MATEO 3

₁Mehleng yeo gwa tšwelela Johane Mokolobetši, a goelela a le lešokeng la Juda, ₂A re: Sokologang, gobane mmušo wa magodimo o batametše. ₃Ke yena yo moporofeta Jesaya a mmoletšego a re: Lentšu la segoeledi lešokeng le re: Thakgang mmila wa Morena, le lekelanye tsela tšagwe.

₄Ge e le yena Johane o be a apere kobo ya boya bja kamela, a itlemile matheka ka lerala; mme dijo tša gagwe e be e le ditšie le dinose tša naga. ₅Ke mo ba Jerusalema le ba naga ya Juda ka moka, le ba mošono le mošola wa noka ya Jorodane, ba tšwetšego go yena, ₆Ba kolobetšwa ke yena nokeng ya Jorodane, ba ipolela dibe.

₇Ya re ge a bona bafarisei le basadutsei ba bantši ba etla kolobetšong ya gagwe, a bolela nabo a re: Lena matswingyana a dinoga, ke mang a le rutilego go tlo phonyokga bogale bjo bo tlago? ₈Napang le enywe dienywa tše di amanago le tshokologo. ₉Le se ke la eleletša go tlo re: Re na tatawešo, Aborahama; gobane ke a le botša, Modimo o kgona go tsošetša Aborahama bana mo mabjeng a. ₁₀Le gona, selepe se šetše se beilwe medung ya dihlare; mme sehlare sefe le sefe se se sa enywego dienywa tše botse, se tlo rengwa sa lahlelwa mollong. ₁₁Ge e le nna ke le kolobetša ka meetse fela, ke hlatlangwa ke e a tlo go mpheta ka maatla, yo ke sa swanelego le go mo rwalela dieta tša gagwe. Yena o tlo le kolobetša ka Moyamokgethwa le ka mollo. ₁₂O swere leselo ka seatla; mme seboa sa gagwe o tlo se fsielela ruri, a kgobela mabele a gagwe sešegong; moko wona o tlo o fiša ka mollo wo o sa timego.

₁₃Mehleng yeo gwa fihla Jesu a etšwa Galilea; a tla nokeng ya Jorodane go kolobetšwa ke Johane. ₁₄Johane a gana, a re: Ke nna ke swanetšego go kolobetšwa ke wena; mme a o tla go nna?

₁₅Jesu a fetola a re: Lesa bjalo go dirwe ka mokgwa wo; gobane go re swanetše ge re phetha toko ka moka. -- Ke mo Johane a mo dumeletšego.

₁₆Ya re ge Jesu a kolobeditšwe, a etšwa meetseng, gwa napa gwa bulega legodimo, mme a bona Moya wa Modimo o theoga bjalo ka leeba, o etla godimo ga gagwe. ₁₇Gwa tloga go kwala lentšu le le tšwago legodimong le re: Yenayo ke yena Morwamoratwa wa ka, yo ke kgahlwago ke yena.