SEFILA SA LIFELA 1

₂Ak'u nkake ka molomo oa hao,

hoba rato la hao

le monate ho feta veine.

₃Menkoane ea litlolo tsa hao

e nkha hamonate,

bitso la hao le ka setlolo

ha se qhatsitsoe,

hase feela baroetsana ba u lumang!

₄Nkuke ke ee le uena,

re mathe 'moho,

khosi e nkise kamoreng ea eona.

Re tla lilietsa, re u nyakallele,

re rorise rato la hao ho feta veine.

Ba nepile hakaakang

ha ba u luma hakaale!

₅Leha ke le motšoana,

'na ke botlenyana,

lōna barali ba Jerusalema;

ke motšoana sa tente tsa Kedare,

ke ka masira a tente ea Solomone.

₆Se 'makalleng

hobane ke le motšoana;

ke motšoana tjena

hobane tsatsi le nchesitse.

Khaitseli tsa ka

li ne li ntlhoile,

tsa ntaela

ho ea tšosa masimong a morara,

nako ea ho itlhokomela

eaba kea e hloka.

₇Ak'u mpolelle,

uena moratuoa oa ka,

moo khulo la mohlape oa hao

le leng teng,

moo u bothisang mohlape

oa hao teng,

ha le le hloohong tsa mengala,

esere ka fumanoa

ke ntse ke lelera,

ke u batla har'a mehlape

ea thaka tsa hao.

₈Haeba u sa tsebe,

uena Seilatsatsi har'a basali,

latela mohlala oa mohlape,

potsanyane tsa hao u li fulise,

u li fulise pel'a litente tsa balisa.

₉Uena moratuoa,

u ka pitse ea sethole,

e hulang kariki ea Faro ea ntoa.

₁₀Marama a hao aa rateha

ka masale a lepeletseng,

molala oa hao

o tšoaneloa ke faha tsa mabenyane.

₁₁Re tla u etsetsa masale a khauta,

re a khabise

ka naletsana tsa silefera.

₁₂Ha khosi e ne e lutse lijong,

menkoane ea ka ea nkha hamonate.

₁₃Ho 'na moratuoa

o ka mokotlana o tšetseng 'mira,

o bang fubeng sa ka

ka nako tsohle.

₁₄Ho 'na moratuoa

o tšoana le thunthung tsa 'masa,

tse tsoang masimong a morara,

masimo a Ene-Gedi.

₁₅U motle hakaakang,

uena moratuoa oa ka!

U motle hakaakang!

Mahlo a hao

a mapulutsoana sa maeba!

₁₆U motle hakaakang,

uena moratuoa!

E, ruri u motle, ua rateha!

Moalo oa rōna

o ka joang bo botalana!

₁₇Libalaka tsa ntlo ea rōna

ke tsa kedare,

maballo a eona

ke a lifate tsa molutu.