To The Word – Day 72

₂Makangange ngokwanga komlomo wakhe!

Ngokuba uthando lwakho lumnandi kunewayini.

₃Amafutha akho anephunga elimnandi;

igama lakho linjengamafutha athululiweyo;

ngalokho izintombi ziyakuthanda.

₄Ngidonse emva kwakho, sigijime;

inkosi isingingenisile emakamelweni ayo.

Siyakujabula, sithokoze ngawe,

sikhulume ngothando lwakho kunewayini.

Kufanele ukuba bakuthande.

₅Ngimnyama, kepha ngimuhle,

madodakazi aseJerusalema,

njengamatende akwaKedari,

njengezilenge zikaSolomoni.

₆Ningangibuki ukuthi ngimnyamana,

ngokuba ilanga lingifusile.

Amadodana kamame angifutha,

angenza umlindizivini,

kepha isivini esingesami angisilindanga.

₇Ngitshele wena othandwa ngumphefumulo wami

ukuthi waluselaphi,

uphumuzaphi umhlambi emini,

ngokuba yini ukuba ngibe njengowesifazane odukileyo

ngasemihlambini yabangane bakho na?

₈Uma ungakwazi

wena muhlekazi phakathi kwabesifazane,

phuma uhambe ezinyathelweni zomhlambi,

waluse amazinyane akho

ngasematendeni abelusi.

₉Ngikufanisa nehhashi lensikazi lezinqola zikaFaro,

sithandwa sami.

₁₀Izihlathi zakho zinhle

kangakanani zinezintambo zobuhlalu,

nentamo yakho ineminaka.

₁₁Siyakukwenzela izintambo zobuhlalu begolide,

namaqhosha esiliva.

₁₂Inkosi isahlezi ngasetafuleni layo

inadi* lami lathaphuka iphunga lalo.

₁₃Othandiweyo wami ungumshuqulu

wemure* kimi,

olele phakathi kwamabele ami.

₁₄Othandiweyo wami uyihlukuzo lezimbali zehena*

ezivinini zase-Eni Gedi.

₁₅Bheka, umuhle, sithandwa sami!

Bheka, umuhle!

Unamehlo amajuba.

₁₆Bheka, umuhle, othandiweyo wami!

Yebo, umnandi, nesilili sethu siluhlaza.

₁₇Imishayo yendlu yethu iyimisedari,*

nemiqhadi iyimisayipuresi.*

₁Ngiyintebe yaseSharoni,

nomnduze wezigodi.

₂Njengomnduze phakathi kwameva,

sinjalo isithandwa sami phakathi kwezintombi.

₃Njengomapula* phakathi kwemithi yasehlathini,

unjalo othandiweyo wami phakathi kwamadodana.

Ngahlala phansi emthunzini wakhe ngokwenama okukhulu,

nesithelo sakhe sasimnandi emlonyeni wami.

₄Ungingenisile endlini yewayini,

nebhanela* lakhe phezu kwami liluthando.

₅Ngiphaseni ngezigaxa zezithelo zomvini ezomileyo,

ngihlumelele ngama-apula,*

ngokuba ngiyafa uthando.

₆Isandla sakhe sokhohlo siphansi kwekhanda lami,

nesokunene siyangigona.

₇Ngiyanifungisa,

madodakazi aseJerusalema,

ngezinsephe nangezindluzelekazi zasendle

ukuba ningalunyakazisi,

ningaluvusi uthando,

lungakavumi.

₈Nanto izwi lothandiweyo wami!

Bheka, uyeza eqa ezintabeni,

etshekula emagqumeni.

₉Othandiweyo wami unjengensephe

noma njengesixhumu sendluzele;

bheka, umi emva kodonga lwakwethu;

uyalunguza emafasiteleni,

ubonakala ngaseheleni.

₁₀Othandiweyo wami wakhuluma, wathi kimi:

“Vuka, sithandwa sami,

muhlekazi wami; woza sihambe,

₁₁ngokuba bheka, ubusika budlulile;

imvula isiphelile, yamuka;

₁₂izimbali ziyabonakala emhlabeni,

nesikhathi sokuthena imivini sesisondele,

nezwi lehobhe liyezwakala ezweni lakithi.

