U-ISAYA 10

“Bazazizwa labo abajamisa imithetho emimbi

nalabo abatlola iimiso eziyingozi

₂ukuze baphambanise amalungelo wabachakileko,

bagalaja iimfanelo zabadududu ebantwini bami

kobana abahlolokazi babe yipangwabo

neentandani zibe bongazimbi babo.

₃Nizokwenzani ngelanga lokuhlunguphazwa,

lokha kuza isiwuruwuru sivela kude na?

Uzokubalekela kubani mayelana nokusizeka,

umnothwenu nizowutjhiya nobani?

₄Awa, abantwabo bazakhukhutha

hlangana nabathunjwa,

bawele hlangana nababuleweko.

Kikho koke lokho

ubukhali bakaSomnini akhange busuke

nesandla sakhe sahlala siphakamile.”

“Azazizwa ama-Asiriya, okuyintonga yobukhali bami,

esandleni sawo kunomtjhiza welaka lami.

₆Ngiwathumela esizweni esinganaZimu,

ngiwayalele ebantwini abangisilingako

ukuze athathe ipango, ahluthule ipahla;

abe abagadange njengedaka eendledlaneni.

₇Kodwana wona bekangakanqophi ukwenza lokho;

lokhu bekungekho emkhumbulwenawo!

Kunalokho, eenhliziyweni zawo bekunokubhubhisa,

iye, ukurhayila izizwe ezinengi.

₈Wona athi,

‘Iinduna zethu azisimakhosi zoke na?

₉IKalino sayiphatha njengeKarikemitjhi,

iRhamathi njenge-Ariphadi

neSamariya njengeDamaseku.

₁₀Ngezandla zethu

sathumba imibuso enabosingazimu neenthombe

ezidlula zeJerusalema neSamariya.

₁₁Lokho esakwenza eSamariya nabosingazimu bayo,

sizakwenza eJerusalema nabozinyana bayo.’ ”

₁₂Lokha uSomandla sele alungise indabakhe

nentabeni yeZiyoni neJerusalema,

uzakuthi:

“Ngizokuhlunguphaza ikosi ye-Asiriya

ngebanga lemisebenzi yokuzikhukhumeza kwehliziywayo

nokuzikhakhazisa kwamehlwayo aziphakamisako

₁₃nangebanga lokobana ithe,

‘Ngamandla wesandla sami ngenze lokhu

iye, ngokuhlakanipha kwami:

Ngisuse imikhawulo yezizwe

ngaphanga namagugwazo

bengaguqisa abanamandla khulu

bezakhamuzi zakhona.

₁₄Njengomuntu ofunyana isihlakana senyoni,

kunjalo-ke isandla sami sifikelela umnotho wezizwe.

Nanjengomuntu obuthelela amaqanda aseleko,

nami-ke ngibuthelele iphasi loke.

Akhange kube khona ophakuza iphiko

namkha ovula umlomo ngokusabisa.’ ”

₁₅Izembe vane khelizikhukhumeze

phezu kogawula ngalo na?

Isarha yona iyazikhakhazisa

phezu kosarha ngayo na?

Umtjhiza wona uyamjuguja owuphakamisako

namkha intonga iphakamise ongasiso isigodo na?

₁₆Yeke, uSomandla, uSomnini uMninimandlawoke

uzokukhehlisa iimbitjhimbitjhi zekosi ye-Asiriya;

iye, uzokuthumela umgomani ovutha njengomlilo

hlangana nabahloniphekako bayo.

₁₇Umkhanyo ka-Israyeli uzakuba mlilo,

iye, oCwengileko wakhe abe malangabi;

ngelanga linye nje umlilo lo uzakutjhisa

bewuqothule ameva neminga ye-Asiriya.

₁₈Uzakubhubhisa ubuhle behlathi

nemitjhana yakhona,

iye, amatjhwaba nesiqu.

I-Asiriya izakuba njengokuqobeka kowako.

₁₉Nemithi eseleko yehlathi layo izakuba libinzana

ngitjho nomntwana uzayibala abe ayitlole.

okutjho abasindileko bendlu kaJakopo

bazazeyama ngeqiniso kuSomnini,

ongoCwengileko wakwa-Israyeli.

Angekhe basazeyama ngaloyo owabamukulako.

₂₁Abasindileko bazakubuya

iye, imisalela kaJakopo izakubuyela kuZimu onamandla.

₂₂Wena Israyeli, nanyana abantu bakho

bangangetjhwabatjhwaba yelwandle,

kuzakubuya imisalela kwaphela.

Ukubhujiswa kwakho sekumenyezelwe,

kuzakupheleliswa ngokulunga.

₂₃USomandla, uSomnini uMninimandlawoke

umemezele waqeda:

lokho ukwenze elizweni loke.

“Nina bantu bami enihlala eZiyoni,

ningesabi i-Asiriya nayinibetha ngentonga

iphakamisela umtjhiza ngakini

njengokwenza kweGibhide.

₂₅Masinyana ukusilingeka kwami kini kuzakuphela

nobukhali bami buzakunqotjhiswa

ekubhujisweni kwe-Asiriya.”

₂₆USomnini uMninimandlawoke uzakujuguja isibebhu

ngehla kwama-Asiriya

kube njengalokha amadlha amaMidiyani

edwaleni le-Orebi.

Intongakhe izakuba ngehla kwelwandle

uzayiphakamisa njengombana ayiphakamisa eGibhide.

₂₇Mhlokho, umthwalo wekosi ye-Asiriya

uzakususwa emahlombenenu

nejogi layo entanyenenu lizakwephulwa.

Yenyukela phambi kwepango enomnotho,

₂₈yadlula e-Ayathi,

yaya eMigroni

yatjhiya ipahlayo eMikimatjhi.

₂₉Nje-ke ibutho layo lavundla umrhoba

laqupha ubusuku eGeba.

IRama iyathuthumela,

iGibeya yakwaSawula iyabaleka.

₃₀Rhahlawula wena ndodakazi yeGalimu!

Ulalele wena muzi weLayitjha!

Phendula wena Anatothi!

₃₁IMadimena ibalekile;

izakhamuzi zeGebimu zibuthelela ipahlazo ebubhacweni.

₃₂Namhlanjesi ikosi leyo

izabe ijame eNobi

ikhombe ngesandla sayo

entabeni yethempeli leZiyoni,

embundwini weJerusalema.

₃₃Madekhethu!

USomandla, uSomnini uMninimandlawoke

uzokukghedlha iingala ngamandla amakhulu.

Imithi ephakamileko izakugawulwa,

iye, emide iwele phasi.

₃₄Izakurhadla iinthurhana ngezembe;

iLibhanoni izokuwa phambi koSomandla.