NUMERI 36

₁Gwa batamela balaodi ba leloko la Bagileada morwa wa Makiri motlogolo wa Manase, ba leloko la Bajosefa, ba tla ba bolela pele ga Moshe le pele ga bagolo, balaodi ba meloko ya Baisiraele, ₂ba re: Morena o laetše wena mong wa rena a re, o arolele Baisiraele naga ka go dira matengwa, gore ba be le magae a bona. Gomme wena mong wa rena o laetšwe ke Morena gore naga ya Tselofagadi ngwanaborena o e neele barwedi ba gagwe. ₃Bjalo ge ba ka tšewa ke monna wa moloko o mongwe wa Baisiraele, gona naga ya bona e tlo kgaolwa mo go naga ya gešo, mme ya katološa naga ya moloko wo ba tšeetšwego go wona. Mokgwa woo e tlo ba go re amoga naga ya rena. ₄Gomme ge go tla ngwaga wa megobo mo go Baisiraele, naga ya bona e tlo katološa ya leloko le ba tšeetšwego go lona, ya tlo ba go fokotša naga ya leloko la gaborena.

₅Moshe a laela Baisiraele a boditšwe ke Morena a re: Ba moloko wa Josefa ba a rereša. ₆Lentšu le Morena a le boletšego ka baka la barwedi ba Tselofagadi šele: A ba tšwe ke bao ba ba ratago; fela, ba tšewe ke ba moloko wabo. ₇Ka mokgwa wo naga e ka se ke ya tšwa go leloko ya fetela go leloko le lengwe ka gobane go rata gore Baisiraele bohle ba se ke ba ba ba kgaogana le naga ya leloko la gabo bona. ₈Gomme ge go ka ba le mosetsana e a lebanwego ke bohwa bja naga mo go Baisiraele, a tšewe ke monna wa leloko la gabo, gore Baisiraele ba se ke ba amogiwa naga ye e lego ya bona. ₉Naga ya leloko e se ke ya fetela go leloko le lengwe; Baisiraele bohle ba se ke ba ba ba kgaogana le naga ya meloko ya bona.

₁₀Barwedi ba Tselofagadi ba dirile bjalo ka ge Morena a laetše Moshe, ₁₁ka gobane Mahla, le Thiritsa, le Hogola, le Milika, le Noa, barwedi ba Tselofagadi ba tšerwe ke barwa ba borangwane a bona. ₁₂Ba tšerwe ke moloko wa Bamanase morwa wa Josefa; gomme naga ya bona ya dula e le ya leloko la gabo bona.

₁₃Ke tšona ditaelo le ditshwanelo tše Morena a di laetšego Baisiraele ka Moshe mola ba le molaleng wa Moaba nokeng ya Jorodane go lebana le motse wa Jeriko.