To The Word – Day 163

₂“Awayikuphendulwa amazwi amaningi kangaka na?

Umuntu oliphoshophosho angathethelelwa na?

₃Ukugavuza kwakho kuthulisa abantu na?

Nalapho ukloloda,

akakho ongakuhlaza na?

₄Ngokuba uthi:

‘Ukufundisa kwami kulungile;

ngimhlophe emehlweni akho.’

₅Sengathi uNkulunkulu angakhuluma,

akuvulele izindebe zakhe,

₆akwazise izimfihlakalo zokuhlakanipha,

ngokuba ukuqonda kwakhe kuninginingi,

uze wazi ukuthi uNkulunkulu,

ukuba kube kuhle kuwe,

wenza ukuba ikhohlakale inxenye yecala lakho.

₇“Ungathola imfihlakalo kaNkulunkulu na?

Ungamfumana uSomandla kuze kube sekupheleleni kwakhe na?

₈Kuphakeme njengezulu – ungenzani na?

Kujulile kunendawo yabafileyo – ungazini na?

₉Isilinganiso sakho side kunomhlaba,

sibanzi kunolwandle.

₁₀Uma edlula, avalele,

abizele ekwahluleleni,

ngubani ongamkhalima na?

₁₁Ngokuba uyabazi abantu ababi;

lapho ebona ukona, akayikukunaka na?

₁₂Umuntu oyize uyakuba nengqondo,

nxa ithole lembongolo yasendle lizalwa libe ngumuntu.

₁₃“Uma ulungisa inhliziyo yakho,

welulele izandla zakho kuye;

₁₄uma udedisele kude ukona okusesandleni sakho,

ungahlalisi ububi ematendeni akho,

₁₅khona uyakuphakamisa ubuso bakho ungenamahloni,

uqine, ungesabi.

₁₆Ngokuba uyakukhohlwa ukuhlupheka kwakho,

ukukhumbule kunjengamanzi adlulileyo.

₁₇Ukuphila kwakho kuyakusa kunemini;

noma kuhlwa, kuyakuba njengokusa nje.

₁₈Uyakuba nokwethemba,

ngokuba ithemba likhona;

uyakuphendla,

ulale ngokulondeka.

₁₉Uyakulala, ungethuswa muntu;

abaningi bayakuzincengela kuwe.

₂₀Kepha amehlo ababi ayakufiphala;

abayikuba nandawo yokuphephela;

ithemba labo liyakuba ngukuphuma komphefumulo.”

₂“Impela yinina eningabantu;

ukuhlakanipha kuyakufa nani.

₃Kodwa nami nginengqondo njengani,

angahlulwa yinina;

ngubani ongazazi izinto ezinje na?

₄Ngiyisigcono somngane wami,

ngowambiza uNkulunkulu,

waphendula;

olungileyo nongenasici uyisigcono.

₅Emcabangweni wohlezi kahle ingozi iyadeleleka;

kulungiselwe abazinyawo zabo zishelela.

₆Amatende abacindezelayo anokuthula;

abathukuthelisayo uNkulunkulu bayalondeka,

abaletha unkulunkulu wabo ngezandla zabo.

₇Kepha mawubuze izinkomo,

ziyakukufundisa,

nezinyoni zezulu, ziyakukutshela.

₈Khuluma kuwo umhlaba,

uyakukufundisa,

nezinhlanzi zolwandle ziyakukulandisa.

₉Ngubani ongaziyo ngakho konke lokho

ukuthi isandla sikaJehova sikwenzile lokho na?

₁₀Esandleni sakhe ukhona umphefumulo wakho konke okuphilayo,

nomoya wenyama yabantu bonke.

₁₁Indlebe ayivivinyi yini amazwi,

njengolwanga lunambitha ukudla, na?

₁₂Ezimpungeni kukhona ukuhlakanipha,

nasebudeni bezinsuku ukuqonda.

₁₃“Kuyena kukhona ukuhlakanipha namandla;

unesu nokuqonda.

₁₄Bheka, uyadiliza, kungabe kusakhiwa;

uyavalela umuntu, kungabe kusavulwa.

₁₅Bheka, uyavimba amanzi, ashe;

uyawathumela agumbuqele umhlaba.

₁₆Kuye kukhona amandla nokusizwa;

odukisiweyo nodukileyo bakuye.

