Liponahatso tse makatsang tsa ntoa
1Nakong ena, Antiokose a itokisetsa ho futuhela Egepeta khetlo la bobeli. 2Joale ho ile ha etsahala hore, motseng oohle oa Jerusalema, ka matsatsi a ka bang mashome a mane, ho bonoe sebakeng bapalami ba khemisitseng, ba apere liaparo tse benyang khauta; le mara a hlometseng a tsamaeang ka likhakhatha; 3le mabotho a bapalami a leng moleng oa ntoa; ho khorohelanoa, 'me ho futuhelanoa, thebe li tsokotseha, marumo a teteane, lisabole li tsoile lilateng, metsu e betseha 'me litšireletso tsa lifuba le liaparo tse ling tsa khauta li phatsima. 4Batho bohle ba ne ba rapela hore liponahatso tseo e mpe e be tse bolelang mahlohonolo.
Jasone o hlasela Jerusalema
5Eitse ha ho utloahala monyenyetsi oa bohata, o reng Antiokose o hlokahetse, Jasone a nka banna ba ka fetang sekete, 'me hang-hang a futuhela Jerusalema. Mara a neng a loana a le holim'a lerako la motse a hloloa; qetellong motse oa haptjoa, 'me Menelaose a tšabela Qhobosheaneng. 6Jasone a fenetha batho ba naha ea habo ka ntle ho mohau, a sa elelloe hore ho ikatlehisa ka sechaba sa habo ke bomalimabe bo tšabehang haholo; o ne a ba nka e le lira tseo a hapileng thepa ea tsona, e seng joaloka batho ba habo. 7Leha ho le joalo, ha aa ka a hapa puso; pheletso ea merero ea hae ea e-ba ho hlajoa ke lihlong, 'me a balehela hape naheng ea Baamone. 8Bophelo ba hae ba fella litlokotsing. A qosoa ka pele ho Aretase, khosi ea Maarabia, a ba a baleha ho tloha motseng ona ho ea ho oane, a lelekisitsoe ke bohle, a hloiloe ke batho joaloka motho ea koenehetseng melao, 'me ea lekileng ho felisa naha ea habo le batho ba habo. Eaba o balehela Egepeta; 9'me eena eo, ea ileng a leleka batho ba bangata naheng ea habo bona, a timela naheng ea balichaba, hoba a fetele ho Basepareta a tšepile ho fumana setšabelo ho batho ba leng bang ka eena. 10Eena ea lahlileng litopo tsa ba bangata ba sa patoa, a hloka motho ea mo llelang a sa epeloe ke mang kapa mang, a sa patoe lebitleng la bo-ntat'ae.
Antiokose le eena o hlasela Jerusalema
11Eitse ha lietsahala tsena li tsebisoa khosi Antiokose, a belaela hore Judea e mo fetohetse; eaba o tloha Egepeta a halefile joaloka sebata; a tla 'me a hapa Jerusalema ka lihlomo. 12A laela bahlabani ba hae ho bolaea ho se mohau bohle ba ka oelang liatleng tsa bona, le ho fenetha ba ka lekang ho ipata ka matlung a bona. 13Ha bolaoa bacha le baholo, ha felisoa basali le bana, ha fenethoa baroetsana le masea. 14Ka nako ea matsatsi a mararo a tletseng, motse oa lahleheloa ke batho ba likete tse mashome a robeli: ba likete tse mashome a mane ba bolaoa ke bahlabani 'me ba bakaalo ba rekisoa e le makhoba. 15Kaha a ne a e-s'o khotsofale, khosi Antiokose a se ke a tšaba ho kena ka Tempeleng e halalelang ho feta tsohle tsa lefatše, a eteletsoe pele ke Menelaose, eane ea neng a koenehetse melao 'me a eka naha ea habo. 16A tšoara ka matsoho a hae a litšila lintho tse halalelang, 'me a inkela ka matsoho a hae a sa lokang lintho tseo likhosi tse ling li neng li nyehetse ka tsona ho eketsa tlotla le botumo ba Qalo e halalelang. 17Boikhantšo ba ipha matla pelong ea Antiokose; a se ke a hlokomela hore ke ka baka la libe tsa baahi ba motse, Molimo a ileng a halefa nakonyana, hoo a neng a sa natse Qalo eo. 18Hoja bona ba se ke ba oela libeng tse ngata-ngata, Antiokose a ka be a shapuoe hang hoba a kene, joaloka Heliodorose, ea neng a rometsoe ke khosi Seleukose ho tla hlahloba polokelo ea matlotlo, 'me a ka be a ile a phemisoa ketso eo ea boikakaso. 19Empa Molimo ha aa ka a khetha sechaba sa hae ka baka la Qalo e halalelang, empa a khetha Qalo eo ka baka la sechaba. 20Ka hona Qalo ka bo-eona, hoba e be le kabelo bomalimabeng ba sechaba, kamorao ea ba le kabelo mahlohonolong a sona. Qalo e neng e furaletsoe nakong ea khalefo ea Molimo Ea matla 'ohle, ea boela ea busetsoa tlotlehong eohle ea eona, mohla sechaba se boelanang le Mong'a lintho tsohle.
Jerusalema e hlaseloa hape
21Eitse ha Antiokose a nkile litalenta tse sekete le makholo a robeli Tempeleng, a phakisa a khutlela Antiokia, boikhantšong ba hae a ntse a hopola hore a ka etsa hore ho sesoe mobung 'me leoatle le tšeloe ka maoto; etsoe pelong ea hae o ne a ikhohomosa hakaalo. 22A siea baokameli ba tla hlekefetsa ba moloko oa habo rona: Jerusalema, ea e-ba Filipi, motho oa Lefirigia ka tsoalo, empa ka mekhoa a le tala le ho feta ea 'meileng; 23thabeng ea Garisime, ea e-ba Anderonikose; hape, ka ntle ho bao ba babeli, Menelaose, eo letsoho la hae le bileng boima holim'a ba habo ho feta ba bang. Khosi Antiokose o ne a hloile Bajuda haholo, 24hoo a ileng a romela Apoloniose, molaoli oa bahlabani ba bahiruoa ba tsoang Misia, a e-na le mphi ea ba likete tse mashome a mabeli a metso e 'meli; a mo laela ho fenetha banna bohle ba tiileng, le ho rekisa basali le bacha. 25Ha Apoloniose a fihla Jerusalema, a etsa eka o tlile ka khotso, a iphapanya ho fihlela letsatsing le halalelang la Sabatha. Ka tsatsi leo Bajuda ba sa sebetseng ka lona, a fumana monyetla. A etsa tlhahlobo e mahlonoko ea mabotho a tlas'a hae. 26Eaba o bolaea Bajuda bohle ba neng ba tsoile motseng ho boha motsamao oa bahlabani; a ba a kena ka motseng a e-na le bahlabani ba hlometseng, a timetsa letšoelehali la batho.
27Judase, ea bitsoang Makabea, a felehelitsoe ke ba bang ba robong, a balehela feelleng. A phela moo le balekane ba hae, ba le joaloka libata tsa lithabeng, ba sa je letho ha e se litlama, hore ba tle ba se ke ba ba le kabelo tšilafalong.
