To The Word – Day 98

₁Wo kuwe Ariyeli,* Ariyeli,

umuzi lapho amisa khona uDavide.

Yengezelani umnyaka emnyakeni,

imikhosi iyingilize,

₂ngize ngilicindezele i-Ariyeli,*

kube khona ukukhala nokububula,

libe njenge-Ariyeli kimi.

₃Ngiyakumisa, ngikuhaqe nxazonke zakho,

ngikuvimbezele ngezinqaba,

ngikumisele izindonga.

₄Uyakubhidlizelwa phansi,

ukhulume usemhlabathini;

ukukhuluma kwakho kuyakuthotshiselwa phansi,

kuphume othulini,

izwi lakho libe njengelonedlozi livela emhlabathini,

ukukhuluma kwakho kubethe imilozi othulini.

₅Kodwa isixuku sezitha zakho

siyakuba njengebhuqu elicolekileyo,

noquqaba lwabacindezeli njengamakhoba adlulayo,

yebo, kuyakwenzakala ngokuzumayo ngokuphazima kweso.

₆Uyakuhanjelwa nguJehova Sebawoti ngokuduma nangokuzamazama,

nangomsindo omkhulu, nangesivunguvungu, nangesiphepho,

nangelangabi lomlilo oqothulayo.

₇Isixuku sezizwe zonke ezisukela i-Ariyeli,*

ezisukela lona kanye nenqaba yalo, nezilicindezelayo,

siyakuba njengephupho nombono wasebusuku.

₈Kuyakuba njengolambileyo ephupha ukuthi uyadla,

kepha evuka usenephango,

noma njengowomileyo ephupha ukuthi uyaphuza,

kepha evuka uyethile, womile;

siyakuba njalo isixuku sezizwe zonke

ezisukela intaba yaseSiyoni.

₉Zimangaliseni, nimangale;

ziphuphuthiseni, niphuphutheke;

badakiwe, kepha kungengewayini,

bayatengezela, kodwa kungengaphuzo olunamandla.

₁₀Ngokuba uJehova uthulule phezu kwenu

umoya wobuthongo obunzima;

uwavalile amehlo enu,

usibekele abaprofethi benu nezinhloko zenu ababoni.

“Ngenxa yokuba laba bantu besondela,

bangidumise ngemilomo yabo nangezindebe zabo,

kodwa bazidedisele kude nami izinhliziyo zabo,

nokungesaba kwabo kungumyalo wabantu abawufundisiweyo nje,

₁₄ngalokho ngiyakubuye

ngenzele laba bantu izenzo ezimangalisayo,

izimangaliso impela;

ukuhlakanipha kwabahlakaniphileyo babo kuyakuphela,

nokuqonda kwabaqondileyo babo kuyakusitheka.”

₁₅Wo kubona abajula ukuba basithezele uJehova isu labo,

abamisebenzi yabo isebumnyameni,

nabasho ukuthi: “Ngubani osibonayo,

ngubani osaziyo, na?”

₁₆O ukuphendukezela kwenu!

Ibumba liyakulinganiswa nombumbi yini,

ukuze okwenziweyo kusho ngokwenzileyo ukuthi:

“Yena akangenzanga,” na?

noma okubunjiweyo kusho ngokubumbileyo ukuthi:

“Akanakuqonda,” na?

₁₇Akuseyisikhashana nje

iLebanoni lize liphenduke insimu,

nensimu ithiwe ihlathi, na?

₁₈Ngalolo suku izithulu ziyakuzwa amazwi encwadi,

namehlo ezimpumputhe ayakubona,

engasenakufiphala ngesigayegaye nabumnyama.

₁₉Abathobekileyo bayakwandisa intokozo yabo kuJehova,

nabampofu kubantu bayakujabula koNgcwele ka-Israyeli.

