1Ea iphetetsang o ipiletsa
phetetso ea Morena,
'me o tla balloa libe tsa hae ka thata.
2Tšoarela moahisani oa hao phoso,
'me ke moo libe tsa hao li tla tšoareloa
ha u rapela.
3Haeba motho a jara e mong ka pelo,
a ka kopa joang hore Morena
a mo folise?
4Haeba motho a hloka mohau
ho mohahabo,
a ka ithapella joang ho leballoa
libe tsa hae?
5Ha eena, e le motho oa nama le mali,
a ipolokela lisua,
o tla fumana ho mang tšoarelo
ea libe tsa hae?
6Hopola pheletso ea bophelo ba hao,
'me u tlohele lehloeo;
hopola timelo le lefu, 'me u boloke
melao ea Molimo.
7Hopola melao, 'me u se jare
moahisani oa hao ka pelo;
hopola selekane sa Ea holimo-limo,
'me u iphapanyetse liphoso tsa hae.
Likhang
8Phema khang 'me u tla fokotsa libe;
hobane motho oa sefela-peloana
o tla baka khang.
9Motho oa moetsalibe
o qabanya metsoalle,
'me o jala bora
har'a ba nang le khotso.
10Ka ho ea ka tekanyo ea patsi
ho tuka ha mollo ho tla ba joalo;
'me ka ho ea ka tekanyo ea manganga
ho tuka ha khang ho tla ba joalo.
Ka ho ea ka tekanyo ea matla a motho,
bohlale ba hae bo tla ba joalo,
'me ka ho ea ka tekanyo
ea leruo la hae,
o tla tlokomisa khalefo ea hae.
11Tsekisano ea lepotla-potla
e hotetsa mollo,
'me khang ea lepotla-potla
e baka tšollo ea mali.
12Ha u butsoela tlhase, e tla hlena;
ha u e tšoela ka mathe, e tla tima;
'me ka bobeli li tsoa
ka hanong la hao.
Kotsi ea leleme
13Ho rohakehile mosebi le mothetsi!
O timelitse ba bangata
ba neng ba phela ka khotso.
14Ba itšunya-tšunyang litabeng
tsa batho ka leleme,
ba tsukutlile boemo ba ba bangata,
ba ba qhalanya kahohle lichabeng;
ba timelitse metse e matla,
ba ripitla matlo a mahosana.
15Ba itšunya-tšunyang litabeng
tsa batho ka leleme
ba entse hore basali ba sebele
ba hlaloe,
'me ba senyeheloe ke tholoana
ea mofufutso oa bona.
16Ea sekehelang mosebi tsebe
ha a ka ke a ba le phomolo,
leha e le ho phela ka khotso.
17Chapo ea phafa e ntša motopa,
empa chapo ea leleme e bjabjaretsa
masapo.
18Ba bangata ba bolailoe ka sabole,
empa ba bangata ho feta
ba bolailoe ke leleme.
19Ho lehlohonolo motho
ea qobisitsoeng bohale ba leleme,
ea sa kang a feta har'a bona;
ea sa kang a jara joko ea leleme,
le ho ba litlamong tsa lona.
20Joko ea lona ke joko ea tšepe,
'me mahlaahlela a lona ke mahlaahlela
a lethose.
21Lefu le bakoang ke leleme
lea tšabeha;
ho molemo lebitla ho e-na le lefu
la leleme.
22Leleme ha le na matla
holim'a barapeli,
ha ba ka ke ba e-cha malakabeng
a lona.
23Empa ba furallang Morena
ba tla oela matleng a lona;
mollo oa lona o ke keng oa tingoa
o tla tuka har'a bona,
le tla ba hlasela joaloka tau,
le ba harola joaloka lengau.
24Joalokaha u lika-liketsa
serapa sa hao
ka lekhoakhoa le meutloa,
kapa u notlella silifera
le khauta ea hao,
25bekhisa boima ba mantsoe a hao,
'me u etsetse molomo oa hao
lemati le notleloang.
26Hlokomela u se khoptjoe ka leleme,
esere ua oela liatleng
tsa ea u laletseng.
