwa.

₂₃Izinyathelo zomuntu ziqiniswa nguJehova;

uyayithanda indlela yakhe.

₂₄Noma ekhubeka, akayikuwa phansi,

ngokuba uJehova uphasa isandla sakhe.

₂₅Kade ngimusha, manje sengimdala;

angizange ngibone olungileyo eshiyiwe

nenzalo yakhe iphanza ukudla.

₂₆Usuku lonke uyahawukela,

atsheleke, nenzalo yakhe iyisibusiso.

₂₇Deda kokubi, wenze okuhle,

uyakuhlala kuze kube phakade.

₂₈Ngokuba uJehova uthanda ukulunga,

akabashiyi abangcwele bakhe;

bayalondolozwa kuze kube phakade,

kepha inzalo yababi iyachithwa.

₂₉Abalungileyo bazakudla ifa lomhlaba,

bahlale kuwo njalonjalo.

₃₀Umlomo wolungileyo ushumayela ukuhlakanipha;

ulimi lwakhe lukhuluma ukulunga.

₃₁Umthetho kaNkulunkulu wakhe usenhliziyweni yakhe;

izinyathelo zakhe azisheleli.

₃₂Omubi uqaphela olungileyo,

ufuna ukumbulala.

₃₃UJehova akayikumnikela esandleni sakhe;

akayikumlahla lapho ahlulelwa khona.

₃₄Lindela uJehova, ulonde indlela yakhe;

uzakukuphakamisa, udle ifa lomhlaba,

ubukele lapho ababi bechithwa khona.

₃₅Ngambona omubi oyisidlova

ezenabisile njengomuthi oluhlaza ogxilileyo;

₃₆kwathi lapho umuntu edlula, bheka, wayengasekho;

ngamfuna, kepha akabe esafunyanwa.

₃₇Mbhekisise ongasolekiyo,

umbone oqotho;

ngokuba umuntu wokuthula, ukugcina kwakhe kuhle.

₃₈Kepha abaphambukayo bayakubhujiswa bonke;

isikhathi sababi siyakunqunywa.

₃₉Ukusindiswa kwabalungileyo kuvela kuJehova;

uyinqaba yabo esikhathini sokuhlupheka.

₄₀UJehova uyabasiza, abakhulule;

ubakhulula kwababi, abasindise,

ngokuba bayamethemba.

₁Jehova, ungangijezisi ngentukuthelo yakho,

ungangishayi ngolaka lwakho.

₂Ngokuba imicibisholo yakho ingihlabile;

isandla sakho singicindezele kanzima.

₃Akukho ukuphila enyameni yami ngenxa yentukuthelo yakho;

akukho ukuthula emathanjeni ami ngenxa yesono sami.

₄Ngokuba iziphambeko zami zeqile phezu kwekhanda lami;

njengomthwalo osindayo ziyangisinda.

₅Izilonda zami ziyanuka,

zichicha ubovu

ngenxa yobuwula bami.

₆Ngikhonkobele, ngithotshisiwe kakhulu;

usuku lonke ngihamba ngilila.

₇Ngokuba ukhalo lwami lutshutshumba kakhulu;

akukho ukuphila enyameni yami.

₈Ngibuthakathaka, ngidubekile kabi;

ngiyakhala ngenxa yokugqiha kwenhliziyo yami.

₉Nkosi, ukufisa kwami konke kuphambi kwakho;

ukububula kwami akufihlekile kuwe.

₁₀Inhliziyo yami iyagquma kakhulu;

amandla ami angishiyile,

ngisho nokukhanya kwamehlo ami akusekho kimi.

₁₁Abathandekayo bami nabahlobo bami

bemi kude nokuhlupheka kwami;

abakwethu bemi kude laphaya.

₁₂Abafuna umphefumulo wami bayangicupha;

abafuna ukungilimaza bakhuluma okubi,

bazindla inkohliso usuku lonke.