₁₃Umkhiwane uthela amakhiwane awo aluhlaza,

imivini inezimbali,

ithaphuka iphunga layo;

vuka, sithandwa sami,

muhlekazi wami; woza sihambe.”

₁₄Juba lami elisemifantwini yamadwala

nasekusithekeni kweziwa,

mangibone ubuso bakho,

ngizwe izwi lakho,

ngokuba izwi lakho limnandi,

nobuso bakho buhle.

₁₅Sibambeleni izimpungushe,

izimpungushe ezincane

ezichitha izivini,

ngokuba izivini zethu zinezimbali.

₁₆Othandiweyo wami ungowami,

mina ngingowakhe;

uyalusa phakathi kweminduze.

₁₇Kuze kuphole ilanga,

namathunzi abaleke,

mawube njengensephe,

wena othandiweyo wami,

nanjengesixhumu sendluzele

ezintabeni eziqhekezekileyo.

₁Ebusuku embhedeni wami

ngamfuna othandwa ngumphefumulo wami;

ngamfuna, kepha angimtholanga.

₂Ngiyakuvuka, ngihambahambe emzini,

ezitaladini nasezigcawini;

ngiyakufuna othandwa ngumphefumulo wami;

ngamfuna, kepha angimtholanga.

₃Abalindi bangifumana

behambahamba emzini:

“Nimbonile othandwa ngumphefumulo wami na?”

₄Ngangidlule kancane nje kubo;

ngase ngimthola othandwa ngumphefumulo wami;

ngambamba, angivumanga ukuba ahambe,

ngaze ngamngenisa endlini kamame

nasekamelweni lowangikhulisayo.

₅Ngiyanifungisa,

madodakazi aseJerusalema,

ngezinsephe nangezindluzelekazi zasendle

ukuba ningalunyakazisi,

ningaluvusi uthando,

lungakavumi.

₆Ngubani owenyuka ehlane njengezinsika zomusi,

eqhole ngemure* nangenhlaka,

nangawo onke amakha omthengi, na?

₇Bheka, luhlaka lukaSolomoni!

Amaqhawe angamashumi ayisithupha aluzungezile

emaqhaweni akwa-Israyeli.

₈Onke aphethe izinkemba,

afundile ukulwa;

yilowo nalowo muntu unenkemba yakhe okhalweni lwakhe

ngokwesaba ebusuku.

₉Inkosi uSolomoni izenzele uhlaka ngemithi yaseLebanoni.

₁₀Yenza izinsika zalo ngesiliva,

nephansi lalo ngegolide,

nesihlalo salo ngokububende,

ubuphakathi balo bugandaywe ngothando

lwamadodakazi aseJerusalema.

₁₁Phumani nina madodakazi aseJerusalema,

nibone inkosi uSolomoni,

inomqhele eyawuqheliswa ngunina

ngosuku lokugcagca kwayo

nangomhla wokuthokoza kwenhliziyo yayo.

₁Bheka, umuhle, sithandwa sami!

Bheka, umuhle!

Unamehlo amajuba emva kwemvakazi yakho;

izinwele zakho zinjengomhlambi wezimbuzi

owehla entabeni yakwaGileyadi.

₂Amazinyo akho anjengomhlambi wezimvukazi

ezisand' ukugundwa,

ezikhuphuka zigeziwe,

zinamawele zonke,

kungekho neyodwa phakathi kwazo efelweyo.

₃Izindebe zakho zinjengomucu obomvu,

umlomo wakho muhle;

izihlathi zakho zinjengenxenye yepomegranati*

emva kwemvakazi yakho.

₄Intamo yakho injengombhoshongo

kaDavide owakhiwe ngemihlobiso,

okuphanyekwa kuwo amahawu ayinkulungwane,

onke eyizihlangu zamaqhawe.

