LIPESALEMA 141

Morena, ke ipiletsa ho uena,

ak'u mpotlakele;

sekéhela lentsoe la ka tsebe,

ha ke ipiletsa ho uena.

₂Thapelo ea ka

e nyolohele ho uena,

e nyolohe joaloka mokubetso,

ke phahamise matsoho a ka

e le nyehelo ea mantsiboea.

₃Morena, ak'u bee molebeli,

u 'mee molomong oa ka,

u lise monyako oa molomo oa ka;

₄pelo ea ka e se ke ea sekama,

ea sekamela linthong tse mpe.

Ke se ke ka etsa

mesebetsi ea bokhopo

mokhatlong oa batho ba sa lokang;

ke se ke ka latsoa menate ea bona.

₅Ho molemo

ha ke otloa ke ea lokileng,

ke khalemeloa ke eena;

hoo ke ole eo hlooho ea ka

e ke keng ea e hana,

ke tla 'ne ke rapele

leha ba khopo ba ntšoenya.

₆Mohla baahlōli ba bona

ba liheloang lilomong,

ke hona batho ba tla tseba

hore mantsoe a ka e ne e le a 'nete.

₇Joalokaha ho khathoa,

ho taboloa thite,

masapo a bona

a tla qhalanngoa joalo,

a qhalanngoe

khorong ea Qalo ea Bafu.

₈Morena, mong'a ka,

mahlo a ka a talimile ho uena,

ke tšabela ho uena,

se ntlohelle hore ke timele.

₉Nqobise sefi

seo ba nchehileng ka sona,

le mamena

a ba etsang tse sa lokang.

₁₀Bohle ba khopo

ba ke ba oele marabeng a bona,

ha 'na ke phonyoha.