Hamane o rera ho timetsa Bajuda
1Kamora' tsena, khosi Ahashuerushe a phahamisa Hamane, mora oa Hamedata oa Moakake, a mo etsa mookameli oa mahosana 'ohle a neng a sebetsa le eena. 2Bahlanka bohle ba khosi, ba neng ba le monyakong oa khosi, ba ne ba obama kapele ho Hamane, ba isa hlompho. Khosi e ne e ile ea ba laela ho etsa joalo ho Hamane. Empa Moredekai eena ha aa ka a obamela Hamane, leha e le ho isa hlompho ho eena.
3Joale bahlanka ba khosi, ba neng ba le monyakong oa khosi, ba re ho Moredekai: “Ke ka baka la'ng ha u tlōla taelo ea khosi?” 4Ka letsatsi le leng le le leng bahlanka ba khosi ba 'na ba buisana le eena hore a phethe taelo ea khosi, empa a se ke a ba mamela; kahoo ba bolella Hamane taba ena, hore ba tle ba bone hore na o tla etsa joang, hobane Moredekai o ne a ile a ba bolella hore eena ke Mojuda.
5Ha Hamane a bona hore Moredekai o hana ho mo obamela, le ho isa hlompho ho eena, a lōlōma ke bohale. 6Hoba Hamane a utloe hore Moredekai ke oa sechaba sefe, a bona ho sa tšoanele hore a bolaee eena feela. Eaba o rera hore a bolaee sechaba sohle sa habo Moredekai, e leng Bajuda bohle ba linaheng tsohle tse busoang ke Ahashuerushe.
7Ka khoeli ea pele, e leng khoeli ea 'Mesa, selemong sa leshome le metso e 'meli sa puso ea Ahashuerushe, ha etsoa Pure, e leng lōtho, moo Hamane a ntseng a le teng. Hona ha 'na ha etsoa ka tsatsi le leng le le leng la khoeli e 'ngoe le e 'ngoe, ho ea fihla khoeling ea leshome le metso e 'meli, e leng khoeli ea Hlakubele.
8Eaba Hamane o re ho khosi Ahashuerushe: “Linaheng tsohle tsa 'muso oa hao, ho na le sechaba se itseng, se hasa-hasaneng har'a lichaba tsohle tse 'musong oa hao. Melao ea sechaba seo e fapane le ea lichaba tsohle tse ling, 'me sechaba seo ha se bōlōke melao ea khosi. Ka baka lena, khosi e ke ke ea fumana molemo oa letho ka ho tlohela sechaba seo. 9Haeba khosi e ka khahloa, a ho ke ho ngoloe taelo ea hore chaba seo se timetsoe, 'me chelete e tla lefa ba tla phetha mosebetsi oo, e leng silefera e etsang boima ba likilo tse likete tse makholo a mararo le mashome a mane, ke tla e kenya letlōleng la khosi.”
10Eaba khosi e rōla lesale la eona la monoana, e le roesa Hamane, mora oa Hamedata oa Moakake, eo e neng e le sera sa Bajuda. 11Khosi ea re ho Hamane: “Ke u nea chelete eo, ke u nea le sechaba seo, hore u iketsetse borata ka sona.”
12Ka letsatsi la leshome le metso e meraro la khoeli ea pele bangoli ba khosi ba bitsoa, ba ngolla balaoli ba khosi, le babusi ba linaha tsohle le mahosana a linaha tsohle, ho ea kamoo Hamane a ileng a laela kateng. Mangolo ana a ngolloa lichaba tsohle ka mengolo ea tsona le ka lipuo tsa tsona; a ngoloa lebitsong la khosi Ahashuerushe, a tiisoa ka tiiso ea lesale la khosi la monoana. 13Maqosa a isa mangolo ana linaheng tsohle tsa khosi, hore ka tsatsi le le leng, la leshome le metso e meraro la khoeli ea leshome le metso e 'meli, e leng khoeli ea Hlakubele, ho tle ho timetsoe, bo bolaoe, ho ripitloe Bajuda bohle, ba bacha le maqheku, masea le basali, 'me ho hapuoe tsohle tsa bona. 14Kopi ea lengolo lena e ne e lokela ho phatlalatsoa e le molao linaheng tsohle, hore sechaba sohle se tsebe, 'me se itokisetse letsatsi leo.
15Maqosa a matha ka potlako, a susumetsoa ke taelo ea khosi, 'me taelo eo ea phatlalatsoa Shushane, motseng oa bokhosi. Joale khosi le Hamane ba lula, ba e-noa, empa motse oa Shushane oona o ne a ferekane.
