Ho rorisoe Morena
1Oho, Morena,
ke uena Molimo oa ka,
ke tla u tlōtla,
ke rorise lebitso la hao,
hobane uena u entse limakatso,
merero ea hao ea khale
ea tšepeha, ke ea 'nete.
2Uena u fetotse motse
qubu ea majoe,
motse o hahelelitsoeng
ua o fetola lesupi,
motse oa bokhosi oa balichaba
ha e sa le motse,
le ho tsosoa
o ke ke oa hlola o tsosoa.
3Kahoo lichaba tse matla
li tla u tlotlisa,
metse ea chaba tse sehlōhō
e u tšabe,
4hobane u bile setšabelo
ho mafutsana,
ua ba setšabelo
ho bahloki tsietsing tsa bona,
ua ba mosireletsi
nakong ea lifefo,
ua ba moriti
har'a lebatama la letsatsi.
Moea oa ea sehlōhō
o ka sefefo se thula lebota,
5o ka lebatama
la letsatsi lehoatateng.
Rata la balichaba u tla le felisa;
joalokaha lesoiti
le kokobetsa mocheso,
le pina ea ea sehlōhō
e tla felisoa joalo.
Molimo o etsa mokete oa lijo
6Thabeng ena Moren'a mabōtho
o tla etsa mokete,
a etsetse chaba tsohle
mokete oa limonate,
a o etse ka veine e ritelehile,
lijo li le monate, veine e ritelehile.
7Thabeng ena o tla tlosa lesira,
le fifalitseng chaba tsohle,
a tlose lesela
le fifalitseng lichaba tsohle.
8Morena Molimo o tla felisa lefu,
le felle ruri,
a hlakole meokho
fahlehong tsa batho bohle,
a tlose lihlong
chabeng sa hae fatšeng lohle,
hobane Morena o buile joalo.
9Ka tsatsi leo, batho ba tla re:
“Ruri enoa ke Molimo oa rōna,
re ile ra mo tšepa,
o re pholositse;
enoa ke Morena,
re ile ra mo tšepa,
a re nyakalleng,
re thabele ha a re pholositse.”
Molimo o tla otla Bamoabe
10Morena o tla sireletsa thaba ena,
Bamoabe bona a ba hatakele,
a ba hatakele sa 'mōkō
o hatakelloa moraheng.
11Leha ba ka phakalatsa
matsoho a bona holim'a moraha,
ba a phakalatsa sa sehlapi se sesa,
Morena o tla felisa
boikhantšo ba bona,
le hoja matsoho a bona a le bohlale.
12Qhobosheane
e marako a phahameng
o tla e heletsa,
a e heletse, e burame fatše,
a e heletse, e fetohe lerōle.
