Tlholo Iseraele
1Ha ba neng ba ntse ba le ka litenteng ba utloa litaba, ba ferekana habohloko. 2Ba oeloa ke tšabo le thothomelo, hoo ho neng ho le thata ho batho ba babeli ho ba 'moho. Ba qhalana kahohle kaofela ha bona, ba phasa-phasa tselaneng e 'ngoe le e 'ngoe, phuleng le lithabeng. 3Bahlabani ba neng ba larile maralleng a pota-potileng Bethulia, le bona ba itahla. Eaba Baiseraele bohle ba neng ba ka loana ba itahlela holim'a bona.
4Usiea a romela batho metseng ea Bethomesethaime, Bebai, Koba le Kola, le liqoleng tsohle tsa Iseraele, ho ea tsebisa sechaba tse etsahetseng, le ho se kopa hore bohle ba itahlele holim'a lira, ho li ripitla. 5Hang ha Baiseraele ba utloa hona, kaofela ha bona ba li khorohela, 'me ba li rinya ho ea fihla Koba. Banna ba Jerusalema le ba naha eohle ea lithaba, le bona ba ba phallela, hoba ba tsebisoe tse etsahetseng liahelong tsa sera. Eaba ba Gileade le Galelea ba li fenya ka bohale ba li hlahile lehlakoreng, ho ea fihla Damaseka le naheng ea eona.
6Baahi ba setseng ba Bethulia ba oela liahelo tsa Baasiria holimo, ba fumana leruo le leholo ka ho hahara thepa. 7Baiseraele ba khutla hoba ba bolaee lira tse ngata, 'me ba inkela ho setseng. Baahi ba metse le metsana, e ka thabeng le phuleng, le bona ba inkela thepa e ngata, kaha e ne e le bongata bo tšabehang ba eona.
Iseraele e ketekela tlholo
8Joakime, moprista e moholo, le Lekhotla la baholo ba Iseraele ba ahileng Jerusalema, ba tla ho bona tse molemo tseo Morena a li etselitseng Iseraele, le ho bona le ho lumelisa Juditha. 9Ha ba fihla ho eena, ba mo rorisa ba le ntsoe-leng, ba re: “U tlotla ea Jerusalema, u boithoriso bo boholo ba Iseraele, u boitumelo bo boholo ba leloko la habo rona. 10Ka ho etsa tsena tsohle ka letsoho la hao, u etselitse Iseraele tse molemo haholo, 'me Molimo o khahliloe ke tsona. Morena ea matla 'ohle a ke a u hlohonolofatse ho ea ho ile!”
Sechaba sohle sa arabela, se re: “Amen!”
11Sechaba sohle sa ikhapela tse ka liahelong ka matsatsi a mashome a mararo. Ba abela Juditha tente ea Holofernese, le lijana tsohle tsa hae tsa silefera, le lisofa tsa hae, le likotlolo tsa hae le thepa eohle ea hae. Juditha a li nka, 'me tse ling a li bofa 'moulong oa hae; eaba o pana likariki tsa hae, 'me a qhobela tse setseng ka ho tsona. 12Basali bohle ba Iseraele ba potlakela ho tla 'mona le ho mo rorisa. Ba bang ba bona ba mo etsetsa lipina le motjeko. Juditha a nka mare a khabisitsoeng, 'me a a abela le basali ba mo felehelitseng. 13Eena le basali bao ba ithoesa meqhaka ea makala a mohloare. Eaba o etella mokoloko pele, a tsamaisa basali bohle motjekong. Banna bohle ba ba latela, ba hlometse, ba roetse mefapahlooho, 'me ba bina lifela.
