AMARHUBO 37

Ungathakasi ngabenzi bobumbi,

ungazikhathazi ngabangakalungi

₂ngombana bazakutjhwaba msinyana njengotjani,

iye, babune njengeemila ezilihlaza.

₃Nawethemba uSomnini,

wenze okulungileko,

khona-ke uzakuhlala enarheni,

wename unzinzile.

₄Thaba kuSomnini,

uzakunikela iimfiso zehliziywakho.

₅Nikela indlelakho kuSomnini, umethembe,

yena uzakwenzela okulandelako:

₆Uzakwenza ukulunga kwakho kukhanye njengokusa

nobumsulwa bakho njengelanga emini.

₇Thula phambi kwakaSomnini, uqalelele kuye;

ungathakasi ngophumelelako endlelenakhe,

iye, ngomuntu owenza okuphambeneko.

₈Lisa ukuhluthuleka, utjhide elakeni,

ungathakasi ngabenzi bobumbi!

Lokho sekubanga ukona kwaphela.

₉Abenzi bobumbi bazakususwa,

kodwana abarhuluphela uSomnini

bazakuzuza inarha.

₁₀Kuzakuba muzuzwana

isikhohlakali singasabi khona

nalokha uhlola indawaso,

awusoze usasifunyana.

₁₁Kodwana abathobekileko

bazakuzuza inarha,

bathabele ukuthula okukhulu.

₁₂Isikhohlakali sisongela olungileko,

simgugudela amazinyo,

₁₃kodwana uSomandla uyasihleka,

uyazi bonyana ilanga laso liyeza.

₁₄Iinkhohlakali zirhwatjha isabula,

zigobe imisubazo,

kobana ziwise abachakileko nabadududu

bezirhayile abaneendlela eziqotho.

₁₅Isabulazo izakuhlaba iinhliziyo zazo

nemisubi yazo iphohloke.

₁₆Okuncani anakho olungileko,

kungcono kunomnono weenkhohlakali ezinengi.

₁₇Mbala, imikhono yeenkhohlakali izakwephulwa,

kodwana uSomnini uyabasekela abalungileko.

₁₈USomnini uyawazi amalanga walabo abamsulwa

nelifa labo lizakuhlala bekube nini nanini.

₁₉Ngesikhathi sobunzima angeze badaniswa,

emalangeni wendlala bazakusutha,

₂₀kodwana iinkhohlakali zizakubhubha;

izitha zakaSomnini zizakunyamalala njengobuhle bamadlelo

anyamalala entuthwini.

₂₁Isikhohlakali siyaboleka, singasabuyiseli,

kodwana olungileko unesirhawu, uyaphana.

₂₂Labo ababusiswe nguSomnini, bazakuzuza inarha,

kodwana abanikelelwe nguye, bazakujutjwa.

₂₃Lokha uSomnini nathokoziswa yindlela yomuntu,

uqinisa amagadangwakhe.

₂₄Nanyana akhutjhwa, akasoze awele phasi

ngombana uSomnini uhlala ambambe ngesandla sakhe.

₂₅Gade ngimutjha, manje sengimdala,

nokho angizange ngibone olungileko atjhiyiwe

nesapho lakhe ligogela ukudla.

₂₆Yena ungophanako nobolekisanako

nesapho lakhe lisibusiso kuye.

₂₇Deda kokumbi, wenze okuhle

ukuze nini nanini uhlale enarhenakho.

₂₈Ngambala uSomnini uthanda ukulunga,

akabatjhiyi abathembekileko bakhe.

Iye, abalungileko bazakulondolozwa isiphelani,

kodwana isapho leenkhohlakali lizakujutjwa.

₂₉Abalungileko bazakuzuza inarha,

bahlale kiyo nini nanini.

₃₀Umlomo wolungileko uveza ukuhlakanipha;

kuthi ilimu lakhe likhulume ukulunga.

₃₁Umthetho kaZimakhe usehliziywenakhe

neenyawo zakhe azitjheleli.

₃₂Isikhohlakali selusa olungileko

ngombana simsongele ukumbulala.

₃₃USomnini akasoze aliselela olungileko

esandleni sesikhohlakali:

Angeze avume alahlwe

lokha nadoselwa ebandla.

₃₄Rhuluphela uSomnini, ukhambe endlelenakhe,

yena uzakuphakamisa, uzuze inarha;

ubone ukususwa kweenkhohlakali.

₃₅Ngisibonile isikhohlakali sinobudlova,

siziphakamisa njengomuthi wendabuko onamakari,

₃₆kodwana nawudlulako godu,

qala, umuthi lowo awusekho;

nasifuna isikhohlakaleso,

akhange sisatholakala.

₃₇Qalisisa omsulwa, ubeke ilihlo koqotho:

Kunelikusasa emuntwini onokuthula.

₃₈Kodwana abaphambukileko

bazakubhujiswa ndawonye

nelikusasa leenkhohlakali lizakususwa.

₃₉Ukusindiswa kwabalungileko kuvela kuSomnini,

isiphephelo sabo esikhathini sobunzima.

₄₀USomnini uyabasiza abe abaphephise;

iye, ubaphephisa eenkhohlakalini;

ubasindisa ngombana baphephela kuye.