SIRAKA 27

₁Ba bangata ba entse sebe

ka baka la ho rata phaello;

ea tsomang maruo ha a na mohau.

₂Joalokaha palo e epeloa thata

ka har'a lefaro pakeng tsa majoe,

ka mokhoa o joalo sebe se ipeteletsa

pakeng tsa theko le thekiso.

₃Haeba motho a sa khomarele

tšabo ea Morena ka thata,

lelapa la hae le tla oa ka potlako.

₄Ha ho sefshoa, litlheferetsi li sala

ka sefeng;

mefokolo ea motho le eona e fumaneha

lipuisanong.

₅Lipitsa tsa sebopi li nonngoa

ka ho besoa;

teko ea motho ke moqoqo oa hae.

₆Tholoana ea sefate e bontša

boemo ba mobu;

mantsoe a motho a senola

maikutlo a pelo ea hae.

₇Se rorise motho pele u mo utloa

ha a bua,

hobane hoo ke eona teko ea batho.

₈Haeba u ikemiselitse ho batla

se lokileng,

u tla se fihlela, 'me u se apare

joaloka kobo ea tlotla.

₉Linonyana tse siba leng

li phela hammoho;

'nete e khutlela lapeng la batho

ba phelang ka eona.

₁₀Tau e lalla khapo;

sebe se etsa joalo ho baetsi

ba bokhopo.

₁₁Puo ea motho oa morapeli

kamehla e seli,

empa setlaopa se feto-fetoha

joaloka khoeli.

₁₂Har'a lithoto, se itšenyetse nako,

empa har'a batho ba bohlale, itulele.

₁₃Puo ea litlaopa ea tena,

'me bosoasoi ba bona bo amana

le maiketlo a litšila.

₁₄Puo ea batho ba tloaetseng

ho nyefola ea nyarosa,

'me mahlapa a bona a tlama motho

ho ithiba litsebe.

₁₅Mahlapa a baikhohomosi a isa

tšollong ea mali,

'me lithohakano tsa bona

lia khobohetsa.

₁₆Ea senolang makunutu

o felisa botšepehi,

'me ha a sa tla fumana

motsoalle oa hlooho ea khomo.

₁₇Rata motsoalle oa hao,

u tšepahale ho eena;

empa haeba u senotse makunutu a hae,

hlobohana le eena;

₁₈hobane joalokaha motho a timetsa

sera sa hae,

uena u timelitse setsoalle

sa moahisani le uena.

₁₉Joalokaha u lesa nonyana

ho phochoha letsohong la hao,

ka mokhoa o tšoanang u lesitse

moahisani oa hao ho ikela,

'me ha u sa tla boela u mo fumana.

₂₀Se mo sale morao,

hobane o se a le hole hampe,

'me o se a phonyohile joaloka tšephe

lerabeng.

₂₁Leqeba le ka tlamisoa,

le poelano ho latela mahlapa;

empa tšenolo ea makunutu

eona ke lefu le ke keng la phekoloa.

₂₂Ea robang leihlo o rera

ketso tse khopo,

'me ba mo tsebang ba tla mo nena.

₂₃Mahlong a hao o leleme le monate,

'me o babatsa lipuo tsa hao;

empa kamorao o tla u nyekoletsa

molomo,

'me a fetole mantsoe a hao khopiso.

₂₄Ho na le ntho tse ngata

tseo ke li hloileng,

empa e seng joaloka eena;

esita le Morena ha a sa mo batla.

₂₅Ea betsetsang lejoe holimo

o le betsetsa hloohong ea hae;

lehlabaphio le lona le intša kotsi.

₂₆Ea chekang lemena o tla oela ho lona,

ea chehang leraba o tla tšoasoa ke lona.

₂₇Ea etsang bokhopo bo tla boeana

le eena,

'me ha a ka ke a tseba le hore

na bo hlaha kae.

₂₈Litšomo le litlhapa li tsoa

ho moikhohomosi,

empa phetetso e mo lalla joaloka tau.

₂₉Ba thabelang ho oa ha barapeli

ba tla tšoasoa lerabeng,

'me ba tla hlokofatsoa pele ho lefu

la bona.

₃₀Lisua le khalefo, le tsona ke ntho

tse nyonyehang;

empa ke leruo la moetsalibe.