Psalms 16

Beskerm my, o God,

want by U skuil ek.

₂Ek het vir die Here gesê:

“U is my Heer;

buiten U is daar vir my niks goeds nie.”

₃Wat die heiliges in die land betref,

ja, die magtiges,

by wie ek al my vreugde gevind het:

₄Wie hulle na ander gode haas,

vererger hulle smart.

Ek sal nie vir hulle •drankoffers

van bloed uitgiet nie,

en ek sal nie hulle name

op my lippe neem nie.

₅Here, my erfdeel, my beker,

U bepaal my lot.

₆Die meetsnoere het vir my

in lieflike plekke geval,

ja, my erfenis is vir my mooi.

₇Ek sal die Here prys

wat my raad gegee het,

selfs in die nag wys my hart my tereg.

₈Ek hou die Here altyd voor oë;

omdat Hy aan my regterkant is,

sal ek nie struikel nie.

₉Daarom is my hart bly

en juig my binneste;

ja, my liggaam bly veilig,

₁₀want U sal my lewe

nie aan die •doderyk oorlewer nie;

U sal nie toelaat dat u getroue

volgeling die graf sien nie.

₁₁U wys my die pad van die lewe:

oorvloedige vreugde

in u teenwoordigheid,

lieflikhede in u regterhand, vir altyd.