₂₀Ngokuba umcindezeli akasayikuba khona,

nesideleli siyakube singasekho,

nabo bonke abazulumba ububi bayakube beqothuliwe,

₂₁ababemtholisa umuntu icala ngezwi nje,

bambekela ugibe yena owathetha amacala esangweni,

bachezukisa olungileyo ngento engelutho.

“UJakobe akasayikuba namahloni,

nobuso bakhe abusayikuphaphatheka.

₂₃Ngokuba lapho ebona abantwana bakhe,

umsebenzi wezandla zami phakathi kwakhe,

bayakungcwelisa igama lami,

yebo, bayakungcwelisa oNgcwele kaJakobe,

bamesabe uNkulunkulu ka-Israyeli.

₂₄Abaduka emoyeni bayakwazi, baqonde,

nabakhononayo bayakufunda, bakwamukele.”

₁“Wo kubantwana abahlubukileyo,” usho uJehova,

“abenza iziluleko,

kungengezami nokho,

nabenza isivumelwano,

kungengesomoya wami kodwa,

ukuze bengeze isono esonweni,

₂abahamba ukuba behlele eGibithe,

bengacelanga emlonyeni wami,

baziqinise emandleni kaFaro,

baphephele emthunzini waseGibithe!

₃Ngalokho amandla kaFaro

ayakuba ngamahloni kini,

ukuphephela kwenu emthunzini waseGibithe

kube ngukudumala kini.

₄Ngokuba noma izikhulu zakhe ziseSowani,

nezithunywa zakhe zifinyelela eHanesi,

₅bonke bayakuba namahloni ngabantu abangenakubasiza,

abangenansizakalo nanzuzo,

kepha bengamahloni nehlazo kuphela.”

Badabula izwe losizi nelokuhlupheka,

lapha kuvela khona ibhubesi nebhubesikazi,

ibululu nenyoka endizayo,

bethwala imfuyo yabo emihlane yezimbongolo

nengcebo yabo phezu kwamalunda amakamela

bakuyise kubantu abangenansizakalo.

₇IGibithe lisiza ngeze nangento engelutho;

ngalokho ngilibize ngokuthi iRahabi elihlezi lithule.

₈Manje hamba ukulobe phambi kwabo esibhebheni,

ukubhale encwadini

ukuba kube ngubufakazi besikhathi esizayo

kuze kube phakade.

₉Bangabantwana abahlubukileyo,

abantwana abaqamba amanga,

abantwana abangathandi ukuzwa umthetho kaJehova,

₁₀abathi kubaboni: “Ningabe nisabona,”

nakubaprofethi: “Ningasiprofetheli okuqinisileyo,

kepha khulumani kithina okuthophayo,

niprofethe inkohliso;

₁₁phambukani endleleni,

nichezuke emkhondweni,

nimdedisele kithi oNgcwele ka-Israyeli.”

“Njengokuba nilidelela leli zwi,

nethemba kukho ukucindezela nakukho okuphambeneyo,

nencike kukho,

₁₃ngalokho lobu bubi

buyakuba njengokomfantu lapho sekuzakuwa,

kuvokomele ogangeni oluphakemeyo,

ukudilika kwalo kufike ngokuzumayo ngokuphazima kweso.

₁₄Luyabhidlizwa njengokuphahlazwa kwesitsha sombumbi,

esichotshozwa singahawukelwa,

kungabe kusatholakala phakathi kwezihlephu

nodengezi lokuthatha umlilo eziko,

nolokucakula amanzi emgodini.”

“Niyakusindiswa ngokuphenduka nangokuphumula,

amandla enu abe ngukuthula nangokwethemba;

kepha anithandanga.

₁₆Kodwa nasho nathi: ‘Qha, siyakubaleka ngamahhashi,’

ngalokho niyakubaleka:

‘Sikhwele anejubane,’

ngalokho abanixoshayo bayakuba nejubane.

₁₇Inkulungwane iyakubaleka ngokusongela koyedwa;

ngokusongela kwaba yisihlanu niyakubaleka,

nize nishiywe njengensika esiqongweni sentaba

nanjengebhanela* phezu kwegquma.”

