MATEO 2

₁Eitše ge Jesu a belegwe motseng wa Betlehema nageng ya Juda mehleng ya kgoši Herode, gwa tšwelela ba bohlale ba Bohlabela, ba fihla Jerusalema. ₂Ba re: E kae Kgoši ya Bajuda e sa tšo go belegwa? Gobane re bone naledi ya gagwe kua Bohlabela, mme re tlile go mo lotšha.

₃Kgoši Herode ge a di kwa a tšhoga, le motse ka moka wa Jerusalema wa thšoga le yena. ₄A re a kgobile baperisita ba bagolo bohle le bamangwalo ba setšhaba a tsomeša go bona mo Kriste a tlo go tswalewa gona.

₅Ba mmotša ba re: Ke Betlehema nageng ya Juda, gobane go ngwadilwe ke moporofeta, a re: ₆Le wena Betlehema naga ya Juda, ruri ga o e monyenyane gara ketapele tša ga Juda; gobane go wene go tlo tšwa Yena Moetapele e a tlo go diša tšhaba sa Isiraele.

₇Ya ba gona Herode a biletšago ba bohlale thopeng a ba botšišeša lebaka leo naledi e bonetšego ka lona. ₈A ba roma a re ba ye Betlehema, a re: Sepelang, le botšišeše taba tša ngwana e; e tlo re ge le mo hweditše, le ntsebiše, gore le nna ke ye ke mo lotšhe.

₉Bona ge ba kwele la kgoši, ba sepela; gomme ba bona naledi yela ba e bonego bohlabela, e ba eta pele, ya ba ya ema godimo ga felo fao ngwana a bego a le gona. ₁₀Ya re ge ba bona naledi yeo, ba thaba gagologolo. ₁₁Ba tsena ngwakong, ba hwetša ngwana le Maria mmagwe, ba khunama ba mo lotšha. Ba phutholla mahumo a bona, ba mo ntšhetša dineo tša gauta le diorelo le ditlolo.

₁₂Gomme ge ba laetšwe ke Modimo dilorong gore ba se ke ba feta ka ga Herode, ba boela nageng ya gabo ka tsela e šele.

₁₃Eitše ge ba tlogile, Morongwa wa Morena a tšwelela go Josefa dilorong, a re: Tsoga, o tšee ngwana le mmagwe o tšhabele Egipita, o yo dula gona, ke be ke tle ke go botše; gobane Herode o rata go tsoma ngwana e gore a mmolaye.

₁₄Josefa a tsoga a tšea ngwana le mmagwe e le bošego, a falalela Egipita. ₁₅A dula gona, Herode a ba a hwa; ya ba gore go phethege se se boletšwego ke Morena ka moporofeta e a itšego: Morwa wa ka ke mmiditše kua Egipita.

₁₆Bjale Herode ge a bona a gakišitšwe ke ba bohlale, a befelwa gagolo, a roma bahlanka, ba ya ba bolaya bašemanyana ka moka ba Betlehema, le ba mathokong ka moka a naga yeo, ba nywaga e mebedi le ba ba ba hlatlamago, a lekanya ka lebaka le a le botšišitšego go ba bohlale.

₁₇Ke mo go phethegilego se se boletšwego ke moporofeta Jeremia, ge a re: ₁₈Kwa Rama go kwetše lentšu la dilo le dikolomelo tše di ntši. Rahele o llela bana ba gagwe; o gana go homotšwa, gobane ga ba sa le gona.

₁₉Ya re Herode a hwile, Morongwa wa Morena a tšwelela go Josefa dilorong, a le kua Egipita. ₂₀A re: Tsoga, o tšee ngwana le mmagwe, o ye nageng ya Isiraele; gobane ba ba bego ba tsoma go bolaya ngwana e, ba hwile. ₂₁Josefa a tsoga, a tšea ngwana le mmagwe, a tla nageng ya Isiraele.

₂₂Gomme ge a ekwa gore nageng ya Juda go buša Arakelao bakeng sa Herode tatagwe, a boifa go ya gona; a kwa taelo ka toro, mme a khudugela dinageng tša Galilea. ₂₃A fihla a aga motseng wo ba rego ke wa Natsaretha; ya ba go phethega se baporofeta ba se boletšego ba re: O tlo bitšwa Monatsaretha.