₁₃Mina kodwa nginjengesithulu, angizwa;

nginjengesimungulu esingavuli umlomo waso.

₁₄Yebo, nginjengomuntu ongezwayo;

akukho ukuphikisa emlonyeni wakhe.

₁₅Ngokuba ngithemba wena Jehova;

wena Nkosi Nkulunkulu wami uzakuphendula.

₁₆Ngokuba ngithe:

“Funa bajabule ngami,

ekusheleleni konyawo lwami bazikhukhumeze ngami.”

₁₇Ngokuba ngiseduze kokuwa,

nobuhlungu bami buphambi kwami ngezikhathi zonke.

₁₈Ngokuba ngiyabika ukona kwami;

ngiyadabuka ngesono sami.

₁₉Kepha izitha zami ziphilile, zinamandla;

baningi abangizonda ngeze.

₂₀Abaphindisela okubi ngokuhle bamelene nami,

ngokuba ngilandela okulungileyo.

₂₁Ungangishiyi, Jehova;

Nkulunkulu wami, ungabi kude nami.

₂₂Phuthuma, ungisize,

Nkosi, nsindiso yami.

₁Ngithe: “Ngizakulinda izindlela zami

ukuba ngingoni ngolimi lwami;

ngizakugcina umlomo wami ngesifonyo,

omubi esekhona phambi kwamehlo ami.”

₂Ngabindela impela, ngathula nakukho okuhle;

kwavuswa ubuhlungu bami.

₃Inhliziyo yami yavutha phakathi kwami;

kwaphembeka umlilo ngisazindla;

ngakhuluma ngolimi lwami.

₄“Jehova, ngazise ukuphela kwami,

nesilinganiso sezinsuku zami ukuba siyini;

mangazi ukuthi ngingodlulayo.

₅Bheka, izinsuku zami wazenza zaba ngangobubanzi besandla;

imihla yokuphila kwami ayilutho kuwe;

impela yilowo nalowo muntu ungumoya nje,

noma eqine kangakanani. Sela*

₆“Impela umuntu uhamba njengesithunzi nje;

impela uzikhathaza ngokuyize nje;

unqwabela imfuyo,

kepha akazi ukuthi ngubani ozakuyibutha.

₇“Kalokhu-ke, Nkosi,

ngilindele ntoni na?

Ithemba lami likuwe.

₈Ngisindise kuzo iziphambeko zami,

ungangenzi isithuko sesiwula.

₉Ngiyathula, angivuli umlomo wami;

ngokuba nguwe okwenzileyo.

₁₀Susa kimi ukushaya kwakho,

ngokuba ngiyaqedwa ngukushaywa yisandla sakho.

₁₁Nxa ulaya umuntu ngesijeziso ngenxa yeziphambeko,

ubuhle bakhe ubenza buphele njengenundu;

yilowo nalowo muntu ungumoya nje. Sela*

₁₂“Yizwa umkhuleko wami, Jehova,

ulalele ukumemeza kwami;

ungathuli ngezinyembezi zami,

ngokuba ngingumfokazi kuwe;

ngiyisihambi njengokhokho bami bonke.

₁₃Yeka ukungibuka, ngize ngincibilike,

ngingakamuki lapha,

ngingabe ngisabakho.”

₁Impendulo ethambileyo iyabuyisa ukufutheka,

kepha izwi elilukhuni livusa ulaka.

₂Ulimi lwabahlakaniphileyo luveza kahle ukwazi,

kepha umlomo weziwula uphafuza ubuwula.

₃Amehlo kaJehova asezindaweni zonke;

aqaphela ababi nabahle.

₄Ulimi oluthulayo lungumuthi wokuphila,

kepha ukuphambanisa kwalo kungukuchotshozwa komoya.

₅Isiwula siyadelela ukulaya kukayise,

kepha onaka ukusolwa uyathola ukuqonda.

