LIPESALEMA 86

Morena, ak'u ntšekehele tsebe,

u nkarabe,

hobane ke hlōphehile,

ke futsanehile.

₂Ak'u baballe bophelo ba ka,

hobane ke motšepuoa oa hao,

pholosa mohlanka oa hao

ea u tšepang.

₃Ke uena Molimo oa ka,

nkhauhele, Morena,

ke ipiletsa ho uena kamehla.

₄Ak'u thabise mohlanka oa hao;

ke u rapela

ka moea oa ka oohle, Morena.

₅Uena Morena, u molemo,

ua tšoarela;

mohau oa hao o moholo

ho bohle ba ipiletsang ho uena.

₆Morena, sekehela thapelo ea ka tsebe,

u mamele sello sa thapeli ea ka.

₇Ha ke le matšoenyehong

ke ipiletsa ho uena,

'me uena ua nkaraba.

₈Morena, ha ho ea tšoanang le uena,

ea tšoanang le uena har'a melimo,

ha ho mesebetsi e kang ea hao.

₉Chaba tsohle tseo u li bōpileng

li tla tla,

li itihele maotong a hao Morena,

li tlotlise lebitso la hao;

₁₀hobane u moholo, u etsa limakatso,

ke uena Molimo u inotši.

₁₁Nthute tsela ea hao Morena,

ke tle ke tsamaee 'neteng ea hao;

tataisetsa pelo ea ka

tšabong ea lebitso la hao.

₁₂Morena, Molimo oa ka,

ke tla u boka ka pelo ea ka eohle,

ke tlotlise lebitso la hao

kamehla eohle.

₁₃Ho 'na mohau oa hao o moholo,

ke uena ea ntopolotseng

botebong ba Qalo ea Bafu.

₁₄Molimo,

baikakasi ba ntsohetse matla,

sehlopha sa ba sehlōhō

se batla bophelo ba ka,

ha ba na taba le uena.

₁₅Empa uena Morena, u Molimo,

u na le kutloelo-bohlōkō le mosa,

u lieha ho halefa,

u tletse mohau le botšepehi.

₁₆Ak'u khutlele ho 'na, u nkhauhele;

matlafatsa mohlanka oa hao,

u pholose mora

oa lekhabunyane la hao.

₁₇Bonahatsa molemo oa hao ho 'na,

ba ntlhoileng ba hlajoe ke lihlong,

ha ba bona hore uena Morena,

u mothusi oa ka

le motšelisi oa ka.