PSALME ya 144

₁A go retwe Morena, lentswe la ka. Ke yena a rutago matsogo a ka go lwa, le diatla tša ka go hlabana.

₂Mogaugedi wa ka, sebo sa ka, thaba ya ka, le Mophološi wa ka, kotse ye ke e botilego, ke wena, e o mpeilego mmuši wa setšhaba sa ka.

₃Morena, motho ke selo mang ge o bile o mo tseba? Le ngwana wa motho ke eng, ge o mo hlokomela?

₄Motho o swana le muši; bophelo bja gagwe ke thiti e fetago.

₅Morena, sekamiša legodimo lago o fologe, kgwatha dithaba di tupe meuši.

₆Gadimiša dikgadima o ba phatlalatše. Betša mesebe ya gago o ba fediše.

₇Ntšha diatla tša gago o le moo tletlolo, o nkinole madibeng magolo, diatleng tša ba mohuta o šele,

₈Ba melomo ya go bata maaka, bao letsogo la bona letona e lego la go ena bofora.

₉Modimo, a nke ke go hlabele sefela se sefsa, ke go binele ka lekope le ka metato e lesome.

₁₀Ke wena o fago dikgoši go fenya, o efelago Dafida mohlanka wa gago lerumo le lebe.

₁₁Nkefele o mphološe diatleng tša batho ba mathoko, ba melomo ya go bata maaka, bao letsogo la bona le letona e lego la bofora.

₁₂Ke mo bana ba rena ba tlogo etša mere ya go hlekwa ge e mela, mme barwedi ba rena ba tlo etša dikokwane tše di setilwego tša go thekga nywako ya bogoši.

₁₃Nywako ya rena ya matlolo e tlo tlala ya ntšhiwa tša mehutahuta; diruiwa tša rena di tlo tswala ka diketekete, kgoloborethe mafulong a rena!

₁₄Dipholo tša rena di rwale, go se na go thubja le go thopša, le ge e le mokgoši mebileng ya rena.

₁₅Ke ona mahlatse a setšhaba, mahlatse a setšhaba seo Morena e lego Modimo wa sona.