₆Endlini yolungileyo kukhona ingcebo eningi,

kepha enzuzweni yababi kukhona ukuhlupheka.

₇Izindebe zabahlakaniphileyo ziyasakaza ukwazi,

kepha izinhliziyo zeziwula azinjalo.

₈Umhlatshelo wababi uyisinengiso kuJehova,

kepha umkhuleko wabaqotho uyintokozo yakhe.

₉Indlela yababi iyisinengiso kuJehova,

kepha uyamthanda olandela ukulunga.

₁₀Ukulaywa kukhulu koyishiya indlela;

ozonda ukusolwa uyakufa.

₁₁Indawo yabafileyo nokubhubha kuphambi kukaJehova;

kakhulu kangakanani izinhliziyo zabantwana babantu.

₁₂Isideleli asithandi ukusolwa;

asiyi kwabahlakaniphileyo.

₁₃Inhliziyo ethokozayo yenza ubuso bube buhle,

kepha ngosizi lwenhliziyo uyachotshozwa umoya.

₁₄Inhliziyo yoqondileyo iyafuna ukwazi,

kepha umlomo weziwula uyadla ubuwula.

₁₅Zonke izinsuku zohluphekayo zimbi,

kepha onhliziyo yakhe yenamile unedili njalo.

₁₆Okuncane kanye nokumesaba uJehova kungcono

kunengcebo eningi kanye nokukhathazeka.

₁₇Isidlo semifino lapho kukhona uthando singcono

kunenkabi ekhuluphalisiweyo kanye nenzondo.

₁₈Umuntu ofuthayo uyavusa ukuxabana,

kepha owephuza ukuthukuthela uthulisa ingxabano.

₁₉Indlela yevila injengothango lobobe,

kepha umkhondo wabakhutheleyo ungumendo.

₂₀Indodana ehlakaniphileyo iyajabulisa uyise,

kepha umuntu oyisiwula uyadelela unina.

₂₁Ubuwula buyintokozo kongenangqondo,

kepha umuntu oqondileyo uyaqondisa ukuhamba kwakhe.

₂₂Lapho kungekho khona ukululekana,

amasu ayachitheka,

kepha ngobuningi babeluleki ayakuma.

₂₃Umuntu uyathokoza ngokuphendula komlomo wakhe,

nezwi ngesikhathi salo lihle kangakanani!

₂₄Kohlakaniphileyo indlela yokuphila iya phezulu

ukuba adede endaweni yabafileyo phansi.

₂₅Indlu yabaziqhenyayo uJehova uyayisiphula,

kepha uyamisa umkhawulo womfelokazi.

₂₆Amacebo amabi ayisinengiso kuJehova,

kepha amazwi acwebileyo ayamenamisa.

₂₇Ohahela inzuzo uhlupha indlu yakhe,

kepha ozonda imivuzo uyakuphila.

₂₈Inhliziyo yolungileyo iyacabanga ukuphendula,

kepha imilomo yababi iyaphafuza izinto ezimbi.

₂₉UJehova ukude nababi,

kepha uyezwa imikhuleko yabalungileyo.

₃₀Ukukhanya kwamehlo kuyathokozisa inhliziyo,

nezindaba ezinhle ziyanonisa amathambo.

₃₁Indlebe elalela ukusola kokuphila

iyakuhlala phakathi kwabahlakaniphileyo.

₃₂Onqaba ukulaywa udelela umphefumulo wakhe,

kepha olalela ukusolwa uzuza ingqondo.

₃₃Ukumesaba uJehova kungukulaywa kokuhlakanipha;

ukuthobeka kuyandulela udumo.

₁Umuntu unamasu enhliziyweni,

kepha impendulo yolimi ivela kuJehova.

₂Zonke izindlela zomuntu zimhlophe emehlweni akhe,

kepha uJehova uyalinganisa imimoya.

₃Gingqela kuJehova imisebenzi yakho,

ukuze kuqiniswe amasu akho.