₅Amabele akho amabili anjengezixhumu ezimbili

ezingamawele ensephe,

ezidla phakathi kweminduze.

₆Lize liphole ilanga

namathunzi abaleke,

ngiyakuya entabeni yemure*

nasegqumeni lenhlaka.

₇Umuhle wonke, sithandwa sami,

akukho sisihla kuwe.

₈Woza umuke nami eLebanoni,

makoti wami,

umuke nami eLebanoni,

wehle esiqongweni sase-Amana,

nasesiqongweni saseSeniri naseHermoni,

simuke emihumeni yezingonyama,

nasezintabeni zezingwe.

₉Ungaphucile inhliziyo yami,

dadewethu, makoti wami;

ungaphucile inhliziyo yami ngelinye

lamehlo akho,

ngomgexo munye wentamo yakho.

₁₀Lumnandi kangakanani uthando lwakho,

dadewethu, makoti wami!

Luhle kangakanani uthando lwakho,

kunewayini,

nephunga lamafutha akho

kunamakha onke!

₁₁Izindebe zakho, makoti wami,

ziyaconsa izinyosi;

uju nobisi kukhona

phansi kolimi lwakho,

nephunga lezambatho zakho

linjengephunga laseLebanoni.

₁₂Uyinsimu ehluthulelweyo,

dadewethu, makoti wami,

umthombo ohluthulelweyo

nesiphethu esibekwe uphawu.

₁₃Amahlumela akho ayihlathi lamapomegranati*

anezithelo ezinqabileyo,

ihena* kanye nenadi,*

₁₄inadi* nesafroni,*

nomhlanga nokinamona,*

kanye nemithi yonke yenhlaka,

nemure* nomhlaba,

nawo onke amakha amahle.

₁₅Siphethu sensimu,

mthombo wamanzi aphilayo,

sifufula saseLebanoni!

₁₆Vuka, moya wasenyakatho,

uze wena Ningizimu,

uphephethe ensimini yami,

ukuze amakha ayo athaphuke;

othandiweyo wami makangene ensimini yakhe,

adle izithelo zayo ezinqabileyo.

₁Sengingenile ensimini yami,

dadewethu, makoti wami;

ngiyabutha imure* lami namakha ami,

ngiyadla amakhekheba ami kanye nezinyosi zami,

ngiyaphuza iwayini lami kanye nobisi lwami.

Yidlani, bangane,

niphuze, nisuthe ngothando.

₂Bengilele,

kepha inhliziyo yami ibiphapheme;

kuyizwi lothandiweyo wami elingqongqotha lithi:

“Ngivulele, dadewethu,

sithandwa sami,

juba lami, opheleleyo wami,

ngokuba ikhanda lami ligcwele amazolo,

nesihluthu sami amaconsi asebusuku.”

₃Ngikhumulile isambatho sami,

ngingasifaka kanjani?

Ngigezile izinyawo zami,

ngingazingcoliselani na?

₄Othandiweyo wayesengenisa isandla sakhe embotsheni,

izibilini zami zamhawukela.

₅Ngavuka ukumvulela othandiweyo wami;

izandla zami zaconsa imure,*

neminwe yami imure elimanzi

phezu kwezibambo zesihluthulelo.

₆Ngamvulela-ke othandiweyo wami,

kepha othandiweyo wami ubephendukile,

wamuka;

umphefumulo wami wawuphela ngokukhuluma kwakhe,

ngamfuna, kepha angamthola;

ngambiza,

kodwa akaphendula.

₇Abalindi bangifumana

behambahamba emzini,

bangishaya, bangilimaza;

abalindi bezingange bangaphuca imvakazi yami.

₈Ngiyanifungisa, madodakazi aseJerusalema,

uma nimfumana othandiweyo wami,

ukuba nimtshele ukuthi ngiyafa uthando.

₉Othandiweyo wakho udlula ngani omunye,

wena muhlekazi phakathi kwabesifazane, na?

Othandiweyo wakho udlula kuphi omunye

ukuba usifungise kanjalo na?

