Pheletšo ya mahlatse a ba babe
Ya mohlabeledi. Sefela sa barwa ba Kora.
1Kwang ditaba tše, lena ditšhaba tšohle! Sekegang ditsebe, lena bohle ba le agilego lefaseng!
2Lena batho ba setšhaba, le lena ba bagolo, lena ba bahumi le na le bahumanegi.
3Molomo wa ka o bua bohlale; pelo ya ka e akanya tlhalosetšo.
4Ke hlwaya ditsebe, ka kwa seema; ka nyapola nyepo ya ka ka sefela.
5Ke reng ke belaela ge ka mohlamobe ke dikwa ke bobe bja ba ntlhomarago?
6Ke babotamahumo, ba go ikgantšha ka menono e megolo.
7Motho a ka se ke a ba a lopolla ngwana wabo, a ntšha sa go mmoelanya le Modimo.
8Sa go rekolola moya wa motho se a hlokwa; a ba a di lesa moka,
9go phela go ya go ile, le go se bone lebitla.
10Gobane se a se bonago sese: Ba bohlale ba a hwa; bohle, le mašilo le ditlaela, thoto ya bona e šalela ba šele.
11Nywako ya bona ya ka mehla ke mabitla, ona madulo a meloko le meloko; mafase a šala a bitšwa ka maina a bona.
12Motho letagong ga a iše kgole; o bjalo ka diruiwa ge di felela.
13Ke yona tsela ya bona baipoti, le ya bao ba go ba latela ba kgahlilwe ke melomo ya bona.
14Ba etša mohlape, ke ba go ya kua bahung, ba gapša ke lehu. Ka moswana mmušo wa bona o tlo tšewa ke baloki; bonatla bja bona bo ile, gagabo e le kua bodulabahu.
15Nna wa ka moya, Modimo o tlo o phološa diatleng tša lehu, ka gobane o ntshwere.
16O se ke wa belaela go bona monna a rua, go ata mahumo a ngwako wa gagwe.
17Gobane lehung a ka se ye a swere selo; lehumo la gagwe le ka se fologe le mo šetše nthago,
18Le ge a itšhegofatša a sa phela, batho ba mo reta ba re: O a ipshina!
19O tlo ya go ilego meloko ya borragwe, ba ba sa bonego seetša neng le neng.
20Ge motho letagong a se ne tlhaloganyo, o bjalo ka diruiwa ge di felela.