₄UJehova wenzile konke kube nomgomo wakho;

yebo, nomubi umenzele usuku olubi.

₅Bonke abazidlayo ngenhliziyo bayisinengiso kuJehova;

impela abayikuyekwa.

₆Ngomusa neqiniso ukona kuyahlangulwa,

nangokumesaba uJehova kudedwa ebubini.

₇Lapho izindlela zomuntu zimthokozisa uJehova,

uzenza nezitha zakhe ukuba zihlalisane kahle naye.

₈Okuncane kanye nokulunga kungcono

kunenzuzo enkulu kanye nokungalungi.

₉Inhliziyo yomuntu iceba indlela,

kepha uJehova uyaqondisa izinyathelo zakhe.

₁₀Izimpendulo zikaNkulunkulu zisezindebeni zenkosi;

umlomo wayo awuyikuphambuka ekwahluleleni.

₁₁Ukulinganisa nesilinganiso esilungileyo kungokukaJehova;

zonke izisindo zasesikhwameni zingumsebenzi wakhe.

₁₂Ukwenza okubi kuyisinengiso emakhosini,

ngokuba isihlalo sobukhosi simiswa ngokulunga.

₁₃Izindebe ezilungileyo ziyintokozo yamakhosi;

amazwi abaqotho ayawathanda.

₁₄Intukuthelo yenkosi injengezithunywa zokufa,

kepha umuntu ohlakaniphileyo uyayidambisa.

₁₅Ekukhanyeni kobuso benkosi kukhona ukuphila,

nesisa sayo sinjengefu lemvula yamuva.

₁₆Kungcono kangakanani ukuzuza ukuhlakanipha kunegolide;

yebo, ukuzuza ukuqonda nga kukhethwa kunesiliva.

₁₇Umendo wabaqotho ungukudeda ebubini;

oqaphela indlela yakhe ulondoloza umphefumulo wakhe.

₁₈Ukuzidla kuyandulela ukubhujiswa,

nomoya oziqhenyayo wandulela ukuwa.

₁₉Kungcono ukuba nomoya

othobekileyo kanye nabathobekileyo,

kunokwabelana impango nabazidlayo.

₂₀Onakekela izwi uyakufumana okuhle,

nowethembayo kuJehova ubusisiwe.

₂₁Ohlakaniphile ngenhliziyo uyakubizwa ngokuthi oqondileyo,

nobumnandi bezindebe buyandisa imfundiso.

₂₂Ukuqonda kungumthombo wokuphila konakho,

kepha ubuwula bungukulaywa kweziwula.

₂₃Inhliziyo yohlakaniphileyo iyafundisa umlomo wakhe,

yenezele imfundiso ezindebeni zakhe.

₂₄Amazwi amahle anjengamakhekheba oju;

amnandi emphefumulweni, ayimpiliso emathanjeni.

₂₅Kukhona indlela eqondile phambi komuntu,

kepha ukuphela kwayo kuyizindlela zokufa.

₂₆Iphango lesisebenzi liyasisebenzela,

ngokuba umlomo waso uyasiqhuba.

₂₇Umuntu omubi uphanda okubi,

nasezindebeni zakhe kunjengomlilo ohlangulayo.

₂₈Umuntu ophambeneyo usakaza ukuxabana,

nomncethezi wahlukanisa abahlobo.

₂₉Umuntu oyisidlwangudlwangu uyenga umakhelwane wakhe,

amhambise endleleni engenhle.

₃₀Ocimeza amehlo akhe uceba okuphambanisayo,

noluma izindebe zakhe ufeza okubi.

₃₁Ubumpunga bungumqhele wodumo;

bufumaniswa endleleni yokulunga.

₃₂Owephuza ukuthukuthela muhle kuneqhawe,

nobusa umoya wakhe kunonqoba umuzi.

₃₃Inkatho yenzelwa emathangeni,

kepha ukwahlulela kwayo kungokukaJehova.