₁₀Othandiweyo wami uyakhazimula ngobumhlophe, ubomvu,

uyabonakala phakathi kwezigidi.

₁₁Ikhanda lakhe liyigolide elihle elicwengekileyo;

isihluthu sakhe sinententezo,

simnyama njengegwababa.

₁₂Amehlo akhe anjengamajuba ngasemifuleni yamanzi,

ageziwe ngobisi ehlezi ngasemifudlaneni egcweleyo.

₁₃Izihlathi zakhe ziyizindima zamakha ezithaphuka iphunga,

nezindebe zakhe ziyiminduze

econsa imure* elimanzi.

₁₄Izingalo zakhe ziyizindilinga zegolide,

okufakwe kuzo amakrisolithe;*

isidumbu sakhe sinjengokwenziwe ngophondo lwendlovu,

sembesiwe ngamasafire.*

₁₅Imilenze yakhe iyizinsika zetshe elimhlophe

ezisekelwe ezinyaweni zegolide elihle;

ukubukeka kwakhe kunjengeLebanoni,

kukhethekile njengemisedari.*

₁₆Umlomo wakhe umnandi,

uyanxaneleka wonke;

yilowo ongothandiweyo wami,

yilowo ongumngane wami,

nina madodakazi aseJerusalema.

₁Othandiweyo wakho uyephi,

wena muhlekazi phakathi kwabesifazane;

ushonephi othandiweyo wakho

ukuba simfune kanye nawe na?

₂Othandiweyo wami wehlele ensimini yakhe,

ezindimeni zamakha,

ukuba aluse ensimini,

akhe iminduze.

₃Mina ngingowothandiweyo wami,

nothandiweyo wami ungowami,

lapho alusa phakathi kweminduze.

₄Umuhle, sithandwa sami, njengeTirisa,

umnandi njengeJerusalema,

kepha wesabeka njengezimpi.

₅Susa amehlo akho kimi,

ngokuba ayangiphaphathekisa;

izinwele zakho zinjengomhlambi wezimbuzi

owehla entabeni yakwaGileyadi.

₆Amazinyo akho anjengomhlambi wezimvukazi

ezikhuphuka zigeziwe,

zinamawele zonke,

kungekho neyodwa phakathi kwazo efelweyo.

₇Izihlathi zakho zinjengenxenye yepomegranati*

emva kwemvakazi yakho.

₈Amakhosikazi angamashumi ayisithupha,

nezancinza zingamashumi ayisishiyagalombili,

nezintombi azinakubalwa.

₉Kepha ijuba lami,

opheleleyo wami munye nje;

ungoyedwa kunina,

ungokhethiweyo wakhe owamzalayo.

Amantombazana ayambona,

athi ubusisiwe;

amakhosikazi nezancinza bayamdumisa.

₁₀Ngubani lo olunguza njengokusa,

emuhle njengenyanga,

ecwebile njengelanga,

kepha esabeka njengezimpi, na?

₁₁Ngehlela ensimini yamantongomane

ukuyobona uhlaza lwesigodi,

nokubona uma imivini iqhakazile,

namapomegranati* uma ekhahlele.

₁₂Ngingakakwazi ukulangazela kwami kwangibeka

enqoleni yabantu benkosana yami.

₁₃Phenduka, phenduka, mShulamiti!

Phenduka, phenduka ukuba sikubuke!

Nibonani kumShulamiti?

Kunjengokusina kwaseMahanayimi.

₁Zinhle kangakanani izinyawo zakho

ezicathulweni zazo,

wena ndodakazi yesikhulu!

Amathanga akho ayizindilinga anjengemihlobiso,

umsebenzi wezandla zengcweti.

₂Inkaba yakho ingumkhele oncweliweyo,

ongasweli iwayini elixutshanisiweyo;

isisu sakho siyinqwaba kakolweni,

ibiyelwe ngeminduze.

₃Amabele akho amabili anjengezixhumu ezimbili

ezingamawele ensephe.

