Moshe o neoa matla a ho etsa mehlolo
1Joale Moshe a araba, a re: “Empa bona, ha ba na ho nkholoa, 'me ha ba na ho mamela lentsoe la ka, hobane ba tla re: ‘Morena ha a e-s'o ka a iponahatsa ho uena.’ ”
2Eaba Morena o re ho eena: “Ke eng eo e ka letsohong la hao?”
Moshe a re: “Ke molamu.”
3Morena a re: “O akhele fatše!” A o akhela fatše, 'me oa fetoha nōha, Moshe a ba a e baleha. 4Joale Morena a re ho Moshe: “Nanabetsa letsoho la hao, u e tšoare ka mohatla!” A nanabetsa letsoho la hae, a e tšoara, 'me ea fetoha molamu ka letsohong la hae. 5Morena a re ho eena: “U etse joalo, ba tle ba kholoe hore Morena, Molimo oa bo-ntat'a bona, Molimo oa Aborahama, Molimo oa Isaka, le Molimo oa Jakobo, o fela a ile a iponahatsa ho uena.”
6Morena a boela a re ho eena: “Joale kenya letsoho la hao katlas'a seaparo, sefubeng sa hao.” Moshe a kenya letsoho la hae katlas'a seaparo, sefubeng sa hae, a ba a le ntša, 'me bonang, la tsoa le se le le lesoeu ke lepera, le ka lehloa.
7Eaba Morena o re: “Busetsa letsoho la hao katlas'a seaparo, sefubeng sa hao.” A busetsa letsoho la hae katlas'a seaparo, sefubeng sa hae, a ba a le ntša, 'me bonang, la tsoa le se le folile, le tšoana le pele.
8“Haeba ba sa u kholoe, 'me ba sa mamele lentsoe la hao ha ba bona mohlolo oa pele, ba tla kholisoa ke mohlolo oa bobeli. 9Haeba ba ntse ba sa kholisoe ke mehlolo ena e 'meli, 'me ba sa mamele lentsoe la hao, u tle u khe metsi nōkeng, u a tšèlè fatše, moo ho ommeng. Metsi ao, ao u a khileng nōkeng, a tla fetoha mali ha a fihla mobung o ommeng.”
10Joale Moshe a re ho Morena: “Oho, Morena, ha ke na bokheleke ba puo. Haesale u qala ho buisana le mohlanka oa hao maobane, ho fihlela kajeno, ke ntse ke se na bokheleke, hobane ke lehoelea, kea kōkōtletsa.”
11Morena a re ho eena: “Ke mang ea entseng molomo oa motho? Ke mang ea mo etsang hore e be semumu, kapa tsebetutu, kapa a bone, kapa e be sefofu? Na hase 'na Morena? 12E-ea he, 'me ke tla u thusa ho bua hantle, ke u rute seo u tla se bua.”
13Empa Moshe a re: “Oho, Morena, kea u rapela: Ak'u rōme e mong osele.”
14Joale khalefo ea Morena ea tlōkela Moshe, 'me Morena a re ho eena: “Ha ke re moholoane oa hao Arone, oa Molevi, o teng? Kea tseba hore eena o na le bokheleke ba puo. Bona mona, o ntse a e-tla ho tla u khahlanyetsa, 'me o tla thaba haholo ha a u bona. 15U tla bua le eena, u mo rute seo a tla se bua; 'na ke tla le thusa hore le bue hantle, 'me ke le rute seo le tla se etsa. 16O tla u buella ho sechaba, e be eena molomo oa hao, uena u be joaloka Molimo ho eena. 17Uena u tla tšoara molamu ona ka letsoho la hao, u etse mehlolo ka oona.”
Moshe o khutlela Egepeta
18Moshe a tsamaea, a khutlela ho Jethero, mohoe oa hae, a re ho eena: “Kea u kōpa: Ak'u ntumelle ke khutlele ho bana beso ba Egepeta, ke e'o bona hore na ba sa phela.”
Eaba Jethero o re ho Moshe: “Tsamaea ka khotso!”
19Joale Morena a re ho Moshe, a le Midiane: “Tsamaea, u khutlele Egepeta, hobane batho bohle ba neng ba batla ho u bolaea ba shoele.” 20Eaba Moshe o nka mosali oa hae, le bara ba hae, o ba palamisa tonki, o khutlela naheng ea Egepeta. Moshe a nka le molamu oa Molimo ka letsohong la hae.
21Joale Morena a re ho Moshe: “Ha u khutlela Egepeta, hlokomela hore mehlolo eohle eo ke u neileng matla a ho e etsa, u e etse moo Faro a ntseng a bona. Empa ke tla thatafatsa pelo ea hae, 'me a ke ke a lokolla sechaba hore se tsamaee. 22Uena u tla bua le Faro, u re Morena o bua tjena, o re: ‘Iseraele ke mora oa ka oa letsibolo. 23Ke u boleletse hore u mo lokolle, a e'o ntšebeletsa, empa u hanne; bona, ke tla bolaea mora oa hao oa letsibolo.’ ”
24Eare ha ba le tseleng, moo ba neng ba robalelitse teng, Morena a teana le Moshe, 'me a batla ho 'molaea. 25Ke ha mosali oa hae Sefora a nka lejoe le bohale, a bōlōtsa mora oa hae, 'me ka leeko leo a le khaotseng ho mora oa hae a ama botona ba Moshe, a re: “Ruri u monna oa mali ho 'na!” 26Eaba Morena o tlohela Moshe. Sefora o ne a re ke monna oa mali, ka baka la lebōllo.
27Joale Morena a re ho Arone: “Tsamaea, u e'o khahlanyetsa Moshe lehoatateng.” Arone a tsamaea, a teana le Moshe thabeng ea Molimo, a mo aka. 28Moshe a phetela Arone mantsoe 'ohle ao Morena a a buileng ho eena, ha a mo rōma, le mehlolo eohle eo a mo laetseng ho e etsa.
29Moshe le Arone ba ea, ba fihla ba phutha baholo bohle ba bana ba Iseraele. 30Eaba Arone o pheta mantsoe 'ohle ao Morena a a buileng ho Moshe; a ba a etsa le mehlolo moo sechaba se ntseng se bona. 31Sechaba sa kholoa, 'me ha se utloa hore Morena o ne a etetse bana ba Iseraele, le hore o bone matšoenyeho a sona, sa inamisa lihlooho, sa rapela.
