1 KORONIKA 14

₁Hirama kgoši ya Tiro o romile batseta ba tla go Dafida, a iša diphata tša morokwana, le baagi, le babetli ba dikwata, ba mo agela ngwako. ₂Dafida a lemoga gobane Morena o mmeile kgoši ya Isiraele, gobane mmušo wa gagwe o be o retwa gagolo ka baka la setšhaba sa gagwe sa Isiraele.

₃Dafida a fela a tšea basadi ba bangwe gape a le motseng wa Jerusalema, a tswala barwa le barwedi. ₄Maina a bao ba ba mo tswaletšwego Jerusalema šea: Ke Samua, le Sobaba, le Nathane, le Salomo, ₅le Jibihara, le Elisana, le Elipelete, ₆le Nogaha, le Nefege, le Jafia, ₇le Elisama, le Beleyada, le Elifelete.

₈Ya re ge Bafilisita ba ekwa gobane Dafida o beilwe kgoši ya Isiraele ka moka, ba tšwa ka moka ga bona ba re ba mo sware. Dafida a re go di kwa, a ba tšwela dira. ₉Bafilisita ba rotoga ba enetša moedi wa Refaima. ₁₀Dafida a botšiša Modimo a re: A ke tšwele Bafilisita dira? A o tlo ba gafela diatleng tša ka?

Morena a fetola a re: Tšwaa, ke tlo ba gafela diatleng tša gago.

₁₁Ya re ge a rotogela Baala-Peratsima, Dafida a ba fenya ntshe; a bolela a re: Modimo o gogotše manaba a ka ka seatla sa ka bjalo ka meetse ge a gogola; mme felo fao ba re ke Baala-Peratsima. ₁₂Bafilisita ba šia medimo ya bona gona moo; Dafida a re e fišwe ka mollo.

₁₃Bafilisita ba boa ba enetša moedi woo. ₁₄Dafida a buša a botšiša Modimo; Modimo a fetola a re: O se ke wa latelela; ba dike ka tletlolo, o ba fihlele ka sethokgweng sa Baka. ₁₅E re ge o ekwa mošito mo dintlheng tša dihlare tša Baka, o ba šwahlele, gobane Modimo o tlo ba a tšwile a go etile pele go bolaya dira tša Bafilisita. ₁₆Dafida a dira ka mo Morena a mo laetšego ka gona, a bolaya dira tša Bafilisita go tloga Gibeoni go fihla Gesere. ₁₇Gomme tumo ya Dafida ya tšwela dinageng ka moka; Morena a dira gore ditšhaba ka moka di mmoife.