Likalimo le pusetso
1Ho alima moahisani oa hao
ke ketso ea mohau,
'me ho mo phallela
ke ho phetha melao.
2Alima moahisani oa hao
nakong eo a leng tsietsing,
le teng mo lefe seo u se kolotang
ka nako.
3Phetha tšepiso ea hao,
u tšepahale ho eena,
'me kamehla u tla 'ne u fumana
seo u se hlokang.
4Ba bangata ba nka kalimo e le manna,
'me ba bee ba ba alimileng tsietsing.
5Hore a fumane seo a se alimang,
motho o aka letsoho la moalimi,
'me o bua ka boikokobetso
ka leruo la moahisani.
Empa ka nako ea ho busetsa,
oa hora-hora, a bolele kamoo a leng
bothateng kateng.
6Haeba moalimi a mo hata lirethe,
e tla ba ka thata a ka khutlisetsoang
karolo ea bobeli ea molato,
'me o tla talima hoo e le lehlohonolo.
Haeba a sa etse joalo,
moalimi o tla be a senyehetsoe
ke maruo a hae,
'me a iketselitse sera
ka mabaka a sa tsebisahaleng,
se tla mo buseletsa ka lithohako
le ka mahlapa,
se mo hlompholle
bakeng sa ho mo hlompha.
7Ka baka la bokhopo bo joalo,
ba bangata ba se ba hana ho alimana,
ba tšaba ho jeoa ntle ho mabaka.
Thuso ho mafutsana
8Leha ho le joalo, iphapanyetse
mofutsana,
'me se etse hore a emele
mohau oa hao.
9Thusa mofutsana ka baka la molao,
'me u se mo khutlise
le se mo tlisitseng.
10Senyeheloa ke chelete ea hao
ka baka la ngoan'eno kapa motsoalle,
ho e-na le hore e lahlehe,
e be mafoome e patiloe tlas'a lejoe.
11Sebelisa letlotlo la hao
ho ea ka melao ea Ea holimo-limo,
'me le tla u buseletsa ho feta khauta.
12Boloka liketso tsa mohau
melikong ea hao,
'me li tla u lopolla
makaqabetsing 'ohle.
13Ho feta thebe ea tona-tona
le ho feta lerumo le tomahali,
li tla u loanela ho sera sa hao.
Paneng
14Motho ea molemo o ipea paneng
bakeng sa moahisani,
empa motho ea se nang lihlong
o tla mo lahla kherehloa.
15Se lebale mohau oa ea ipeileng
paneng,
hobane o iteletse uena.
16Moetsalibe o tla senya leruo
la ea ipeileng paneng bakeng sa hae,
17'me motho ea se nang teboho
o tla furalla molopolli oa hae.
18Ho ipea paneng ho futsanehisitse
ba bangata ba neng ba phela naleng,
ho ba tsukutlile joaloka leqhubu
la leoatle;
ho leleketse batho ba matla
hole le linaha tsa habo bona,
'me ho ba lelerisitse naheng
tsa balichaba.
19Moetsalibe ea folofelang ho ipea
paneng o ipatlela phaello,
'me o tla iphumana a le har'a linyeoe.
20Thusa moahisani ho ea ka matla
a hao,
empa hlokomela esere ua oa.
Kamohelo ea baeti
21Tsa bohlokoa bophelong ke metsi
le bohobe le liaparo,
le ntlo ho sireletsa motho.
22Ho molemo ho phela
joaloka mofutsana lephepheng
leo e leng la hao,
ho ena le ho ja tse rothisang mathe
lapeng la motho e mong.
23Khotsofalla bonyane kapa bongata,
'me u ke ke ua tlontlolloa ka ho bitsoa
phela-malapeng.
24Ke bophelo ba masetla-libete ho tsoa
ka ho ena ntlo, u kena ka ho eane,
'me moo u leng moeti u tla sitoa
ho ahlamisa molomo.
25U tla fepa baeti ba bang
'me u ba qhatsetse u sa lebohuoe,
'me ka thoko ho moo u tla utloa
mantsoe a hlabang:
26“Tloo mona, moeti, hlopha tafole,
'me u mphe se ka bang teng, ke je.”
27Kapa: “Moeti, ak'u suthele
mohlomphehi sebaka;
ngoan'eso o tlil'o lula le 'na,
ntsoele ntlo.”
28Ntho tsena li bohloko ho mamelloa
ke motho ea nang le kutloisiso:
ho omanngoa ka baka la botholuoa
le likomang tsa moalimani.
