UJOBHO 13

₁“Amehlwami abone koke lokhu,

neendlebe zami zakuzwa zakulemuka.

₂Enikwaziko nami ngiyakwazi,

angisingaphasi kwenu.

₃Kodwana mina ngizakhuluma noSabekako,

ngiphikisane noZimu.

₄Nakungini khona, ningininda ngamanga,

niziinyanga ezingazisiko nokanyana nje.

₅Kwangathi ningathula nithi du,

lokho kuzakuba kuhlakanipha kini!

₆Akhese nizwe ipikiswanami,

nilalele ukusola komlomami.

₇Ningakhulumela uZimu ngobumbi na?

Ningamkhulumela ikohliso na?

₈Ningakhetha ubuso nanisebandla,

nikhulume esikhundleni sakaZimu na?

₉Nizakuba yini nange anganihlola na?

Nizamkhohlisa njengalokha nanikhohlisa umuntu na?

₁₀Ngambala uzanisola,

nakube nikhetha ubuso ngemsitheleni.

₁₁Ubukhosi bakhe abuzunethusa na?

Ukumesaba kwenu akuzunembatha na?

₁₂Iinkolelo zenu zizizaga zomlotha,

iimpendulo zenu ngezomdaka.

₁₃Thulani phambi kwami!

Mina ngizakukhuluma.

Nanyana ngingehlelwa yini, akusenandaba.

₁₄Ngizakubeka intamami esigodweni,

iye, ngibeke ipilwami esandleni sami.

₁₅Nanyana uZimu azangibulala, angizukulinda,

kodwana ngizakuvikela iindlela zami kuye.

₁₆Lokhu kungaba yisindiswami,

ngombana onganaZimu angeze ajama phambi kwakhe.

₁₇Lalelani kuhle amezwami,

ihlathululwami izwakale eendlebeni zenu.

₁₈Qala-ke, ngibeke indabami ngokuhlelekileko,

ngiyazi bonyana anginamlandu.

₁₉Ngubani wenu ongaphikisana nami?

Nakunjalo, ngizakuthula ngithi du,

bekube kumhla ngifako.”

₂₀“Zimu, nginikela izinto ezimbili kwaphela,

khona-ke angeze ngazifihlela wena:

₂₁Isandla sakho asibe kude nami,

ukwesabeka kwakho kungangethusi.

₂₂Nje-ke nawungibizela ebandla, ngizaziphendulela,

namkha kukhulume mina, wena-ke uziphendulele.

₂₃Zingangani iimphoso nezono zami na?

Yewungilemukise isiphambeko nesono sami.

₂₄Kubayini ufihla ubuso bakho,

ungithathe njengesitha sakho?

₂₅Wethusa ikari eliphetjhulwa mumoya,

ugijimise ihlanga elomileko na?

₂₆Utlola imilandwami ibe munyu safuthi,

ungigomise ilifa lezono zobutjha bami.

₂₇Ubophelela iinyawo zami ngesimbi esigodweni,

uqalisise zoke iindlela zami,

ubeke amatshwayo wasafuthi etendeni yeenyawo zami.

₂₈Lokho ukwenza emuntwini

obola njengesibozi,

iye, njengesambatho esigonywa mvunya.