SAKARIA 7

₁Ka ngwaga wa bone wa kgoši Dario, ka letšatši la bone la kgwedi ya senyane ya Kisilefe, lentšu la Morena le tletše Sakaria.

₂Ke ge ba Bethele ba romile Saretsere le Regemu Meleke le banna ba ba bego ba na nabo, ba tlile go loba Morena. ₃Ba bolela le baperisita ba Ngwako wa Morena wa mašaba, le baporofeta, ba re: A re ka fela re iša pele go lla ka kgwedi ya bohlano, re ikona dijo ka mokgwa wo re šetšego re o dirile ka nywaga e mentši?

₄Ke mo nna ke tletšwego ke lentšu la Morena, la re: ₅Botša setšhaba sa naga ka moka le baperisita, o re: ge le feditše nywaga e masome a šupago le ikona dijo le itšhulafatša ka kgwedi ya bohlano le ka ya go šupa, a le be le ikona e le go direla nna? ₆Ge le be le eja le enwa, a e be e se go itšela le go inwela?

₇A ga se tšona ditaba tše Morena a bego a di bega ka baporofeta ba kgale mola Jerusalema go sa dutšwe go iketlilwe le dinakaneng tša gona, go sa agilwe le thoko ya borwa le molaleng?

₈Lentšu la Morena la tlela Sakaria la re: ₉Morena wa mašaba o re: Ahlolang ka moahlolelo wa therešo, le dirane ka botho le ka kgaugelo. ₁₀Lesang go pateletša mohlologadi le tšhuana le mmotlana; motho a se ke a gopola wa gabo ka tše mpe.

₁₁Fela, ba ganne go theetša, ba šatalatša melala, ba ithiba ditsebe, ba se ke ba kwa. ₁₂Ba thatafiša dipelo tša bona boka magakabje, ba se kwe melao ya Morena wa mašaba le mantšu a gagwe, a a bego a a roma ka Moya wa gagwe le ka baporofeta ba kgale; ba ba ba welwa ke kgalefo e kgolo ya Morena wa mašaba. ₁₃Bjalo ka ge ba ganne go kwa mola go bitša nna, bjale ge go bitša bona, nna ga ke kwe. O realo Morena wa mašaba. ₁₄Ke ba tšitlantše le ditšhaba tšohle tše ba bego ba sa di tsebe; naga ya gabo ya šala e le marope, e se ne e a e sepelago le e a boelago mo go yona. Naga ye e rategago ba e dirile ya marope.