To The Word – Day 168

₂“Yizwani amazwi ami,

nina zihlakaniphi,

nibeke indlebe kimi nina zazi.

₃Ngokuba indlebe iyavivinya amazwi,

njengokuba ulwanga luzwa ukudla.

₄Masizikhethele okulungileyo,

sazi phakathi kwethu okuhle.

₅Ngokuba uJobe uthe: ‘Ngilungile;

uNkulunkulu ususile ukwahlulelwa kwami.

₆Phezu kokwahlulelwa kwami ngishaywa onamanga;

inxeba lami alinakupholiswa,

noma ngingenasiphambeko.’

₇Ngumuphi umuntu onjengoJobe

ophuza usulu njengamanzi,

₈ohamba ngokwazana nabenza okubi,

ahambisane nabantu ababi, na?

₉Ngokuba uthi: ‘Akunalusizo kumuntu

ukuba azane noNkulunkulu.’

₁₀“Ngalokho ngizweni nina bantu abanokuqonda;

makube kude noNkulunkulu ukuba enze okubi,

nakuSomandla ukuba enze ukona.

₁₁Ngokuba uyabuyisela kumuntu njengokwenza kwakhe,

atholise kube yilowo nalowo njengezindlela zakhe.

₁₂Impela uNkulunkulu akenzi okubi;

uSomandla kahlanekezeli ukwahlulela.

₁₃Ngubani owambeka phezu komhlaba na?

Ngubani owamisa izwe lonke na?

₁₄Uma ebeyakuzibheka yena,

azibuyisele umoya wakhe nomphefumulo wakhe,

₁₅inyama yonke ibiyakufa kanyekanye,

umuntu abuyele othulini.

₁₆“Uma unengqondo, yizwa lokhu,

ulalele izwi lokukhuluma kwami.

₁₇Imbala ozonda ukwahlulela uyakubusa na?

Uyakumlahla olungileyo nonamandla

₁₈oshoyo enkosini ukuthi:

‘Muntu omubi,’

nasezikhulwini: ‘Mashinga,’

₁₉ongakhethi ubuso bezikhulu,

onganaki ocebileyo kunompofu, na?

Ngokuba bonke bangumsebenzi wezandla zakhe.

₂₀Bayafa ngokuphazima kweso;

phakathi kwamabili abantu bayathuthumela,

banyamalale;

amaqhawe ayasuswa,

kepha kungengasandla.

₂₁“Ngokuba amehlo akhe akuzo izindlela zomuntu;

ubona zonke izinyathelo zakhe.

₂₂Abukho ubumnyama,

nethunzi lokufa alikho,

lapho abenza okubi bengacasha khona.

₂₃Ngokuba akadingi ukuba abelokhu ebheka umuntu

ukuba aye kuNkulunkulu ukwahlulelwa.

₂₄Uyaphahlaza abanamandla,

kungahlolwanga,

amise abanye ezikhundleni zabo.

₂₅Ngalokho uyazi imisebenzi yabo;

uyabagumbuqela ebusuku,

bachotshozwe.

₂₆Uyabashaya njengababi

endaweni lapho bebonwa khona,

₂₇ngokuba bachezuka ekumlandeleni,

abanakanga neyodwa yezindlela zakhe,

₂₈baze benza ukuba ukukhala kwabampofu kufike kuye,

wezwa ukukhala kwabahluphekayo.

₂₉Lapho yena ethula,

ngubani ongalahla,

nalapho ethukusa ubuso bakhe,

ngubani ongambona na?

Ubusa ngokufananayo,

noma kuyisizwe noma kungumuntu,

₃₀ukuba kungabusi muntu ongenaNkulunkulu,

abantu bacushwe.

₃₁“Ngokuba ukhona oke wathi kuNkulunkulu:

‘Ngithweswe icala noma ngingonanga, na?

₃₂Lokhu engingakuboni,

ngifundise khona;

uma ngenzile okubi,

angisayikukuphinda.’

₃₃Uyakuphindisela njengokuthanda

kwakho, lokhu ukwenqaba, na?

Ngokuba nguwe ozakukhetha,

akusimina;

khuluma okwaziyo.

₃₄“Abantu abanokuqonda bayakusho kimi,

yebo, nezihlakaniphi,

lapho zingizwa, ziyakuthi:

₃₅‘UJobe ukhuluma engenalwazi;

amazwi akhe awanangqondo.’

