IZAGA 30

Isitjho sendoda le sithi:

“Ngiphele amandla, Zimu!

Iye, ngiphele amandla!

Ngiphelelwe!

₂Mbala, ngisiyila ukudlula boke;

anginakho ukuzwisisa komuntu.

₃Azange ngifunde ukuhlakanipha,

azange ngibe nelwazi loCwengileko.

₄Ngubani owakhe wenyukela ezulwini godu wabuya?

Ngubani owabuthelela ummoya etendeni yezandla zakhe?

Ngubani ogubuzese amanzi ngengubakhe?

Ngubani odzimelelise amagumbi wephasi?

Ngubani ibizo lakhe nebizo lendodanakhe?

Yewungitjele nakube uyazi!”

₅Elinye nelinye ilizwi lakaZimu licwebile,

usihlangu salabo ababalekela kuye.

₆Ungangezeleli emazwinakhe,

nakungasinjalo uzakusola

akukhombise bonyana umleyimanga.

₇Kunezinto ezimbili engizikhombela kuwe, Somnini;

ungangigodleli zona nangisaphilako:

₈Dedisa ikohliso namanga kimi;

ungangiphi ubuchaka namkha ubunjinga,

kodwana ngipha kwaphela okwaneleko.

₉Nangingasutha khulu ngizakukhohlwa

ngithi: “Konje phana ngubani uSomnini loyo?”

Nangingaswela ngizakweba,

ngokwenza njalo, ngihlambalaze ibizo lakaZimami.

₁₀Ungakhulumi kumbi ngenceku kumniniyo,

nakungasinjalo izakuthuka, ube semlandwini.

₁₁Kunalabo abathuka aboyise,

bangabusisi abonina.

₁₂Kunalabo abazibona bamsulwa,

kodwana babe bangakahlambuluki ekungcoleni kwabo.

₁₃Kunalabo abazitjhayako,

bathwala iimpumulo.

₁₄Kunalabo abanamazinyo aziinsabula

nemihlathabo imimikhwa,

kobana barhiribidele abachakileko ephasini

nabadududu hlangana nabantu.

₁₅Ikhalani linamadodakazi amabili,

alila athi: “Sipha! Sipha!”

Kunezinto ezintathu ezinganelisekiko,

iye, ezine ezingakghoni ukuthi: “Sesanele!”

₁₆Zona ngilezi:

indawo yabafileko,

isibeletho esiyinyumba,

inarha enganelisekiko ngamanzi

nomlilo ongatjhoko uthi: “Nganele!”

₁₇Amehlo anyefula uyise,

adelela ukulalela unina,

azakugobolwa magubulu emmangweni,

adliwe madlanga.

₁₈Kunezinto ezintathu ezisimanga kimi,

iye, ezine engingazizwisisiko:

₁₉indlela yedlanga esibhakabhakeni,

indlela yenyoka emadwaleni,

indlela yomkhumbi phakathi kwelwandle

nendlela yesokana entombini.

₂₀Nasi indlela yesihlobongi:

Siyagoma bese sizisula umlomo,

sithi: “Akunanto embi engiyenzileko.”

₂₁Ngaphasi kwezinto ezintathu inarha iyahlengezela,

iye, ezine eziyenza ingabambeleli:

₂₂inceku nayiba yikosi,

iindlhadlha nazisuthako,

₂₃umfazi osisaliwakazi emendweni

nencekukazi esele ithathele umniniyo indawo.

₂₄Kunezinto ephasinapha ezincani,

kodwana zihlakaniphe ngokweqileko:

₂₅Abonontsitsinyani balibutho elinganamandla,

kodwana ehlobo bazilungiselela ukudla kwabo;

₂₆iimbila zilibutho elinganamandla,

kodwana zakha iinkhundlana zazo emadwaleni;

₂₇isikhonyani asinakosi,

kodwana sizihlela soke ngeenqhema;

₂₈isibhadwa ungasibamba ngesandla,

kodwana sitholakala nesigodlweni.

₂₉Kunezinto ezintathu ezikhamba ngejamo,

iye, ezine ezinamaqa anejamo:

₃₀ibhubezi eliyikosi yeenyamazana elingahlehliswa lilitho;

₃₁mkukurumbu okhambela phezulu,

ipongo

nekosi ongekhe wajamelana nayo.

₃₂Nakube wenze ubudlhadlha, waziphakamisa,

namkha nawutlame ubumbi,

beka isandla emlonyenakho!

₃₃Njengombana ukuphehla amakghamatha kuveza umlaza

nokutlhorholoja ipumulo kuveza iingazi,

kunjalo nokutlhorholoja ilaka kuveza ukucabana.