Paulo o kgala diphapang. Thuto ya sefapano ke matla a Modimo
1Paulo e a bileditšwego go ba Moapostola wa Jesu Kriste ka thato ya Modimo, le Sostene ngwanešo.
2Re ngwalela phuthego ya Modimo e lego motseng wa Korinthe, bakgethegi ka Jesu Kriste, babidiwa ba bakgethwa, le bohle ba ba rapelago gohle ina la Mongarena Jesu Kriste, Mong wa bona le wa rena.
3Kgaugelo a e be le lena, le khutšo e tšwago go Modimo Tata wešo, le go Mong a rena Jesu Kriste.
4Ke leboga Modimo wa ka mo go fela ge ke bona kgaugelo ya Modimo ye le e filwego ka Jesu Kriste. 5Gobane le humišitšwe dilong tšohle ka yena, thutong ka moka le tsebong ka moka, 6ya ba gona go tiiša bohlatse bja Jesu Kriste mo go lena. 7Le humišitšwe wa go se hlokišwe le e tee ya dineo tša kgaugelo, le le ba ba letetšego kutologo ya Mong wa rena Jesu Kriste. 8Ke yena a tlogo le tiiša go fihla bofelong, gore le se be le bosodi bofe ka letšatši la yena Mong a rena Jesu Kriste. 9Modimo ke Mmotegi, yena wa go le biletša go kopana le Morwa wa gagwe Jesu Kriste Mong a rena.
10Gomme lena banabešo, ke a le rapela, ka ina la Jesu Kriste Mong a rena, ke re: Bohle bolelang se tee, gore mo go lena go se be le diphapang; le be ba go bapelana, kgopolo e le e tee, kelelo e le e tee. 11Gobane tša lena Bana bešo ke di tsebišitšwe ke Keloe, a re mo go lena go na le diphapang. 12Ke ra diphapang tšeo tša ge mo go lena e mongwe a re: Nna ke wa Paulo, e mongwe a re: Nna ke wa Apollo, e mongwe a re: Nna ke wa Kefase, e mongwe a re: Nna ke wa Kriste! 13A Kriste a ka ripaganywa? A Paulo ke yena a le bapoletšwego? A le kolobeleditšwe ineng la Paulo?
14Nna ke leboga Modimo, ge ke sa ka ka kolobetša le o tee wa lena, ge e se Krispo le Gayo. 15Gore e se be e mongwe a ka re ke kolobetša batho ineng la ka. 16Ba ke ba kolobeditšego ke ba ga Stefana; ga ke sa elelwa ba bangwe ba e ka bago ba go kolobetšwa ke nna. 17Gobane nna Kriste ga a ka a nthoma go yo kolobetša, o nthomile go tsebatša Ebangedi, e sego ka polelo ya bohlale, gore sefapano sa Kriste se se ke sa kgorwakgorwa.
18Gobane thuto ya sefapano ba bohlale ba re ke bošilo; rena baphološwa re hwetša e le maatla a Modimo. 19Gobane go ngwadilwe gwa thwe: Bohlale bja bahlale ke tlo bo senya; tlhaloganyo ya bahlaloganyi ke tlo e fediša. 20O kae yo bohlale? O kae wa mangwalo? O kae mohlathatšamabakaano? -- Bohlale bja lefase a Modimo ga a ka a bo dira bošilo?
21Go bjalo. Ge ka bohlale bja Modimo lefase le šitilwe go hlatha Modimo ka bohlale bja lona, Modimo o ikgahletšwe go phološa ba ba dumelago ka thuto yeo ba rego ke bošilo. 22Bajuda ke ballamehlolo; Bagerika ke banyakamahlale. 23Ge e le rena re bagoeledi ba Kriste Mmapolwa; Bajuda ba tla ba re ke kgopišo; Bagerika ba tla ba re ke bošilo. 24Ge e le babidiwa ba Bajuda le ba Bagerika ba tla ba hwetša e le ona maatla a Modimo, e le bjona bohlale bja Modimo. 25Gobane tša bošilo tšeo di tšwago go Modimo, di phala batho ka bohlale. Le tša phokolo di tšwago go Modimo, di phala batho ka maatla.
26Bana bešo! Bonang ka mo le biditšwego ka gona. Mo go lena ga go ba bantši ba bohlale ka nama; ga go ba bantši ba bagolo; ga go ba bantši ba meloko ya bogoši. 27Tše Modimo a ikgethetšego tšona ke tše lefase le rego ke tša bošilo, gore a nyatšiše bohlale bja lona; o ikgethetše tše lefase le rego ke tša phokolo, gore a nyatšiše tše maatla. 28Modimo o ikgethetše dinyatšegi, tše botlana, tše e sego selo, gore a fediše tšeo ba rego di gona, 29Gore go se be sa nama se se kago ikgantšha pele ga gagwe. 30Gomme ke ka yena ge le le ba Kriste Jesu, yo Modimo a mo dirilego bohlale bja rena, le tokafatšo ya rena, le kgethego ya rena, le topologo ya rena. 31Gore go phethege se se ngwadilwego: E a ithetago a ithete ka Morena.