₄Intamo yakho injengoMbhoshongo woPhondo lweNdlovu;

amehlo akho angamachibi aseHeshiboni

ngasesangweni laseBati Rabimi;

impumulo yakho injengombhoshongo waseLebanoni

obhekene neDamaseku.

₅Ikhanda lakho kuwe linjengeKarmeli,

nomyeko wekhanda lakho unjengokububende;

kuboshiwe inkosi ngesiyendane.

₆Umuhle, umnandi kangakanani

wena othandwa ngenjabulo!

₇Isimo sakho siyisundu,

namabele akho omabili anjengamahlukuzo.

₈Ngathi: “Ngiyakukhwela esundwini,

ngibambe amagatsha alo.”

Amabele akho mawabe ngamahlukuzo omvini,

nephunga lokuphefumula kwakho njengama-apula,*

₉nomlomo wakho njengewayini

elihle elihamba lehle kamnandi,

lewuka ngezindebe nangamazinyo.

₁₀Mina ngingowothandiweyo wami,

uyanginxanela.

₁₁Woza wena othandiweyo wami,

siye endle,

silale emizaneni.

₁₂Masivuke ekuseni, siye ezivinini,

sibone uma umvini uqhakazile,

nezimbali zawo uma zivulekile,

namapomegranati* uma ekhahlele.

Lapho ngiyakukunika uthando lwami.

₁₃Amamandragora* athaphuka iphunga,

nangaseminyango yethu

kukhona izinhlobo zonke zezithelo ezinqabileyo,

ezintsha nezindala,

engizibekele wena othandiweyo wami.

₁Sengathi nga unjengomfowethu

owancela amabele kamame!

Uma bengikufumana phandle,

bengiyakukwanga ngingadelelwa muntu.

₂Bengiyakukuhola,

ngikuyise endlini kamame;

ubuyakungifundisa;

bengiyakukuphuzisa iwayini eliyolisiweyo,

amanzi ompomegranati* wami.

₃Isandla sakhe sokhohlo

besiyakubaphansi kwekhanda lami,

nesokunene sakhe besiyakungigona.

₄Ngiyanifungisa,

madodakazi aseJerusalema,

ukuba ningalunyakazisi,

ningaluvusi uthando,

lungakavumi.

₅Ngubani owenyuka ehlane

encike kothandiweyo wakhe na?

Phansi komapula* ngakuvusa;

lapho unyoko wayenemihelo ngawe,

khona lapho wayenemihelo owakuzalayo.

₆Ngifake njengophawu enhliziyweni yakho,

njengophawu engalweni yakho,

ngokuba uthando lunamandla njengokufa;

isikhwele silukhuni njengendawo yabafileyo;

amalangabi alo angamalangabi omlilo,

ilangabi likaJehova.

₇Amanzi amaningi awanakulucima uthando,

nemifula ayinakuluminzisa;

uma umuntu ebeyakunika yonke impahla yendlu yakhe ngothando,

nokho ubeyakwaliwa nokwaliwa.

₈Sinodadewethu omncane,

kanawo amabele;

siyakwenza njani ngodadewethu ecelwa na?

₉Uma elugange,

siyakwakha phezu kwakhe umbhoshongwana wesiliva;

uma eyisicabha,

siyakumvalela ngamapulangwe omsedari.*

₁₀Ngilugange,

namabele ami anjengemibhoshongo;

khona ngaba semehlweni

akhe njengofumene ukuthula.

₁₁USolomoni wayenesivini eBali Hamoni;

wasinika isivini kubaphathi;

baletha, kwaba yilowo nalowo,

izinhlamvu eziyinkulungwane zesiliva ngezithelo zaso.

₁₂Isivini esingesami siphambi kwami;

inkulungwane mayibe ngeyakho, Solomoni,

namakhulu amabili abe ngawabaphathi bezithelo zaso.

₁₃Wena ohlala emasimini,

abangane balalela izwi lakho;

ake ungizwise lona.

₁₄Shesha, othandiweyo wami,

ufane nensephe

nesixhumo sendluzele

ezintabeni zamakha.