Bootswa bja Dafida
1Gwa fela ngwaga, gwa tla lebaka le magoši a felago a etšwa dira ka lona. Dafida a roma Joaba a tšwa le bahlanka ba gagwe le Baisiraele ka moka, gore ba yo fediša Baamoni; ba ya ba rakella motse wa Raba. Dafida yena a šala Jerusalema.
2Ka tšatši le lengwe ka manthapama Dafida a tsoga dilaong tša gagwe, a itshepelela godimo ga ngwako wa mošate. A re go ukamela a le godimo ga ngwako a bona mosadi e mongwe a hlapa; gomme e be e le mosadi yo botse gagolo sebopego. 3Dafida a roma motho a botšiša tša mosadi eo; ba mmotša ba re: A ga se Batseba morwedi wa Eliama mosadi wa Uria Mohethe? 4Dafida a roma mohlanka a mmitša; a re ge a tlile a robala le yena. Gomme Batseba a hlapa ditšhila tša gagwe, a boela gae. 5Mosadi eo a ima, a roma motho a botša Dafida a re: Ke ribogile.
6Bjale Dafida a roma motseta, a laela Joaba a re: Roma Uria Mohethe a tle go nna. Ke moka Joaba a roma Uria a tla go Dafida. 7Uria ge a tsena go kgoši, Dafida a mmotšiša bophelo bja Joaba, le bophelo bja batho, le ka mo tlhabano e yago ka gona. 8Ke mo Dafida a boditšego Uria a re: Yaa ngwakong wa gago o hlape maoto. Uria a tšwa mo ngwakong wa kgoši, gomme a latelwa ke dijo tša kgoši. 9Fela Uria a robala gona moo mojakong wa ngwako wa kgoši a na le bahlanka ba bangwe ba mong wa gagwe; kua ngwakong wa gagwe a se ye. 10Dafida a botšwa gore Uria ga a ka a ya ngwakong wa gagwe. Dafida a mmotšiša a re: O reng o sa ye ngwakong wa gago, mola o etšwa šokeng?
11Uria a fetola a re: Polokelo e kua mešašeng; le Isiraele le Juda ba kua mešašeng; le Joaba mong wa ka, le bahlanka ba mong wa ka ba hlomile mešaša molaleng. Afa nna nka ya ngwakong wa ka, ka ja ka nwa ka robala le mosadi wa ka? Ka bophelo bja gago, le ka bophelo bja moya wa gago, nka se ke ka ba ka dira taba e bjalo.
12Dafida a fetola a re: Dula mo lehono; ka moswana ke tlo go fa tsela.
Uria a dula Jerusalema tšatši leo le le hlatlamago. 13Ke mo Dafida a mmiditšego, a tla a ja a nwa pele ga gagwe, a ba a boiwa. Fela ka mantšiboa a tšwa a robala gona fala a na le bahlanka ba mong wa gagwe.
14Ka la ka moswana Dafida a ngwalela Joaba lengwalo, a le roma ka seatla sa Uria. 15Mo lengwalong le o be a ngwadile a re: Uria mo etišang pele ka mo tlhabano e lego e thata; le mo lahletše a bolawe a hwe. 16Joaba bjale, ge ba dika motse, a iša Uria felo mo a bego a tseba gore go na le banna ba bagale. 17Gomme banna ba motse ge ba etšwa ba hlabana le Joaba, gwa bolawa ba bangwe ba setšhaba, le ba bangwe ba bahlanka ba Dafida; le Uria Mohethe a bolawa.
18Joaba a roma motseta wa go laodišetša Dafida ditaba ka moka tša ntwa. 19A laela motseta a re: E re ge o feditše go anegela kgoši ditaba ka moka tša tlhabano, 20ge kgoši e ka tlalwa ke pelo ya re: Le be le reng le hlabana le batametše motse? A le be le sa tsebe gore ba tlo betša ba le morakong? 21Abimeleke morwa wa Jerubesethe o bolailwe ke mang? A ga a bolawa ka tšhilo e beditšwe ke mosadi a le morakong, a hwela gona moo Thebetse? Le be le reng le batamela morako? Ge kgoši e realo, o tlo re: Uria Mohethe mohlanka wa gago le yena o bolailwe.
22Motseta a sepela, a tla a laodišetša Dafida tšohle tše Joaba a mo romilego ka tšona. 23A anegela Dafida a re: Banna bao ba be ba re patla, ba re latelela nageng. Rena ra ba gomiša, ra ba fihliša kgorong ya motse. 24Ke mo babetši ba morakong wa motse ba beditšego ba bolaya bahlanka ba bangwe ba kgoši; le Uria Mohethe mohlanka wa gago o bolailwe, o hwile.
25Dafida a laelela motseta a re: Yaa o botše Joaba o re: O se ke wa iša pelo kgole ka baka la taba yeo; lerumo le ja mo go fela. Tiiša o lwe le motse woo, o be o o šwalalanye. O mo tiiše o realo.
26Mosadi wa Uria ge a ekwa gore Uria monna wa gagwe o bolailwe, a mo llela. 27Ge a feditše go mo llela, Dafida a roma motho, a mo tšiša ngwakong wa gagwe. Gomme Batseba a mmelegela ngwana wa lesogana. Fela taba ye Dafida a e dirilego e be e befetše Morena.