₁₈Ngalokho uJehova uyakulindela

ukuba abe nomusa kini;

nangalokhu uyakuphakama ukuba abe nesihe kini,

ngokuba uJehova unguNkulunkulu wokwahlulela;

babusisiwe bonke abamhlalelayo.

₂₇Bheka, igama likaJehova livela kude,

livutha ngolaka lwakhe,

linzima ngamafu;

izindebe zakhe zigcwele intukuthelo,

nolimi lwakhe lunjengomlilo oqothulayo;

₂₈ukuphefumula kwakhe kunjengomfula okhukhulayo,

uze ufinyelele entanyeni,

ukuhlunga izizwe ngesihlungo sokubhubhisa;

itomu elidukisayo liyakuba semihlathini yezizwe.

₂₉Niyakuhlabelela njengasebusuku

lapho kugujwa umkhosi,

nithokoze ngenhliziyo njengalokhu kuhanjwa ngemitshingo

kuyiwe entabeni kaJehova kulo iDwala lika-Israyeli.

₃₀UJehova uyakulizwakalisa izwi lakhe elidumileyo,

abonakalise ukwehla kwengalo yakhe

ngokuvutha kolaka lwakhe,

nangelangabi lomlilo oqothulayo,

ngesivunguvungu, nangesiphepho, nangesichotho.

₃₁Ngokuba ngezwi likaJehova i-Asiriya

liyakushaywa luvalo,

lapho elishaya ngenduku.

₃₂Kuyakuthi njalo lapho induku enqunyiweyo idlula,

uJehova ayibeka phezu kwalo,

kube ngezigubhu nangamahabhu,*

alwe nalo ngengalo enikiniweyo.

₃₃Indawo yokushisela kade yahlelwa,

yebo, yalungiselwa nenkosi;

uyenze yajula, yaba banzi;

igoqo layo lingumlilo nezinkuni eziningi,

nokuphefumula kukaJehova kunjengomfula wesibabule;

kuyayokhela.

₁Wo kubona abehlela eGibithe

ukuba basizwe khona,

bencike emahhashini, bethemba ezinqoleni,

ngokuba ziningi,

nakubo abamahhashi,

ngokuba benamandla;

kepha ababheki koNgcwele ka-Israyeli,

noJehova abamfuni.

₂Nokho naye uhlakaniphile,

uyakuletha okubi;

akayikubuyisa amazwi akhe,

kepha uyakuvukela indlu yababi

nosizo lwabenza okubi.

₃AbaseGibithe bangabantu,

abasiye uNkulunkulu,

amahhashi abo ayinyama,

awasiwo umoya,

nalapho uJehova eyakwelula isandla sakhe

uyakukhubeka naye osizayo,

kuwe naye osizwayo,

baphele bonke kanyekanye.

“Njengengonyama ebhongayo,

ibhongo lengonyama phezu kwempango yalo,

lapho abelusi abaningi belibizelwe,

aliyikwesaba izwi labo,

lingazithobi ngomsindo wabo,

kanjalo uJehova Sebawoti uyakwehla

ukuba alwe entabeni yaseSiyoni nasegqumeni layo.

₅Njengezinyoni ezindizayo

kanjalo uJehova, uJehova Sebawoti,

uyakulivikela iJerusalema;

uyakulivikela, alophule,

alidlule, alikhulule.”

₈“I-Asiriya liyakuwa ngenkemba,

kungengamuntu,

nenkemba engesiyo eyomuntu iyakuliqeda;

liyakubalekela usiko lwenkemba,

kepha izinsizwa zalo ziyakuba yizinceku zempoqo.

₉Idwala lakhe liyakunyamalala ngovalo,

nezikhulu zalo ziyakuphela amandla ngebhanela,”*

usho uJehova omlilo wakhe useSiyoni,

nosithando sakhe siseJerusalema.

