To The Word – Day 91

₂Yizwani, mazulu,

ubeke indlebe, mhlaba,

ngokuba uJehova ukhuluma uthi:

“Ngikhulisile ngiphakamisile abantwana,

kepha bangihlubukile.

₃Inkabi iyamazi umniniyo

nembongolo umkhombe womnikaziyo;

u-Israyeli akazi,

isizwe sami asiqondi.”

₄Hawu, sizwe esonayo,

bantu abasindwe ngububi,

nzalo yababi,

bantwana abonakeleyo!

Bamshiyile uJehova,

bamdelele oNgcwele ka-Israyeli,

babuyele emuva.

₅Ningabe nisashaywa kuphi,

nisaqhubeka ukwambuka, na?

Lonke ikhanda liyagula,

nayo yonke inhliziyo ibuthakathaka.

₆Kusukela ematheni onyawo kuze kube sekhanda

akukho okuphelele, ngamanxeba nje,

nemivimbo, nemidwa emisha;

akukhanywanga ubovu, akuboshwanga,

akuthanjiswanga ngamafutha.

₇Izwe lakini liyihlane,

imizi yenu ishisiwe ngomlilo,

umhlabathi wenu udliwa ngabafokazi phambi kwenu,

kuyihlane njengokuchitha kwabafokazi.

₈Indodakazi yaseSiyoni isele njengexhiba esivinini,

nanjengedladla ensimini yamaselwa,

nanjengomuzi ovinjezelweyo.

₉Uma uJehova Sebawoti ebengasishiyelanga insali,

besiyakuba njengeSodoma,

sifane neGomora.

₁₀Yizwani izwi likaJehova

nina babusi baseSodoma,

nibeke indlebe ekufundiseni kukaNkulunkulu wethu

nina bantu baseGomora.

₁₁“Iyini kimi imihlatshelo yenu eminingi na?”

usho uJehova;

“ngisuthile ngeminikelo yokushiswa yezinqama

nangeyamanoni amathole akhuluphalisiweyo;

negazi lezinkunzi nelamawundlu nelezimpongo

angithokozi ngalo.

₁₂Lapho nifika ukubona ubuso bami,

ngubani okubize lokhu esandleni senu

ukuba ninyathele amagceke ami na?

₁₃Ningabe nisaletha iminikelo eyize yempuphu;

impepho iyisinengiso kimi;

ezokwethwasa kwenyanga namasabatha nokubiza imihlangano

angivumi ububi kanye nemikhosi.

₁₄Ezokwethwasa zenu kwenyanga nemikhosi yenu emisiweyo

kuyazondwa ngumphefumulo wami;

kungumthwalo phezu kwami,

ngikhathele ngukukuthwala.

₁₅Lapho nelula izandla zenu,

ngiyakufihla kini amehlo ami;

yebo, lapho nenza imikhuleko eminingi, angiyikuzwa;

izandla zenu zigcwele igazi.

₁₆Gezani, nihlanzeke,

nisuse ububi bezenzo zenu phambi kwamehlo ami,

niyeke ukwenza okubi.

₁₇Fundani ukwenza okuhle,

nifune ukwahlulela,

niqondise abacindezeli,

nahlulele izintandane,

nimele umfelokazi.

₁₈“Wozani-ke, sithethe indaba,”

usho uJehova;

“noma izono zenu zibomvu kakhulu,

ziyakuba mhlophe njengeqhwa;

noma zibomvu njengokububende,

ziyakuba njengoboya bezimvu.

₁₉Uma nivuma, nilalela,

niyakudla okuhle kwezwe;

₂₀kepha uma nala, nihlubuka,

niyakudliwa yinkemba,”

ngokuba umlomo kaJehova ukhulumile.

₂₁Yeka umuzi othembekileyo waphenduka,

waba yisifebe,

wena owawugcwele ukwahlulela!

Ukulunga kwakuhlezi khona,

kepha manje ababulali.

₂₂Isiliva lakho seliphendukile amanyela;

iwayini lakho lixubene namanzi.

₂₃Izikhulu zakho ziyizihlubuki

nabangane bamasela;

bonke bathanda izipho, balandela imivuzo;

abahluleli izintandane,

nendaba yomfelokazi ayifinyeleli kubo.

