PSALME ya 145

₁Ke tlo go godiša, wena Modimo wa ka, wena o lego Kgoši. Ke tlo reta leina la gago ka mehla le neng le neng.

₂Ka mehla ke tlo go reta, ka goloka leina la gago ka mehla le neng le neng.

₃Morena ke yena yo mogolo, Moretwa wa paala, yo mogolo a se nago mokayena.

₄Meloko le melokoloko e tlo tsebanya ditiro tša gagwe, e tlo botšana tša maatla a gagwe.

₅Ba tlo bolela borena, letago la bokwala bjago mme nna ke tlo opela koša ya matete ago.

₆A ba bolele tša maatla a gago a a šiišago, mme nna ke anegele batho bogolo bja gago.

₇A ba kwatše ditaba tša bogolo bja botho bja gago, ba hlalalele go loka ga gago.

₈Morena ke yo mabobo le kgaugelo, wa go se fele pelo, wa botho bjo bogolo.

₉Morena ke mosetšabohle, kgaugelo ya gagwe e ukametše tšohle tše a di dirilego.

₁₀Morena, dibopša tša gago di a go leboga, o retwa ke bagaugelwa ba gago;

₁₁Ba bolela tša letago la bogoši bjago, ba kwatša tša maatla a gago.

₁₂Gore bana ba batho ba botšwe tša maatla a gago, le tša letago la mmušo wa gago.

₁₃Mmušo wa gago ke mmušo wa mehla yohle le ya neng le neng; bogoši bja gago bo tlo ba gona le mehleng ya ditlogolo le ditlogolwana go ya go ile.

₁₄Morena o thekga bohle ba ba wago, o tsoša bohle ba go bokalela.

₁₅Mahlo a diphedi tšohle a lebeletše wena; mme ke wena o di fago dijo lebakeng la gona.

₁₆O khupurolla seatla sa gago, mme ka moka tše di phelago o di horiša lethabo.

₁₇Morena mo tseleng tša gagwe tšohle o a loka, ke yo botho mo tirong tša gagwe tšohle.

₁₈Morena o kgauswi le bohle ba mmitšago, le bohle ba e rego ge ba mmitša ba rereša.

₁₉O tlo dira tše di tlogo kgahla ba ba mmoifago; o kwa dillo tša bona, mme o a ba phološa.

₂₀Bohle ba ba mo ratago o ba hlokometše; ba babe bona o tlo ba fediša.

₂₁Molomo wa ka a o bolele theto ya Morena, nama yohle a e rete leina le lekgethwa lagwe ka mehla le mehleng ya neng le neng.