1Hopola 'Mōpi oa hao
u sa le mocha,
matsatsi a litsietsi a e-s'o ka a fihla,
ho e-s'o tle lilemo
tseo ka tsona u tla re:
“Ha ke sa thabisoa
ke letho ho tsona!”
2Mo hopole tsatsi le e-s'o fifale,
le leseli le khoeli le tsona linaleli,
maru a pula a e-s'o aparele hape;
3matsoho a hao a e-s'o rèrèkele,
meno a hao a e-s'o ka a khenoha,
mahlo a hao a e-s'o ho fifale,
4tsèbè li sa utloa marata literateng,
lerata la ho sila le sa utloahala;
meloli ea linonyana
e e-s'o be mooeoetso,
lipina tsohle li sa utloahala;
5batho ba e-s'o tšabe
ho hloa mekoalaba,
ho tsamaea litseleng ho s'o be kotsi;
moriri oa hlooho o e-s'o pulufale,
u e-s'o tsamaee u kokorōha,
u kokorōha sa tsienyane,
takatso tsa hao tsohle li e-s'o fele;
hobane motho o ea boea-batho,
mahahabo a mo hlabele
sa 'mokotsane.
6Mo hopole
khoèlè ea silefera e e-s'o khaohe,
jana sa khauta se e-s'o pshatlehe,
nkho e e-s'o bjaratsehe selibeng,
khoelè ea sekhello
e e-s'o khaohele ka selibeng;
7lerōle le e-s'o busetsoe lerōleng,
moea o khutlela ho Molimo,
Mofani oa oona.
8“Lefeela la mafeela,”
ho rialo Moruti,
“tsohle ke lefeela!”
Qetello ea litaba
9Moruti o ne a sa hlalefa feela, empa o ne a bile a ruta batho tseo a li tsebang. O ile a nahana, a fuputsa, 'me a hlophisa maele a mangata. 10A batlisisa mantsoe a nepahetseng, 'me lipolelo tseo a li ngotseng tsa nepahala, ea e-ba tsa 'nete.
11Lipolelo tsa bahlalefi li tšoana le litsenene; maele a bokeletsoeng a tšoana le lithakhisa tse khokhothetsoeng fatše, 'me kaofela a tsoa ho Molisa a le mong.
12Joale itlhokomele, ngoan'a ka! Ho ngoloa ha libuka ha ho fele; ho ithuta haholo le hona ho tepeletsa 'mele.
13Tsohle joale li utloahetse,
'me qetello ea taba ke ena:
Tšaba Molimo,
u boloke melao ea hae,
hoba hona
ke tšoanelo eohle ea motho.
14Liketso tsohle
Molimo o tla li ahlōla,
esita le tsona tsohle
tse entsoeng bofihla,
ebang li ntle kapa li mpe.