₂₄Ngalokho ithi iNkosi uJehova Sebawoti,

uMninimandla ka-Israyeli:

“E, ngiyakuzikhulula kwabamelene nami,

ngiziphindisele ezitheni zami,

₂₅ngibuyisele isandla sami kuwe,

ngicwengisise impela amanyela akho,

ngisuse lonke ithini* lakho,

₂₆ngibuyisele abahluleli bakho njengakuqala,

nabeluleki bakho njengasekuqaleni,

andukuba ubizwe ngokuthi uMuzi Wokulunga,

uMuzi Othembekileyo.”

₂₇ISiyoni liyakuhlengwa ngokwahlulela

nabaphendukayo kulo ngokulunga.

₂₈Izihlubuki nezoni ziyakubhujiswa kanyekanye,

nabamshiyayo uJehova bayakuqedwa.

₂₉“Yebo, bayakuba namahloni ngama-oki* enawanxanelayo,

niyangaze ngamasimu enawakhethayo.

₃₀Ngokuba niyakuba njenge-oki*

elimaqabunga alo abunile,

nanjengensimu engenamanzi.

₃₁Abanamandla bayakuba njengefilakisi,*

nemisebenzi yabo njengenhlansi;

bayakusha bobabili kanyekanye,

akuyikubakho ocimayo.”

₂Kuyakuthi ngezinsuku ezizayo

intaba yendlu kaJehova iqiniswe esiqongweni sezintaba,

iphakame kunamagquma,

nezizwe zonke ziyakugobhozela khona.

₃Abantu abaningi bayakuhamba, bathi:

“Wozani sikhuphukele entabeni kaJehova

endlini kaNkulunkulu kaJakobe;

uyakusifundisa izindlela zakhe,

sihambe emikhondweni yakhe,”

ngokuba umthetho uyakuvela eSiyoni,

nezwi likaJehova eJerusalema.

₄Uyakwahlulela phakathi kwezizwe,

anqume phakathi kwabantu abaningi;

bayakukhanda izinkemba zabo zibe ngamakhuba,

nemikhonto yabo ibe ngocelemba;

isizwe asiyikuphakamisela isizwe inkemba,

zingabe zisafunda ukulwa.

₅Wena ndlu kaJakobe,

woza sihambe ekukhanyeni kukaJehova.

₆Ngokuba ushiyile abantu bakho,

indlu kaJakobe,

lokhu begcwele ezasempumalanga,

behlola imihlola njengamaFilisti,

bexhawulana nabantwana babezizwe.

₇Izwe lakubo ligcwele isiliva negolide,

akukho ukuphela kwengcebo yabo;

izwe lakubo ligcwele futhi namahhashi,

nokuphela kwezinqola akukho.

₈Izwe lakubo ligcwele futhi nezithombe;

bakhuleka kokwenziwe yizandla zabo

nakwekwenzileyo iminwe yabo.

₉Kepha abantu bayakufoliswa,

namadoda ayakuthotshiswa;

abayikuthethelelwa.

₁₀Ngena edwaleni, ucashe othulini

ngokwesabeka kukaJehova nangodumo lobukhosi bakhe.

₁₁Amehlo omuntu aziphakamisileyo ayakuthotshiswa,

nokuzikhukhumeza kwamadoda kuyakufola,

kuphakame uJehova kuphela ngalolo suku.

₁₂Ngokuba uJehova Sebawoti unosuku oluyakuba

phezu kwakho konke okuzidlayo nokuzikhukhumezayo,

naphezu kwakho konke okuphakemeyo, kuthotshiswe,

₁₃naphezu kwayo yonke imisedari* yaseLebanoni,

emide nephakemeyo,

naphezu kwawo onke ama-oki* aseBashani,

₁₄naphezu kwazo zonke izintaba ezinde,

naphezu kwawo onke amagquma aphakemeyo,

₁₅naphezu kwayo yonke imibhoshongo ephakemeyo,

naphezu kwazo zonke izingange eziqinisiweyo,

₁₆naphezu kwayo yonke imikhumbi yaseTharishishi,

naphezu kwayo yonke imikhunjana enxanelekayo.

