1Eare ha Ragele a bona hore ha a tsoalle Jakobo bana, a hōnōhela ngoan'abo, 'me a re ho Jakobo: “Mphe bana, ho seng joalo ke tla shoa!”
2Jakobo a halefela Ragele haholo, 'me a re: “Na 'na ke Molimo, eena ea u entseng nyōpa?”
3Ragele a re: “Bileha, lekhabunyane la ka, ke enoa. Kena likobong tsa hae, e le hore a tle a ntsoalle bana ba lengoele, hore ke be le bana ka eena.”
4Eaba o nea Jakobo lekhabunyane la hae Bileha hore e be mosali oa hae. 5Bileha ea e-ba moimana, a tsoalla Jakobo mora. 6Joale Ragele a re: “Molimo o nkahloletse, ebile o utloile thapelo ea ka, 'me o mphile mora.” Ka baka leo, a mo rea lebitso la Dane.
7Bileha, lekhabunyane la Ragele, ea boela ea e-ba moimana, 'me a tsoalla Jakobo mora oa bobeli. 8Joale Ragele a re: “Ke loanne lintoa tse matla le ngoan'eso, 'me ke hlōtse.” Eaba o mo rea lebitso la Nafthali.
9Ha Lea a bona hore a ke ke a hlola a beleha, a nka lekhabunyane la hae Silepa, 'me a le nea Jakobo hore e be mosali oa hae. 10Joale Silepa, lekhabunyane la Lea, a tsoalla Jakobo mora. 11Lea a re: “Hona ke lehlohonolo!” Eaba o mo rea lebitso la Gade.
12Silepa, lekhabunyane la Lea, a tsoalla Jakobo mora oa bobeli. 13Lea a re: “'Na ke lehlononolo. Basali ba tla mpitsa ea lehlohonolo!” Eaba o mo rea lebitso la Ashere.
14Ka nako eo ho kotuloang koro ka eona, Rubene a fumana litholoana tsa moratiso masimong, 'me a li tlisetsa 'm'ae Lea. Joale Ragele a re ho Lea: “Ak'u mphe hle, tse ling tsa litholoana tsa moratiso tsa mora oa hao.”
15Empa Lea a re ho eena: “Na ke ntho e nyenyane ha u nkile monna oa ka, 'me joale u rata ho nka le litholoana tsa moratiso tsa mora oa ka?”
Ragele a araba, a re: “E, a ka 'na a robala le uena bosiung bona, ha u ka mpha litholoana tsa moratiso tsa mora oa hao.”
16Mantsiboea, ha Jakobo a khutla masimong, Lea a tsoa ho ea mo khahlanyetsa, 'me a re ho eena: “U tšoanetse ho tla robala le 'na bosiung bona, hobane ke u rekile ka litholoana tsa moratiso, tsa mora oa ka.” Eaba o robala le eena bosiung boo.
17Molimo a mamela Lea, ea e-ba moimana, 'me a tsoalla Jakobo mora oa bohlano. 18Lea a re: “Molimo o mphile moputso oa ka, hobane ke ile ka nea monna oa ka lekhabunyane la ka.” A mo rea lebitso la Isakare.
19Lea ea e-ba moimana hape, 'me a tsoalla Jakobo mora oa botšelela. 20Joale Lea a re: “Molimo o mphile mpho e ntle, 'me kajeno monna oa ka o tla lula ha ka, hobane ke mo tsoaletse bara ba tšeletseng.” Eaba o rea mora eo lebitso la Sebulone. 21Kamora' mona a tsoala morali, a mo rea lebitso la Dina.
22Molimo a hopola Ragele, a mo mamela, a mo fa thari. 23Ragele ea e-ba moimana, a tsoala mora, 'me a re: “Molimo o tlositse sekhobo sa ka.” 24A rea mora enoa lebitso la Josefa, a re: “Morena a ke a nkekeletse mora e mong!”