₃₆Sengathi uJobe angavivinywa kuze kube sekupheleni,

ngokuba uphendula njengabantu ababi.

₃₇Ngokuba uyenezela ukuhlubuka esonweni sakhe;

ushaya ihlombe phakathi kwethu,

andise amazwi akhe kuNkulunkulu.”

₂“Usho uthi lokhu kulungile na?

Uthi: ‘Yilungelo lami kuNkulunkulu yini,’

₃njengokuba uthi: ‘Kungisiza ngani?’

nokuthi: ‘Ngizuzeni kunalokho ebengiyakukuzuza,

uma ngonile, na?’

₄“Ngizakukuphendula mina ngamazwi,

wena nabangane bakho.

₅Bheka ngasezulwini, ubone,

uqaphele amafu aphakeme kunawe.

₆Uma wona, wenzani kuye na?

Uma iziphambeko zakho ziziningi,

wenzani kuyena na?

₇Uma ulungile, umnikani yena,

noma umukelani esandleni sakho na?

₈Ububi bakho buqondene nomuntu onjengawe,

nokulunga kwakho kuthintana nendodana yomuntu.

₉“Abantu bakhala ngobuningi bezinkahlo;

bakhala ngokusizwa ngenxa yengalo yabanamandla.

₁₀Kepha akakho othi: ‘Uphi uNkulunkulu, uMenzi wami,

ozwakalisa amahubo ebusuku,

₁₁osifundisa phezu kwezilwane zomhlaba,

asenze sihlakaniphe phezu kwezinyoni zezulu.’

₁₂Lapho bayakhala ngokuzidla kwababi,

kepha akaphenduli.

₁₃Impela uNkulunkulu akezwa okuyize,

uSomandla akayikukunakekela;

₁₄kakhulu kangakanani,

lapho uthi awumboni

nokuthi, noma icala liphambi kwakhe,

usamhlalela, na?

₁₅Kepha manje, ngokuba intukuthelo yakhe ingajezisi,

anganaki kakhulu iziphambeko,

₁₆uJobe uvulela ize umlomo wakhe;

uyandisa amazwi engenalwazi.”

₂“Ngihlalele kancane, ngiyakukubonisa,

ngokuba ngisenamazwi okummela uNkulunkulu.

₃Ngiyakulanda kude ulwazi lwami,

nginike uMenzi wami ukulunga.

₄Impela amazwi ami awasiwo amanga;

unawe ophelele ekwazini.

₅“Bheka, uNkulunkulu unamandla,

kepha kadeleli muntu;

mkhulu emandleni okuqonda.

₆Akenzi ukuba omubi aphile,

kepha abampofu uyabanika ukwahlulelwa.

₇Akabuyisi amehlo akhe kwabalungileyo,

kepha ubahlalisa namakhosi ezihlalweni zobukhosi,

baphakame kuze kube phakade.

₈Uma beboshwa ngamaketanga,

babanjwe ngezintambo zokuhlupheka,

₉uyababonisa izenzo zabo

neziphambeko zabo zokuthi baziphakamisile.

₁₀Uyavulela izindlebe zabo ukulaywa,

asho ukuba babuye ebubini.

₁₁Uma belalela, bamkhonze,

bayakuqeda imihla yabo ebuhleni

neminyaka yabo kukho okumnandi.

₁₂Kepha uma bengalaleli,

bayakuphela ngenkemba,

bafe bengenalwazi.

₁₃“Abangesabi ngenhliziyo baqongelela ulaka;

abakhali lapho ebabopha.

₁₄Bafa besebasha,

ukuphila kwabo kube njengokwezifebe zethempeli.

₁₅Ukhulula ompofu ngobumpofu bakhe,

avule indlebe yabo ngokuhlupheka.

₁₆“Yebo, nga ekuvusa ukuba uphume emlonyeni wosizi,

uye endaweni ebanzi,

lapho kungekho kunyinyeka khona,

kunone okubekwa etafuleni lakho.

₁₇Kepha ugcwele ukwahlulelwa kwababi;

ukwahlulela nokulunga kuyakubamba.

₁₈Xwaya ukuba ulaka lungakuvusi usashaywa,

ungachezukiswa ngobuningi bamahlawulo.

₁₉Ukukhala kwakho kungakusiza ukuba ungahlali osizini,

nazo zonke izikhwepha zamandla akho, na?

