PSALME ya 92

₁Go leboga Morena ke mo go botse, le go hlaba sefela sa leina la gago, wena Yogodimodimo,

₂Le go tumiša botho bja gago e sa le bosasa, le go bolela potego ya gago e sa le bošego.

₃Ka seletšo sa metato e lesome, le ka lekope, le ka go letša pela.

₄Gobane wena Morena o nthabišitše ka ditiro tšago; ke hlalalela tše diatla tšago di di dirilego.

₅Morena, mediro ya gago ke e megologolo; kelelo tša gago ga se ka go iša.

₆Motho wa lešilo ga a di tsebe; wa setlatla ga a di lemoge.

₇Ba babe ge ba hloga wa mabjang, mme badirabobe bohle ge ba taga wa matšoba, sa bona ke go yo loba ya ba moka.

₈Mme wena Morena o dutše o phagamile neng le neng.

₉Ka kgonthe, šeao manaba a gago, Morena! Ka kgonthe, šeao manaba a gago a a senyega badirabobe ba a phatlalatšwa.

₁₀Mme la ka lenaka o le phagamiša bjalo ka la nare; ke tlotše makhura a mafsa.

₁₁Bantlhoi ke ba bona ka mahlo a mašweu; mme ditsebe tša ka di tlo kwa se se dirwago ba ba ntsogelago.

₁₂Moloki o tlo taga bjalo ka sehlare sa molala; o tlo mela boka morokwana thabeng ya Libanoni.

₁₃Ba šemilwe mo Ngwakong wa Morena, ba hloga ba le malapeng a Modimo wa rena.

₁₄Le ge e ka ba ba batala, ba enywa dienywa, ba hloga botala ba taga,

₁₅E le gore ba tumiše go loka ga Morena, yena lentswe la ka, Moilabošaedi.