₁Bheka, kuyakuba khona inkosi ebusa ngokulunga,

izikhulu zibuse ngokwahlulela.

₂Umuntu uyakuba yindawo yokucashela umoya

nesivikelo esivunguvungwini

njengemifula yamanzi endaweni eyomileyo,

njengomthunzi wedwala ezweni eliyethileyo.

₃Amehlo ababonayo awayikuphuphutheka;

izindlebe zabezwayo ziyakulalela.

₄Inhliziyo yephulukundlu iyakuqonda,

ize ikwazi,

nolimi lwezingingingi luyakushesha lukhulume kahle.

₅Isiwula asisayikubizwa ngokuthi sihloniphekile,

nomkhohlisi akasayikuthiwa inkosi.

₆Ngokuba isiwula siyakukhuluma ubuwula,

nenhliziyo yaso iyakusebenza ububi,

yenze ukungamesabi uNkulunkulu,

ikhulume okuphambene noNkulunkulu,

yenze ukuba olambileyo abe nephango,

nowomileyo ukuba aswele uphuzo lwakhe.

₇Izikhali zomkhohlisi zimbi;

uhlela amacebo amabi,

ukuze achithe izihlupheki ngamazwi amanga,

nalapho ompofu ekhuluma ngokufaneleyo.

₈Onesizotha uceba okuzothileyo,

nangokuzotha kwakhe uyakuma.

₉Vukani nina besifazane abazinzileyo,

nizwe izwi lami;

nina madodakazi azethembayo

nibeke indlebe ekukhulumeni kwami.

₁₀Ezinsukwini ezidlula umnyaka niyakuhlushwa

nina besifazane abazethembayo,

ngokuba ukuvuna kwemivini kuyakuphela,

nokubutha akuyikufika.

₁₁Qhaqhazelani nina besifazane abazinzileyo,

nihlupheke nina enizethembayo;

khumulani nizenze nqunu,

nibhince indwangu yamasaka ezinkalweni zenu.

₁₂Zishayeni esifubeni

ngenxa yamasimu amahle nemivini ethelayo.

₁₃Emhlabathini wabantu bami

kuyakumila amakhakhasi nameva,

yebo, kuzo zonke izindlu zokujabula emzini ojabulayo,

₁₄ngokuba izindlu zamakhosi zilahliwe,

nomuzi onabantu abaningi ushiyiwe;

igquma nombhoshongo kuyakuba yimihume kuze kube phakade,

nenjabulo yezimbongolo zasendle,

nedlelo lemihlambi,

₁₅uMoya aze athululwe phezu kwethu evela phezulu,

nehlane liphenduke insimu,

nensimu ithiwe ihlathi.

₁₆Ukwahlulela kuyakwakha ehlane,

ukulunga kuhlale ensimini.

₁₇Umsebenzi wokulunga uyakuba ngukuthula,

impumelelo yokulunga ibe ngukulondeka kuze kube phakade.

₁₈Abantu bami bayakuhlala ematendeni okuthula,

nasezindlini ezilondekayo,

nasezindaweni zokuphumula ezinokuthula.

₁₉Liyakuwisa isichotho, lize liwe ihlathi,

nomuzi uyakuthotshiswa nokuthotshiswa.

₂₀Nibusisiwe nina enitshala ngasemanzini onke;

nikhulula izinyawo zezinkabi nezezimbongolo.

“ ‘Uyakuyaleza izingelosi zakhe ngawe,

zikuthwale ngezandla,

ungaze waqhuzuka etsheni ngonyawo lwakho.’ ”

₁₅“Izwe lakwaZabuloni nezwe lakwaNafetali

ngaselwandle ngaphesheya kweJordani,

iGalile labezizwe,

₁₆isizwe esasihlezi ebumnyameni

sibonile ukukhanya okukhulu,

nababehlezi ezweni nasethunzini lokufa

kuphumele kubo ukukhanya.”