₁₇Umukisa abaluleki bephangiwe;

uyenza abahluleli babe yiziwula.

₁₈Uthukulula izibopho zamakhosi,

awabophe ezinkalweni ngamaketanga.

₁₉Umukisa abapristi bephangiwe,

aphenule abemiyo njalo.

₂₀Uyasusa ulimi lwabathembekileyo,

aphuce amalunga ukuqonda.

₂₁Uthela izikhulu ngehlazo,

akhumule imbonya yonamandla.

₂₂Uyambula izinto ezijulileyo ebumnyameni,

akhiphele ekukhanyeni ithunzi lokufa.

₂₃Uyandisa izizwe, abesezibhubhisa;

ukhulisa izizwe, abesezisusa.

₂₄Uyamuka izinhloko zezizwe ezweni ingqondo yazo,

azidukise ehlane elingenandlela.

₂₅Ziyaphumputha ebumnyameni zingenakukhanya,

uyazintengantengisa njengesidakwa.

₁“Bheka, iso lami libone konke;

indlebe yami ikuzwile, yakuqonda.

₂Enikwaziyo ngiyakwazi nami;

angahlulwa yinina.

₃Kepha ngiyakukhuluma kuSomandla;

ngifuna ukuphikisana noNkulunkulu.

₄Kepha ningabaqambimanga;

niyizinyanga ezingelutho nonke.

₅Sengathi ningathula nokuthula,

lokho kube ngukuhlakanipha kini.

₆Ake nizwe ukuthetha kwami,

niqaphele ukuzivikela kwezindebe zami.

₇Niyakumkhulumela uNkulunkulu ngokubi,

nimkhulumele ngenkohliso, na?

₈Niyakubuvuma ubuso bakhe,

nimmele uNkulunkulu, na?

₉Kuhle yini, lapho eniphendla?

Njengalokhu umuntu ekhohliswa niyakumkhohlisa na?

₁₀Uyakunisola nokunisola,

uma nivuna ubuso ngasese.

₁₁Ubukhulu bakhe abuyikunethusa,

nengebhe ngaye inehlele, na?

₁₂Izikhumbuzo zenu ziyizaga zomlotha;

izivikelo zenu ziyizivikelo zebumba.

₁₃“Thulani, ningiyeke ukuba ngikhulume,

kungehlele noma yini.

₁₄Bengiyakuyithathelani inyama yami ngamazinyo ami,

ngibeke ukuphila kwami esandleni sami, na?

₁₅Bheka, uyakungibulala,

anginathemba;

nokho ngiyakuvikela izindlela zami ebusweni bakhe.

₁₆Lokhu kuyakuba yinsindiso yami

ukuthi ongenaNkulunkulu akezi phambi kwakhe.

₁₇Zwisisani amazwi ami,

ukusho kwami kube sezindlebeni zenu.

₁₈Bhekani-ke, sengilungisile ukwahlulelwa kwami;

ngiyazi ukuthi ngiyakuthethwa mina.

₁₉Ngubani oyakuphikisana nami na?

Ngokuba lapho bengiyakuthula,

ngigqabuke.

₂₀Izinto ezimbili kuphela ungazenzi kimi,

ngize ngingacasheli ubuso bakho:

₂₁masingasondeli kimi isandla sakho,

ngingethuswa yingebhe ngawe.

₂₂Khona mawubize, mina ngiyakuphendula,

noma kukhulume mina,

wena ungiphendule.

₂₃Iziphambeko zami nezono zami zingakanani na?

Ngazise izeqo zami nezono zami.

₂₄Usithelani ubuso bakho,

ungishaye isitha, na?

₂₅Uyakwethusa iqabunga eliphephethwayo,

uxoshe amabibi awomileyo, na?

₂₆Ngokuba uloba okumunyu ngami,

ungidlisa ifa lobubi bobusha bami;

₂₇ufaka izinyawo zami ezingongolweni,

uqaphela zonke izindlela zami,

uzidwebela umudwa ngasematheni ezinyawo zami,

₂₈noma nginyamalala njengokubolayo,

njengengubo edliwe yizinundu.

₁“Umuntu ozelwe ngowesifazane

imihla yakhe mifushane,

igcwele ukuyaluza.

₂Uyavela njengembali, abune;

ubaleka njengethunzi, angemi.

