Saule o hlorisa Davida
1Saule a bolella Jonathane, mora oa hae, le bahlanka ba hae bohle, hore ba bolaee Davida. Empa Jonathane, mora oa Saule, o ne a rata Davida haholo. 2Jonathane a bolella Davida, a re: “Saule, e leng ntate, o rata ho u bolaea. Ka baka leo, kea u rapela: Hosasane u itlhokomele, u ipate moo ho seng motho ea tsebang. 3'Na ke tla tsoa le ntate, ke eme pel'a hae ha a le naheng, moo u tla be u ipatile teng, ebe ke bua ka uena ho eena. Ke tla u bolella seo ke tla se utloa.”
4Jonathane a bua Davida hantle ho Saule, ntat'ae, a re ho eena: “Khosi e se ke ea siteloa Davida, mohlanka oa eona, hobane Davida ha aa u siteloa, etsoe le liketso tsa hae e bile tse ntle ho uena. 5O ile a ipea kotsing, a bolaea Mofilesita, 'me ka eena Morena a namolela Baiseraele bohle ka mokhoa o hlollang. Le uena u bone ua ba ua thaba. Joale ke ka baka la'ng ha u rata ho siteloa mali a se nang molato ka ho bolaea Davida ntle ho lebaka?”
6Saule a mamela keletso ea Jonathane, 'me a hlapanya, a re: “Ka Morena ea phelang, Davida ha a ka ke a bolaoa.”
7Eaba Jonathane o bitsa Davida, o 'molella litaba tsena tsohle. Jonathane a tlisa Davida ho Saule, 'me Davida a boela a phela pel'a Saule joaloka pele.
Saule o leka ho bolaea Davida
8Ha boela ha qhōma ntoa. Davida a futuha, a loantša Bafilesita; a ba etsa mofela hoo ba bileng ba 'maleha.
9Moea o mobe, o tsoang ho Morena, oa theohela holim'a Saule ha a ntse a lutse ka tlung ea hae, a tšoere lerumo, Davida eena a ntse a letsa harepa. 10Saule a leka ho hlabella Davida leboteng ka lerumo. Empa Davida a re thee! Eaba Saule o hlaba lebota ka lerumo. Davida a baleha, 'me a phonyoha hona bosiung boo.
Davida o pholosoa ke Mikale
11Ka bona bosiu boo Saule a rōmela maqōsa ho ea lalla Davida tlung ea hae, e le hore a tle a 'molaee ka la hosasane. Empa Mikale, mohats'a Davida, a mo tsebisa taba ena, a re: “Haeba u ke ke ua baleha bosiung bona, hosasane u tla bolaoa.” 12Mikale a lepelleletsa Davida kantle, ka fesetere. Davida a ipha limenyane, a phonyoha. 13Joale Mikale a nka molingoana oa lelapa, a o robatsa liphateng, a o samela mosamo oa boea ba lipōli, a o apesa kobo.
14Saule a rōmela maqōsa ho ea tšoara Davida, empa Mikale a re: “Davida oa kula.”
15Saule a rōmela maqōsa hore a e'o bona Davida, a ba a re ho 'ona: “Le mo tlise koano ka liphate tsa hae, ke tl'o 'molaea!” 16Eitse ha maqōsa a kena ka ha Davida, a fumana molingoana oa lelapa o sametsoeng mosamo oa boea ba lipōli, o robalitsoe liphateng.
17Saule a re ho Mikale: “Ke ka baka la'ng ha u nthetsitse tjee, u bile u tlohetse le sera sa ka se iketse, se phonyohile?”
Mikale a re ho Saule: “O ile a re ho 'na: ‘Ntlohele ke tsamaee, ho seng joalo ke tla u bolaea!’ ”
Davida o balehela ho Samuele
18Eaba Davida oa phonyoha, oa baleha, a ba a ea fihla Rama, ho Samuele. A phetela Samuele tsohle tseo Saule a mo entseng tsona. Bo-Davida le Samuele ba tsamaea, ba ea phela Naiote. 19Saule a tsebisoa, ha thoe: “Davida o Naiote.” 20Joale Saule a rōma maqōsa ho ea tšoara Davida. Ha maqōsa a bona sehlopha sa baporofeta se ntse se porofeta, Samuele a se eteletse pele, Moea oa Molimo oa theohela holim'a maqōsa ao a Saule, 'me le 'ona a porofeta. 21Ha Saule a tsebisoa taba ena, a boela a rōma maqōsa a mang, 'me le 'ona a fihla a porofeta. Saule a boela a rōma maqōsa lekhetlo la boraro, 'me le 'ona a fihla a porofeta.
Saule har'a baporofeta
22Joale Saule a ikisa Rama ka nama, a fihla selibeng se seholo se Seku. A botsa, a re: “Bo-Samuele le Davida ba kae?”
E mong a re: “Ba Naiote e Rama.” 23A tloha moo, a ea Naiote e Rama. Eaba Moea oa Morena o theohela le holim'a Saule, a tsamaea a ntse a porofeta, a ba a ea fihla Naiote e Rama. 24Le eena a hlōbōla liaparo tsa hae, a porofeta kapele ho Samuele. A qeta letsatsi leo lohle, le bosiu boo bohle a paqame fatše, a tsotse. Ke kahoo ho bileng le polelo e reng: “Na Saule le eena ke e mong oa baporofeta?”
