Kotlo e tlo tla ka Bakaladea
1Lentšu la tše moporofeta Habakuku a di bonego.
2Morena, go tlo feletša neng ke fela ke bitša o sa kwe? Ke hlaboša lentšu ke go bitša ke patilwe, o sa nnamolele. 3O reng o ntesa ke lebane le bobe? O dula o bona ke hlaka, ke lebane le tlhakolo le sehlogo, go tsoga ntwa, go hlaga phapang? 4Ke tšona tše di hlokišago thuto matla; le toko ga e sa hlwe e hlaga; gobane moloki o rewa ke ba babe, mme moahlolelo o tšwelela o kgopamišitšwe.
5Bonang tša kua ditšhabeng! Lebelešang! Le tlo kgotsa wa go tšhoga; gobane mehleng yeno ke dira modiro wo le ka se kego la dumela ge le ka fo botšwa. 6Gobane ke nna e, ke tsošago Bakaladea, setšhaba se sehlogo, se lebelo, se se yago le bophara bja lefase, se tšea madulo a e sego a sona. 7Ke se se šoro se se šiišago; se tšwelela se na le moahlolelo wa sona, le bogoši bja sona.
8Dipitsi tša sona di phala dinkwe ka lebelo; bogale bja sona, se phala phiri ya bošego; se aparetša naga banamedi; ba kganyela ba se kgole; ba fofa bjalo ka manong mawelasetopo.
9Ka moka ba tlela go tšubutla, ba kgotlollela mahlo mo ba yago, ba gopa mathopša a a kakago lešabašaba. 10Ba nyatša magoši, bagolo, mo go bona ba a segwa; ba sega le dibo ka moka, ba epa mangope ba tsena. 11Ba napa ba tsenwa ke moya o šele, ba feta ba yo senya; maatla a bona ke wona modimo wa bona.
12Mme wene Modimo, a ga o Modimo le Mokgethwa wa ka go tloga kgaleng? Re ka se ke ra hwa. Ke wene Morena o ba beilego gore ba buše. Ke wene lentswe, o ba biletšago go re sola. 13Mahlo a gago ke mailasebe; ga a kgone go fo bona patikego. O reng o bona dihlola, wa homola ge yo mobe a fo metša ba ba mo phalago ka go loka?
14Hleng batho o ba lesa ba ba bjalo ka dihlapi lewatleng, ba ka digagabi di se nago mmuši. 15Ka moka ba ba tanya ka dikgwega, ba ba gopa ka lokwa la bona, ba ba olela mokotleng, ya ba gona ba thabago ba goloka. 16Ke ba baka leo lokwa leo la bona ba le hlabela sedimo, mokotla woo wa bona ba o thuntšhetša diorelo; ka gobane e le tšona di ba hwetšišago makhura le dilewa tša go tsefa.
17A ba tlo fela ba fakolla malokwa ya ba temalo, ba fela ba fetša dilete ba sa šetše motho?