₃Konje uvulela onjalo amehlo akho,

ungingenise ekwahluleweni nawe, na?

₄Ngubani ongaveza okuhlambulukileyo kukho

okungcolileyo na?

Kakho noyedwa.

₅Uma imihla yakhe inqunyiwe,

umumo wezinsuku zakhe ukuwe,

ubekile umkhawulo wakhe,

aze angadluli,

₆ungambheki, aphumule,

ukuze athokoze ngosuku lwakhe njengomqashwa.

₇“Ngokuba kukhona ithemba emthini:

uma unqunywa, ungabuye uhlume,

nehlumela lawo aliyikuphela.

₈Noma impande yawo iguga emhlabathini,

nesiphunzi sawo sifela othulini,

₉ngephunga lamanzi uyakuhluma,

uveze izingatsha njengesithombo.

₁₀Kepha umuntu ofileyo uphelile;

umuntu ogqabukileyo uphi na?

₁₁Njengamanzi anyamalele elwandle,

nomfula oshileyo ome,

₁₂kanjalo umuntu ulala phansi,

angabe esavuka;

lize lingabikho izulu abayikuvuka,

bangaphaphanyiswa ebuthongweni babo.

₁₃Sengathi ungangifihla endaweni yabafileyo,

ungisithe kuze kudlule intukuthelo yakho,

unginqumele isikhathi,

ungikhumbule.

₁₄Uma umuntu efa,

uyakubuye aphile na?

Bengiyakulinda zonke izinsuku zomshikashika wami,

kuze kufike ukumuka kwami.

₁₅Ubuyakubiza, mina ngiphendule;

ubuyakulangazelela umsebenzi wezandla zakho,

₁₆yebo, khona ubuyakubala izinyathelo zami,

ungaqapheli isono sami.

₁₇Isiphambeko besiyakuvalelwa esikhwameni,

besewusibekela ukona kwami.

₁₈“Impela intaba iyawa, idilike;

idwala liyasuswa endaweni yalo;

₁₉amanzi ayagubha amatshe;

ukuphuphuma kwawo kuyakhukhula uthuli lomhlaba;

kanjalo uyachitha nethemba lomuntu.

₂₀Uyamsukela kuze kube phakade,

amuke;

uyaguqula ubuso bakhe, ummukise.

₂₁Amadodana akhe ayadunyiswa,

engazi yena;

ayeyiswa, engakuqondi.

₂₂Inyama yakhe iyezwa ubuhlungu bayo kuphela;

umphefumulo wakhe uzidabukela wona kuphela.”

“Omkhulu uyakukhonza omncane,”

“UJakobe ngamthanda,

kepha u-Esawu ngamzonda.”

“Ngizakumhawukela engimhawukelayo,

ngimzwele engimzwelayo.”

“Ngiyakubiza abangesiso isizwe sami ngokuthi isizwe sami,

nongathandiwe ngokuthi uthandiwe;

₂₆nasendaweni lapha kwathiwa kubo:

‘Anisibo abantu bami,’

lapho bayakubizwa ngokuthi:

‘Abantwana bakaNkulunkulu ophilayo.’ ”

“Nokuba umumo wabantwana bakwa-Israyeli

ungangesihlabathi solwandle,

yinsali eyakusindiswa,

₂₈ngokuba iNkosi iyakufeza

izwi layo emhlabeni,

iliphelelise, ikhawuleze,”

“Uma iNkosi Sebawoti ibingasishiyelanga

inzalo besiyakuba njengeSodoma,

sifane neGomora.”

“Bheka, ngibeka eSiyoni itshe lokukhubekisa,

nedwala lokuwisa,

nokholwa yilo akayikujabha.”

“Yeka, zinhle izinyawo

zabashumayela izindaba ezinhle.”

“Izwi labo liphumele emhlabeni wonke,

nokusho kwabo kuye

nasemikhawulweni yelakhiweyo.”

“Mina ngiyakunivusela umhawu ngabangesiso isizwe,

nginithukuthelise ngesizwe esingenangqondo.”

“Ngafunyanwa yilabo abangangifunanga,

ngabonakala kulabo abangangibuzanga.”

“Usuku lonke ngelulela izandla zami

kuso isizwe esingalaleliyo nesiphikayo.”