₂₀Ungafisi ubusuku,

lapho abantu beyakususwa ezindaweni zabo.

₂₁Xwaya ukuba ungabhekisi ubuso bakho ebubini,

ngokuba ukhethile lokho kunokuhlupheka.

₂₂“Bheka, uNkulunkulu uphakeme ngamandla akhe;

ngubani ofundisa njengaye na?

₂₃Ngubani ommisele indlela yakhe na?

Ngubani ongasho ukuthi:

‘Wenzile okubi,’ na?

₂₄Khumbula ukukhulisa izenzo zakhe

abahlabelela ngazo abantu.

₂₅Bonke abantu bayazibona;

abokufa bayazibuka besekude.

₂₆Bheka, uNkulunkulu uphakeme,

asimqondi;

umumo weminyaka yakhe ayinakuphenywa.

₂₇“Wenyusa amathonsi amanzi,

abuye awathulule njengemvula enkungwini yakhe;

₂₈amafu awenza ukuba aconse,

awathele phezu kwabantu abaningi.

₂₉Ukhona ongaqonda ukwenekeka kwamafu

nokuduma kwedokodo lakhe na?

₃₀Bheka, uyasakaza ukukhanya kwakhe ngakuye;

uyasibekela ubuphansi bolwandle.

₃₁Ngokuba ngalokho uyabahlulela abantu,

aphane kakhulu ngokudla.

₃₂Uyasibekela izandla zakhe ngokukhanya,

akuyale ukuba kushaye isigcibisholo.

₃₃Umsindo wakhe ulanda ngaye oshisekela ububi ngentukuthelo.

₁“Yebo, ngenxa yalokho iyathuthumela inhliziyo yami,

isuke endaweni yayo.

₂Yizwani, nizwe indumo yezwi lakhe,

nemvunge ephuma emlonyeni wakhe.

₃Uyakukhipha phansi kwalo lonke izulu,

nonyazi lwakhe luya emagumbini omhlaba.

₄Emva kwalo kuduma izwi;

uduma ngezwi lobukhosi bakhe;

kalumisi unyazi, lapho lizwakala izwi lakhe.

₅UNkulunkulu uyaduma ngezwi lakhe ngokumangalisayo;

wenza izinto ezinkulu esingaziqondi.

₆Ngokuba uthi eqhweni:

‘Khithika emhlabeni;’

kanjalo nasesihlambini semvula,

yebo, ezihlambini zemvula zakhe ezinamandla.

₇Uyanamathelisa izandla zabantu bonke

ukuba bonke abantu bazi imisebenzi yakhe.

₈Seziya izilwane ezikhundleni zazo,

zihlale emihumeni yazo.

₉Isikhwishikhwishi siphuma ekamelweni laso,

namakhaza emimoyeni ehlakazayo.

₁₀Ngokuphefumula kukaNkulunkulu kuvela ungqoqwane,

ububanzi bamanzi buqine.

₁₁Yebo, uyathwesa amafu ngokuswakama;

uyeneka amafu onyazi lwakhe.

₁₂Ayajika, aphenduke njengokunquma kwakhe

ukuba enze konke awayalayo

ebusweni bomhlaba owakhiweyo,

₁₃awafikise abe luswazi,

afike ngenxa yomhlaba

noma ngenxa yomusa.

₁₄“Beka indlebe kulokhu, Jobe;

yima, uqonde izimangaliso zikaNkulunkulu.

₁₅Uyazi yini ukuthi uNkulunkulu uwayala kanjani,

enze ukuba unyazi lwamafu akhe lukhanye na?

₁₆Uyaqonda yini ukulinganiswa kwamafu,

izimangaliso zoPhelele olwazini,

₁₇wena ozingubo zakho zifudumala,

lapho ethulisa umhlaba ngeshisandlu, na?

₁₈Ungeneka isibhakabhaka njengaye,

esiqinile njengesibuko esibunjiweyo, na?

₁₉Sifundise ukuthi siyakuthini kuye;

asinakuhlela indaba yethu ngenxa yobumnyama.

₂₀Uyakutshelwa ukuthi ngiyakhuluma na?

Ukhona yini oshoyo ukuthi makabhubhe na?

₂₁Manje, abantu abanakukubona ukukhanya

okukhazimula esibhakabhakeni,

lapho umoya usudlulile, wasihlanza.

