JOB 8

₁TOE het Bildad, die Suhiet, geantwoord en gesê:

₂Hoe lank sal jy hierdie dinge spreek en die woorde van jou mond 'n geweldige wind wees?

₃Sou God die reg verdraai, of die Almagtige die geregtigheid krenk?

₄As jou kinders teen Hom gesondig het, het Hy hulle aan hul oortreding oorgegee.

₅As jý na God soek en die Almagtige om genade smeek,

₆as jy rein en opreg is, ja, dan sal Hy oor jou opwaak en jou woning herstel ooreenkomstig jou geregtigheid;

₇dan sal jou begin gering wees, maar jou einde baie groot.

₈WANT doen tog navraag by die vorige geslag, en gee ag op wat hulle vaders nagespeur het;

₉(want ons is van gister en weet niks nie, omdat ons dae 'n skaduwee op die aarde is;)

₁₀sal húlle jou nie leer, jou dit nie sê en woorde uit hul hart voortbring nie?

₁₁Skiet die biesie op waar geen moeras is nie? Groei die riet sonder water?

₁₂Nog is dit in sy volle groei — sonder dat dit afgepluk word — dan verdor dit voor al die ander gras.

₁₃So gaan dit met almal wat God vergeet, en so vergaan die verwagting van die goddelose;

₁₄sy hoop is afgesny en die voorwerp van sy vertroue is 'n spinnerak.

₁₅Hy steun op sy huis, maar dit bly nie staan nie; hy klem hom daaraan vas, maar dit hou geen stand nie.

₁₆Vol sap staan hy in die son, en sy ranke sprei uit oor sy tuin.

₁₇Sy wortels is gevleg oor 'n hoop klippe heen, 'n kliphuis deurboor hy.

₁₈As Hy hom vernietig uit sy plek, sal dit hom verloën en sê: Ek het jou nie gesien nie.

₁₉Kyk, dit is die vreugde van sy lewensweg, en uit die stof spruit daar ander uit!

₂₀Kyk, God verwerp die vrome nie, en Hy vat die kwaaddoeners nie aan die hand nie.

₂₁Terwyl Hy jou mond met gelag vervul en jou lippe met gejuig,

₂₂sal jou haters met skaamte beklee word, en die tent van die goddelose — weg is dit!