₁₇Ukuzikhukhumeza kwabantu kuyakufoliswa,

nokuziphakamisa kwamadoda kuyakuthotshiswa,

kuphakame uJehova kuphela ngalolo suku,

₁₈ziphele izithombe, zithi nya.

₁₉Bayakungena emihumeni yamadwala nasemigodini yomhlaba

ngokwesabeka kukaJehova nangodumo lobukhosi bakhe,

lapho evuka ukushaya umhlaba ngovalo.

₂₀Ngalolo suku abantu bayakulahla kuwo

amavukuzi nakuwo amalulwane

izithombe zabo zesiliva

nezithombe zabo zegolide,

abazenzele zona ukuba bakhuleke kuzo,

₂₁ukuze bangene emihumeni yamadwala

nasemifantwini yeziwa

ngokwesabeka kukaJehova

nangodumo lobukhosi bakhe,

lapho evuka ukushaya umhlaba ngovalo.

₂₂Bayekeni abantu okusemakhaleni abo kukhona ukuphefumula nje,

ngokuba babalwa njengantoni na?

₁Ngokuba bheka, iNkosi uJehova Sebawoti

iyasusa eJerusalema nakwaJuda uzime nodondolo,

lonke uzime lwesinkwa

nalo lonke uzime lwamanzi:

₂amaqhawe namadoda empi,

abahluleli nabaprofethi,

ababhuli namalunga,

₃izinduna zamashumi ayisihlanu nabantu abanodumo,

abeluleki nezingcweti ezihlakaniphileyo,

nabanolwazi lokulumba.

₄Ngiyakubanika abafana babe yizikhulu zabo,

nezingane ziyakubabusa.

₅Abantu bayakucindezelana,

kube yilowo nalowo,

yebo, yilowo nalowo nomakhelwane wakhe;

abantwana bayakubhensela abadala,

nabadelelekileyo abanodumo.

₆Lapho umuntu eyakubamba umfowabo

endlini kayise ethi:

“Wena unengubo,

yiba ngumbusi wethu,

le ncithakalo ibe phansi kwesandla sakho,”

₇ngalona lolo suku uyakudazuluka athi:

“Angiyikuba ngumelaphi,

ngokuba endlini yami akukho sinkwa,

akukho ngubo;

ningangibeki umbusi wabantu.”

₈Ngokuba iJerusalema likhubekile,

noJuda uwile,

lokhu izilimi zabo nezenzo zabo ziphambene noJehova

ukucunula amehlo enkazimulo yakhe.

₉Ukukhetha kwabo ubuso kuyafakaza ngabo;

benza izono zabo obala njengeSodoma, abazifihli.

Maye kuyo imiphefumulo yabo!

Ngokuba bazenzele okubi.

₁₀Yishoni kolungileyo ukuthi kuyakuba kuhle kuye,

ngokuba bayakudla izithelo zezenzo zabo.

₁₁Maye komubi! Kuyakuba kubi kuye,

ngokuba uyakubuyiselwa izenzo zezandla zakhe.

₁₂Abantu bami-ke izingane ziyabacindezela,

nabesifazane bayababusa.

O bantu bami,

abaniholayo bayanidukisa;

bachitha indlela yemikhondo yakho.

₁₃UJehova usesukumile ukuyokulwa,

umi ukuthetha amacala ezizwe.

₁₄UJehova uyakungena ekwahluleleni

namalunga abantu bakhe nezikhulu zabo ngokuthi:

“Yinina eniqedile isivini,

impango yabampofu isezindlini zenu.

₁₅Nichobozeleni abantu bami,

nigaye ubuso babampofu, na?”

isho iNkosi uJehova Sebawoti.

“Ngenxa yokuba amadodakazi aseSiyoni eziphakamisa,

ehamba elula izintamo,

eqhikiza amehlo,

ehamba ecokama ekuhambeni kwawo,

ekhenceza ngezinyawo zawo,

₁₇ngalokho iNkosi iyakuzenza izimpandla

izinkakhayi zamadodakazi aseSiyoni,

uJehova awanqunise.”

₂₄Kuyakuthi esikhundleni samakha kube ngukubola,

nasesikhundleni sebhande* igoda,

nasesikhundleni sezinwele ezilungisiweyo impandla,

nasesikhundleni sesidiya isibhamba sendwangu yamasaka,

nasesikhundleni sobuhle isishada.

