BAKOLOSE 2

₁Ke rata gore le tsebe gore ntwa ke e kaakang ye ke e lwelago lena le ba Laoditsea, le bohle ba ba sešogo ba mpona sefahlogo, ₂gore ba ušwe pelo, ba gomarelane leratong, ba išane lehumong le le tletšego la tlhaologanyo, gore ba tsebe thopa ya Modimo le ya Kriste. ₃Ke yena Kriste yo mahumo ka moka a bohlale le a tsebo a fihlilwego mo go yena.

₄Ge ke bolela tšeo, ke gore le se ke la gakantšhwa ke motho ka dipolelo tša maano. ₅Gobane, le ge ka mmele ke le mono kgole, ka moya ke na le lena; ke bona bothakga bja lena ke bo thabela, le ka mo le tiišago go dumela Kriste.

₆Bjale, ge le amogetše Kriste Jesu Morena, swarang tsela le le ba gagwe, ₇Le be ba ba tsemilego medu, ba ba agilwego godimo ga gagwe, ba ba tiilego tumelong ka mo le rutilwego ka gona, le be ba go mo leboga ka botlalo.

₈Le phafoge gore go se be le a kago le thopa ka mabohlale, ka go le fora ka mafela, ka go ya ka melawana ya batho, le ka dithuto tša mathomo a legohle, e se go ya le Kriste.

₉Gobane mo go yena ke mo go agilego botlalo bja go ba Modimo ka lebopo la mmele. ₁₀Gomme le lena le ba botlalo ka yena, e lego yena hlogo ya bogoši bjohle le mebušo yohle.

₁₁Le gona ka yena le bolotše ka lebollo le le sa dirwego ka diatla, e lego go apola mmele wa dibe tša nama ka lebollo la Kriste. ₁₂Ke mo le fihlilwego le yena ka kolobetšo, la tsoga le yena ka yona ka go dumela maatla a Modimo e a mo tsošitšego bahung. ₁₃Gomme lena ba le bego le hwetše dibeng, le go se bolleng ga mebele ya lena, o le phedišitše le yena ka go le lebalela dibe ka moka. ₁₄A phumola lengwalo le le re begago ka Molao, a le tloša mo le bego le thibile tsela, a le kokotela sefapanong. ₁₅Mme mmušo woo a o amoga marumo, a fediša maatla ao pepeneneng a goroga a fentše.

₁₆Bjale go se ke gwa ba le motho e a le beago molato ka dilewa le dinwewa, le ka tša menyanya, le tša kgwedi e mpsha le tša disabatha. ₁₇Dilo tšeo ke meriti fela ya tše di tlogo tla; mmele wona ke wa Kriste. ₁₈Le se ke la dumela go hlokišwa mphapahlogo ke motho wa go kgantšha boipoetšo, a re ke direla barongwa, a re ke bona dipono a sa ka a bona selo, a fo ikgogomoša ka kgopolo ya gagwe ya nama. ₁₉Motho e mobjalo ga a gomarele hlogo yeo e babalelago mmele ka moka, e kopane nawo ka ditšhika le ka mešifa, ya o phediša ka mokgwa o beilwego ke Modimo.

₂₀Ge le hwile le Kriste, gona le kgaogane le melawana ya lefase. Le sa tlemelwang ka mekgwa la etša ba ba phelago lefaseng? ₂₁Go thwe: Se sware seo! O se je seo! O se kgwathe seo! ₂₂Mola e le dilo tše di beetšwego go fela ka go lewa. Bjale melawana yeo le dithuto tša batho di iša kae? ₂₃Ke ditaba tše ba rego ke tša bohlale, mola e le tša borapedi bja boithatelo, le boipoetšo bja boithatelo, le go otla mmele ka boithatelo, di sa hole motho selo, e le go fo kgodiša mmele.