₂₂Ngasenyakatho kuvela inkazimulo yegolide;

uNkulunkulu wembethe ubukhosi obesabekayo.

₂₃USomandla singemqonde;

mkhulu ngamandla nangokwahlulela;

ngokulunga kwakhe okukhulu akoni lutho.

₂₄Ngalokho abantu bayamesaba;

kepha akanaki abazishaya izihlakaniphi ngenhliziyo.”

₁Inhliziyo yenkosi isesandleni sikaJehova njengemifula yamanzi;

uyayiphendulela lapho ethanda khona.

₂Zonke izindlela zomuntu zilungile emehlweni akhe,

kepha uJehova ulinganisa izinhliziyo.

₃Ukwenza ukulunga nokwahlulela

kukhethekile kuJehova kunemihlatshelo.

₄Ukuzidla kwamehlo nokuziqhenya kwenhliziyo,

isibani sababi, kuyisono.

₅Imicabango yokhutheleyo isenzuzweni,

kepha eyabo bonke abaphangisayo isekusweleni kuphela.

₆Ukuthola ingcebo ngolimi lwamanga

kuyize elizulazuliswa,

nezingibe zokufa.

₇Ukuchitha kwababi kuyabaqothula,

ngokuba benqaba ukwenza ukulunga.

₈Indlela yothweswe icala iyinsongensonge,

kepha ohlanzekileyo,

isenzo sakhe silungile.

₉Kungcono ukuhlala egumbini lophahla

kunokuhlala nowesifazane oxabanayo endlini ehlanganyelweyo.

₁₀Umphefumulo womubi ufisa okubi;

umakhelwane wakhe kafumani isisa emehlweni akhe.

₁₁Lapho isideleli sihlawuliswa,

ongenalwazi uyahlakanipha,

nalapho ohlakaniphileyo efundiswa,

uyathola ukwazi.

₁₂Olungileyo uyaqaphela indlu yomubi;

ababi bayachithelwa ebubini.

₁₃Ovala indlebe yakhe ngokukhala kompofu

naye uyakukhala angaphendulwa.

₁₄Isipho ekusithekeni siyadambisa ulaka,

nomvuzo esifubeni ukufutheka okunamandla.

₁₅Kuyintokozo kolungileyo ukwenza ukwahlulela,

kepha kwabenza ukona kuyincithakalo.

₁₆Umuntu oduka endleleni yokuhlakanipha

uyakuphumula ebandleni lezithunzi.

₁₇Othanda injabulo uyakuba mpofu,

nothanda iwayini namafutha kayikuceba.

₁₈Omubi uyihlawulo lolungileyo,

nombuluzayo usesikhundleni sabaqotho.

₁₉Kungcono ukuhlala ezweni lasehlane

kunokuhlala nowesifazane oxabanayo nothethayo.

₂₀Kukhona ingcebo enxanelekayo

namafutha endlini yohlakaniphileyo,

kepha umuntu oyisiwula uyakugwinya.

₂₁Olandela ukulunga nomusa

uyafumana ukuphila, nokulunga, nodumo.

₂₂Ohlakaniphileyo angenyukela emzini wamaqhawe,

awise phansi inqaba ayethembayo wona.

₂₃Ogcina umlomo wakhe nolimi lwakhe

ulonda umphefumulo wakhe ezinsizini.

₂₄Ozidlayo nozigabisayo,

yisideleli igama lakhe,

yena osebenza ngokuziphakamisa okukhulu.

₂₅Isifiso sevila siyalibulala,

ngokuba izandla zalo ziyenqaba ukusebenza.

₂₆Kuyafiswa nokufiswa usuku lonke,

kepha olungileyo uyaphana engancishi.

₂₇Umhlatshelo wababi uyisinengiso;

kakhulu kangakanani uma ulethwa ngomgomo omubi.

₂₈Ufakazi wamanga uyabhujiswa,

kepha umuntu ozwileyo angakhuluma njalo.

₂₉Umuntu omubi uyenza lukhuni ubuso bakhe,

kepha oqotho uyanaka indlela yakhe.

₃₀Akukho ukuhlakanipha,

akukho ukuqonda,

nesiluleko, okungamelana noJehova.

₃₁Ihhashi lilungiselwa usuku lokulwa,

kepha ukusindiswa kungokukaJehova.