₂₅Amadoda akho ayakuwa ngenkemba

namaqhawe akho ngokulwa.

₂₆Amasango alo ayakukhala, alile;

liyakuba yize, lihlale emhlabathini.

₁Mangihlabelele ngothandiweyo wami,

isihlabelelo sothandiweyo wami ngesivini sakhe.

Othandiweyo wami

wayenesivini egqumeni elivundile kakhulu;

₂wasimba, wakhipha amatshe aso,

wasitshala ngomvini omuhle,

wakha isiqongo sokulinda phakathi kwaso,

waqopha isikhamo kuso,

wethemba ukuthi siyakuthela izithelo zomvini,

kepha saveza izithelo zasendle.

₃“Manje nina enakhileyo eJerusalema namadoda akwaJuda,

ake nahlulele phakathi kwami nesivini sami.

₄Nga kwenziwani futhi esivinini sami engingakwenzanga kuso na?

Kungani ukuba lapho ngithembe ukuthi siyakuthela izithelo zomvini,

saveza izithelo zasendle, na?

₅Sengiyakunitshela engiyakukwenza kuso isivini sami:

ngiyakususa uthango lwaso, ukuze sidliwe,

ngidilize ugange lwaso,

ukuze sinyathelwe.

₆Ngiyakusenza sibe yincithakalo;

asiyikuthenwa, asiyikulinywa,

kepha kuyakuvela amakhakhasi nameva;

futhi ngiyakuyala amafu ukuba anganisi imvula phezu kwaso.”

₇Ngokuba isivini sikaJehova Sebawoti siyindlu ka-Israyeli,

namadoda akwaJuda ayisithombo sakhe esithandekayo;

wabheka ukwahlulela, kepha bheka, ngukucindezela,

yebo, ukulunga, kepha bheka, ngukukhala.

₈Wo kubona abahlanganisa indlu nendlu,

besondeza insimu nensimu,

kuze kungabe kusaba khona indawo,

kwakhe nina nodwa emhlabeni!

“Impela izindlu eziningi ziyakuba yincithakalo,

nezinkulu nezinhle zingabi namuntu ohlala kuzo.

₁₀Ngokuba ama-eka* ayishumi esivini

ayakuthela ibhati* elilodwa,

nehomere* lembewu liyakuthela i-efa* nje.”

₁₁Wo kubona abavuka ekuseni,

ukuze balandele uphuzo olunamandla,

balibale kuze kuhlwe,

bashe iwayini!

₁₂Ihabu* nogubhu, isigubhu negenkle,

newayini

kukhona emadilini abo,

kepha abanakekeli imisebenzi kaJehova,

nezenzo zezandla zakhe abaziboni.

₁₃Ngalokho abantu bami bayathunjwa bengazi,

nabadumileyo babo bayalamba,

nezixuku zabo zigangathekile ngokoma.

₁₄Ngalokho indawo yabafileyo yandisile isifiso sayo,

yavula umlomo wayo ngokungalinganiswayo;

kwehlela kuyo amakhosi abo, nesixuku sabo esixokozelayo,

kanye nabajabulayo phakathi kwabo.

₁₅Abantu bayafoliswa,

namadoda ayathotshiswa,

namehlo abaziphakamisayo ayathotshiswa,

₁₆kepha uJehova Sebawoti uphakeme ekwahluleleni,

uNkulunkulu oNgcwele ungcwelisiwe ngokulunga.

₁₇Amawundlu ayakuklaba njengasemadlelweni awo,

nasezincithakalweni zabacebileyo kuyakuklaba amazinyane.

₁₈Wo kubona abadonsa ukona ngezintambo zamanga,

nezono kungathi ngamagoda ezinqola,

₁₉abasho ukuthi: “Makaphuthume,

asheshise umsebenzi wakhe ukuba siwubone,

kusondele isiluleko soNgcwele ka-Israyeli,

sifike ukuba sisazi!”

₂₀Wo kubona abasho okubi ukuthi kungokuhle,

nokuhle ukuthi kungububi,

ababeka ubumnyama bube ngukukhanya,

nokukhanya kube ngubumnyama,

babeke nokubabayo kube ngubumtoti,

nobumtoti bube ngokubabayo!