Leruo la Jakobo
25Ragele ha a se a tsoetse Josefa, Jakobo a re ho Labane: “Ntokolle, ke ee haeso, nahong ea heso. 26'Nee basali ba ka le bana ba ka, bao ke u sebelelitseng ho ba fumana, 'me u ntokolle ke tsamaee, hobane u tseba kamoo ke ileng ka u sebeletsa kateng.”
27Empa Labane a re ho eena: “Ak'u nkhauhele, hobane ke lemohile hore Morena o ntlhohonolofalitse ka baka la hao.” 28A ba a re: “Bolela moputso oo u o batlang, 'me ke tla u nea oona.”
29Jakobo a re ho Labane: “Uena u tseba kamoo ke ileng ka u sebeletsa kateng, le kamoo ke atlehisitseng mehlape ea hao kateng. 30Pele ke fihla u ne u e-na le lintho tse seng kae, empa joale li eketsehile, ke mehlapehali, 'me Morena o u hlohonolofalitse ka tsohle, hohle moo ke neng ke e-ea teng. Joale 'na ke tla sebeletsa lelapa la ka neng?”
31Labane a re: “Ke u nee eng?”
Jakobo a re: “U se ke ua 'nea letho; haeba u ka nketsetsa ntho ena, ke tla boela ke lise mohlape oa hao hape, ke o baballe. 32Ke tla hlahloba mohlape oohle oa hao kajeno, ke khethe linku tsohle tse tšasana, le tse thoboshana, le likonyana tsohle tse ntšo, le lipoli tse rolo, le tse pulutsoana. Tseo he, e tla ba tsona moputso oa ka. 33Ho tšepahala ha ka ho tla bonahala kamoso, ha u e-tla hore re hlahlobisane tsa moputso oa ka. Lipoli tsohle tse seng rolo, le likonyana tse seng ntšo, ha li ka fumanoa mohlapeng oa ka, e tla ba ke li utsoitse.”
34Eaba Labane o re: “Ke hantle! Ha ho be joalokaha u bolela.”
35Ka lona letsatsi leo Labane a khetha liphooko tsohle tse rolo, le tse putsoa, le lipoli tsohle tse roloana, le tse pulutsoana, le tsohle tse phatšoana, le likonyana tsohle tse ntšo, a li siea matsohong a bara ba Jakobo. 36Tsa khannoa ho isoa sebakeng se lekanang le leeto la matsatsi a mararo, ho tloha moo eena le Jakobo ba neng ba le hona teng, 'me Jakobo a lisa mehlape ea Labane e setseng.
37Jakobo a nka lithutsoana tse tala tsa lifate tsa popoliri, le tsa perekisi, le tsa sefate sa hoki, a li ebola, a li etsa metaka e mesoeu, 'me a hlahisa bosoeu bo ho tsona. 38A bea lithutsoana tseo a li ebotseng kapele ho mehlape ka linoellong tsa metsi, moo mehlape e palesitseng e noelang teng. 39Mehlape ea emara ha e le pel'a lithutsoana ea tsoala tse mebala-bala: tse rolo, le tse pulutsoane, le tse tšasana, le tse thoboshana.
40Jakobo a khetha likonyana, empa a etsa hore liphatla tsa mohlape oa Labane, oa tse ntšo, li talimane le mohlape oa tse tšasana. Eaba o khethela mohlape oa hae kathōko, a se ke a o kopanya le mohlape oa Labane.
41Jakobo o ne a ee a nehele ha mohlape o khotše, a bee lithutsoana kapele ho mohlape, ka linoellong, hore li tle li emare li le kapele ho lithutsoana. 42Empa ha mehlape e fokotse, o ne a sa bee lithutsoana, 'me tse tsoaloang li fokotse e ne e e-ba tsa Labane, athe tse matlafetseng e ne e e-ba tsa Jakobo. 43Ka mokhoa o joalo Jakobo a rua ka ho fetisisa, 'me a ba le mehlape e mengata, le makhabunyane, le bahlanka, le likamele, le litonki.
