ESITERE 9

₁Ka kgwedi ya lesome la metšo e mebedi ya Adara, ka la lesome la metšo e meraro la yona, le le bego le beilwe ke molao wola wa kgoši gore e be la gore manaba a Bajuda a ba bolaye, -- ditaba tša fetoga, gwa thwe: Bajuda ba bolaye manaba a bona. ₂Bajuda ba rapana metseng ya bona dinageng ka moka tša kgoši Ahasiwerosi, gore ba iše matsogo go ba ba kago ba dira bošula, gwa se ke gwa ema motho pele ga bona, gobane ditšhaba ka moka di be di wetšwe ke tšhogo ya go ba tšhoga. ₃Le bakgoma ka moka ba dinaga, le ditona, le babuši le bahlanka ba kgoši ba ema le Bajuda, gobane ba be ba swerwe ke tšhogo ka baka la Morodekai. ₄Gobane kua mošate, e mogolo e be e le Morodekai, gomme tumo ya gagwe ya kwala dinageng ka moka, gobane monna eo Morodekai o be a fela a gola a eya. ₅Gomme Bajuda ba otla manaba a bona ka kotlo ya lerumo le ka go a bolaya le ka go a fediša, ba dira bahloi ba bona ka mo ba bego ba rata.

₆Le mo motseng wa Susani mošate, Bajuda ba bolaya banna ba makgolo a mahlano, ba ba fediša. ₇Ba bolaya Parasanadatha, le Dalifoni, le Asiphatha, ₈le Poratha, le Adalia, le Aridatha, ₉le Paramasitha, le Arisai, le Aridai, le Wayesatha. ₁₀Ke bona barwa ba lesome ba Hamani morwa wa Hamedatha lenaba lela la Bajuda; ba ba bolaile, fela ba lesa go rebola dithoto tša gagwe.

₁₁Ka tšatši leo palo ya ba ba bolailwego Susani motseng wa mošate ya fihla kgošing. ₁₂Kgoši ya botša mohumagadi Esitere ya re: Mono Susani motseng wa mošate Bajuda ba bolaile banna ba makgolo a mahlano, ba fedišitše barwa ba lesome ba Hamani. Se ba se dirilego dinageng tše dingwe ga di tsebje. Fela, o sa kgopelang se o kago se fiwa? O sa lopang se o kago se direlwa?

₁₃Ke mo Esitere a itšego: Ge kgoši e ka dumela, gona le ka moswana Bajuda a ba dumelelwe go dira se ba se dirilego lehono mo motseng wa Susani, mme barwa ba lesome ba Hamani ba fegwe kwateng. ₁₄Kgoši ya laela gore go dirwe ka mokgwa woo; molao woo wa goelelwa motseng wa Susani, barwa ba lesome ba Hamani ba fegwa kwateng. ₁₅Gomme ka la lesome la metšo e mene Bajuda ba motseng wa Susani ba bolaya banna ba makgolo a mararo mo Susani; fela, ba se ke ba rebola dithoto tša bona.

₁₆Ge e le Bajuda ba mo dinageng tše dingwe ba be ba rapane, ba itwela, ba ikhutšiša manaba; ba bolaya bahloi ba bona ba dikete tše masome a šupago a metšo e mehlano, ba lesa go rebola dithoto tša bona. ₁₇Ke tšona tše di dirilwego ka la lesome la metšo e meraro la kgwedi ya Adara; ka la lesome la metšo e mene ba khutša, ba le dira la monyanya, la go thaba. ₁₈Ge e le Bajuda ba Susani bona ba be ba rapane ka la lesome la metšo e meraro le ka la lesome la metšo e mene, ba khutša ka la lesome la metšo e mehlano; ba dira lona la monyanya le la go thaba. ₁₉Ke ka baka leo Bajuda ba ba agilego ntle, le ba metsaneng ba dirago monyanya ka la lesome la metšo e mene, ya ba la lethabo, ba fana dineo ka lona.

₂₀Morodekai a ngwala ditaba tše, a romela Bajuda ka moka ba dinageng tša kgoši Ahasiwerosi mangwalo, ba kgauswi le ba kgole; ₂₁a re: E be mokgwa ka ngwaga o mongwe le o mongwe, ba kgethe letšatši la lesome la metšo e mene la kgwedi ya Adara, le la lesome la metšo e mehlano; ₂₂ka gore ke ona matšatši ao Bajuda ba khutšitšego manaba ka ona, ke yona kgwedi ye manyami a bona a ba fetogetšego lethabo, sello sa ba fetogela monyanya; a re ba a kgethe e be matšatši a menyanya, a go fana dineo, le a go hlallela badiidi. ₂₃Gomme Bajuda ba dira tše ba di thomilego ba ngwaletšwe ke Morodekai, mme ya ba mokgwa mo go bona.

₂₄Gobane Hamani morwa wa Hamedatha wa Agagi lenaba lela la Bajuda, o be a rerile go fediša Bajuda; o be a laotše ka ditaola tša Puri, tša re a ba senye. ₂₅Mme ge di fihla go kgoši, kgoši ya laela ka mangwalo gore morero o mobe wo Hamani a bego a o reretše Bajuda, o boele hlogong ya gagwe; ba mo fega kwateng le barwa ba gagwe. ₂₆Ke ka baka leo ba rego: Ke matšatši a Purimi, ka baka la ditaola tšela tša Puri. Ke ka baka la tšona, le ka baka la mangwalo ala, le ka baka la tše ba di bonego le tše di ba diregetšego, ₂₇ge Bajuda ba tiišitšego ba re e be mokgwa wa bona le wa bana ba bona, le wa bohle ba ba ikopanyago le bona, gore taba ye e se ke ya hlanošwa, le gore ba kgethe matšatši a mabedi ao ka ngwaga o mongwe le o nongwe ka lebaka le le boletšwego ke lengwalo lela, ₂₈gore matšatši ao a se ke a lebalwa, a kgethwe ke bana ba bona ka moka dileteng ka moka le metseng yohle, le gore matšatši a a Purimi Bajuda ba se ke ba a hlanoša mme a se ke a lebalwa ke ditlogolo tša bona.

₂₉Mohumagadi Esitere morwedi wa Abihaile, le Morodekai, Mojuda, ba ngwadile ba tiiša, ba ba ba boeletša gore matšatši a Purimi e be molao. ₃₀Mangwalo ao ba a romela Bajuda ka moka ba mo dinageng tše lekgolo le masome a mabedi a metšo e šupago tša mmušo wa Ahasiwerosi, ba bolela tša leago le go botegelana. ₃₁Ba tiiša matšatši ao a Purimi lebakeng la ona ka mo go boletšego Morodekai Mojuda le mohumagadi Esitere; mme Bajuda ba dumela ba ipeela melao ya go ikona le ya go lla, ya ba melao ya bona le ya ditlogolo tša bona. ₃₂Esitere ke yena a tiišitšego ditaba tše tša Purimi, tša ba tša ngwalwa pukung.