₂₁Wo kubona abahlakaniphile emehlweni abo

nabaqondile ekuboneni kwabo!

₂₂Wo kubona abangamaqhawe ngokuphuza iwayini

namadoda anamandla ngokuxubanisa uphuzo olunamandla,

₂₃abathetha ababi ngenxa yemivuzo,

basuse ukulunga kwabalungileyo!

₂₄Ngalokho njengolimi lomlilo ludla amabibi,

nezikhotha ezomileyo zizika elangabini,

impande yabo iyakuba njengokubola,

nembali yabo iyakuthuquka njengebhuqu,

ngokuba balahlile umthetho kaJehova Sebawoti,

balidelela izwi loNgcwele ka-Israyeli.

₂₅Ngalokho intukuthelo kaJehova iyavuthela isizwe sakhe;

welulela isandla sakhe kuso, uyasishaya;

izintaba ziyathuthumela,

nezidumbu zabo ziyimfucumfucu

phakathi ezitaladini;

kukho konke lokhu intukuthelo yakhe ayibuyi,

isandla sakhe siseluliwe.

₂₆Uyakuphakamisela isizwe esikude ibhandela,*

asihlabele ikhwelo ekugcineni komhlaba;

bheka, uyeza masinyane ngejubane.

₂₇Akakho oyakukhathala,

akhubeke kuso;

akakho oyakozela, alale;

ibhande* lezinkalo zabo aliyikuthukuluka,

nomchilo wezicathulo zabo awuyikugqabuka,

₂₈bona abamicibisholo yabo ibukhali,

nayo yonke iminsalo yabo insaliwe;

izinyawo zamahhashi abo ziyakubalwa njengensengetsha,

namasondo abo njengesivunguvungu.

₂₉Ukubhonga kwabo kunjengokwengonyamakazi,

bayakubhonga njengamabhongo ebhubesi,

yebo, bayakugwavuma,

babambe impango yabo,

bamuke nayo, kungekho oyophulayo.

₃₀Bayakugwavuma phezu kwabo ngalolo suku

njengokuduma kolwandle;

uma umuntu ebuka umhlaba,

bheka, naso isigayegaye sobumnyama,

nokukhanya kwenziwe mnyama ngamafu awo.

₁Haleluya!

Dumisani uJehova ezulwini,

nimdumise kweliphezulu.

₂Mdumiseni nina zingelosi zakhe zonke,

nimdumise nina mabandla akhe onke.

₃Mdumiseni nina langa nenyanga,

nimdumise nina zinkanyezi zonke ezikhanyayo.

₄Mdumiseni nina mazulu amazulu,

nina manzi aphezu kwezulu.

₅Makuthathe kudumise igama likaJehova,

ngokuba wayaleza, kwadaleka.

₆Futhi wakumisa kuze kube phakade;

washaya umthetho ongenakweqiwa.

₇Mdumiseni uJehova emhlabeni

nina mikhomo nezintwa zonke,

₈nawe mlilo nesichotho,

liqhwa nenkwezane,

nawe siphepho esenza okwezwi lakhe,

₉nani zintaba namagquma onke,

nani mithi ethelayo nayo yonke imisedari,*

₁₀nani zilwane nezinkomo zonke,

nani eninwabuzelayo nezinyoni ezindizayo,

₁₁nani makhosi omhlaba nabantu bonke,

nani zikhulu nabahluleli bonke bomhlaba,

₁₂nani zinsizwa nezintombi,

nani maxhegu nabafana.

₁₃Mabadumise igama likaJehova,

ngokuba ngelakhe igama lodwa eliphakeme;

inkazimulo yakhe iphezu komhlaba nezulu.

₁₄Usephakamisile uphondo lwabantu bakhe;

ngalokho bayamdumisa abangcwele bakhe,

abantwana bakwa-Israyeli,

abantu abaseduze naye.

Haleluya!

“Wayiswa ekuhlatshweni njengemvu;

njengewundlu elithule phambi komgundi walo

kanjalo kawuvulanga umlomo wakhe.

₃₃Ekuthobeleni kwakhe

ukwahlulelwa kwakhe kwasuswa.

Ngubani ongalanda ngesizukulwane sakhe na?

Ngokuba ukuphila kwakhe kuyasuswa emhlabeni.”