JOBO 11

₁Gwa fetola Tsofara wa Naama, a re: ₂A mantšu a makaakaa a ka leswa a se ne phetolo? A monna wa moratharathi a ka fo thwe: Ee, o rerešitše? ₃A taba tšago tša metlae di ka fo homolelwa, wa tlo šala o nyatša o hlokile moganetši. ₄Wena o re: Thuto ya ka ke tshekegi; o a mpona, ke yo bolo. ₅Joo, Modimo a ka be a bue; a ka be a ahlame a bolele nago! ₆A ka be a go utollele diba bja bohlale bjagwe bo fetago tsebo ka bogolo le ka bontši; gona o ka be o lemoga ge Modimo a se bele melato ya gago yohle. ₇A thopa tša Modimo o ka di fihlela? A botlalo bja Yomaatlaohle o ka bo hlaologanya? ₈Ke bja kua godimodimo. O ka dirang? Go ya tlase bo feta kua bodulabahu. O sa tsebang? ₉Botelele, bo feta kua go gomago mafase; bophara bo feta lewatle. ₁₀Ge yena a ka rotoga, a go swara, a go iša letlatsweng, ke mang a ka mo thibelago? ₁₁Gobane batho ba lefela o ba lemogile; bobe o bo bona, le ge a sa eleletše. ₁₂Moo le motho wa sesoswana a ka eletšega; le namane ya pokolo e ka fetoga motho. ₁₃Wena bjale baakanya tša pelong ya gago; iša diatla tša gago go yena. ₁₄Ge atla tšago di na le bobe, bo lahle, o se agiše bosenyi mo motseng wa gago. ₁₅Ke mo o tlogo fahloga o se ne bosodi, wa kwa maatla, o se šie selo. ₁₆O tlo lebala mahlomola; ge o a gopola, a tlo etša noka ge e pšhile. ₁₇O tlo selwa ke bophelo boka etša sa mosegare; le ge go le leswiswi, go tlo etsa matlagosa. ₁₈O tlo bea pelo, gobane go sa holofetša. Le ge o talatatša mahlo, o tlo iketla wa robala. ₁₉O tlo lala go se yo o mmoifago; go tla ata ba ba boifago mahlo ago. ₂₀Mahlo a ba babe ona a tlo nyama, setšhabelo se ba senyegetše; se se ba šaletšego e le go fela moya fela.