IZAGA 28

₁Okhohlakeleko ubaleka nanyana kungekho omgijimisako,

kodwana abalungileko banesibindi njengebhubezi.

₂Ilizwe nalinokuvukelana, vane linababusi abanengi,

kodwana onengqondo nelwazi wenza kube nokuthula.

₃Ochakileko nagandelela abachakileko,

ufana nezulu elirhurhula litjhiye kungasenasivuno.

₄Abalahla umthetho badumisa iinkhohlakali,

kodwana abawugcinako balwisana nazo.

₅Abantu abonakeleko abakuzwisisi ukulunga,

kodwana abafuna uSomnini bakuzwisisa ngokupheleleko.

₆Singcono isichaka esineendlela ezimsulwa

kunenjinga eneendlela ezikhohlakeleko.

₇Ogcina umthetho mntwana ozwisisako,

kodwana umkhozi wamahlongandlebe uhlazisa uyise.

₈Owandisa umnonwakhe ngenzalo ehlukahlukeneko,

uyibuthela omunye ozakuba nomusa kabachakileko.

₉Ofulatheza indlebakhe kobana angezwa umthetho,

ngitjho nemithandazwakhe isinyenyiso.

₁₀Orholela abaqotho eendleleni zobukhohlakali,

uzakurhohlomela ngemgodini azenzele wona,

kodwana abamsulwa bazakufumana ilifa elihle.

₁₁Injinga ingazitjela bona ihlakaniphile,

kodwana isichaka esinokuzwisisa sibona amaqhingayo.

₁₂Abalungileko lokha nabajekezelako,

kuba nedumo elikhulu,

kodwana abakhohlakeleko nababa barholi,

abantu bayabhaca.

₁₃Ofihla iimphambeko zakhe akaphumeleli,

kodwana ozivumako abe azitjhiye ufunyana isirhawu.

₁₄Ubusisiwe umuntu ohlala esaba uSomnini njalo,

kodwana oqinisa ihliziywakhe uwela engozini.

₁₅Njengebhubezi elibhodlako namkha ibhere elibhozomelako,

unjalo nokhohlakeleko nabusa phezu kwabadududu.

₁₆Umbusi onganangqondo

udlondlobala ngokususa abantu elifeni labo,

kodwana ozonda inzuzo engakalungi

uzakwandisa amalangakhe.

₁₇Umuntu owurubajwa sisazela sokubulala,

uzakuhlala abalekela ethuneni;

akungabi nomuntu omvimbako.

₁₈Onekambo emsulwa uyaphepha,

kodwana oneendlela zokonakala uzakuwa msinyana.

₁₉Otjheja amasimakhe uzakuba nenala,

kodwana ogijimisana nelize uzakuba nobuchaka.

₂₀Othembakeleko uzakuba neembusiso ezinengi,

kodwana opharhazela kobana anjinge,

uzakuhlunguphazwa.

₂₁Akusikuhle ukukhetha ubuso ekugwebeni,

kodwana umuntu uyaphambuka

ukuze afumane igedzwana lesikwa.

₂₂Umuntu odimanako upharhazela bona anjinge,

kodwana akayeleli bonyana ubuchaka bumlindele.

₂₃Osola umuntu, ekugcineni uzakufumana umusa

ukudlula loyo onelimu elibutjhelelezi.

₂₄Odlelezela uyise nanyana unina

bese athi, “Akusiso isiphambeko lokho”,

umukhozi waloyo obhubhisako.

₂₅Umuntu omarhamaru uvusa ukucabana,

kodwana othembela kuSomnini uzakunotha.

₂₆Othembela ekwazini kwakhe usidlhadlha,

kodwana okhamba ngokuhlakanipha uyaphepha.

₂₇Opha abachakileko, angeze aswela litho,

kodwana obadima amehlo

ufumana amanikelela amanengi.

₂₈Iinkhohlakali naziba barholi, abantu bayabhaca;

kodwana nazibhubhako, abalungileko bayanda.