SIRAKA 44

₁A re ke re rokeng batho

ba tumileng,

bo-ntat'a rona ka ho ea ka meloko

ea bona.

₂Morena o ba bopetse tlotla e kholo,

eena eo botlotlehi ba hae e leng

ba khale-khale.

₃Ba bang e bile likhosi

mebusong ea habo eona,

e le batho ba tumileng

ka baka la matla a bona.

Ba bang e bile baeletsi

ka baka la kutloisiso ea bona,

'me ba bua joaloka baporofeta.

₄Ba bang ba tsamaisa sechaba

ka boeletsi ba 'nete,

ka tsebo ea bona ea melao ea sechaba,

le ka tataiso e bohlale ea bona.

₅Ba bang e bile baqapi ba lipina,

le bangoli ba lithothokiso.

₆Ba bang e bile barui

le batho ba matla,

ba phelang ka khotso mahabona.

₇Bana bohle ba ne ba hlonepshoa

ke moloko ea bona,

'me ba rorisoa nakong

eo ba phelang ka eona.

₈Ba bang ba itšietse lebitso,

hoo ba ntseng ba rokoa le kajeno.

₉Athe ba bang ha ba sa hopoloa,

ba timetse joaloka hola ba sa ka ba

phela;

eka hola ba sa ka ba tsoaloa,

'me bana ba bona ba ba joalo.

₁₀Ha hoa ba joalo ho bo-ntat'a rona,

batho ba mohau,

bao liketso tse lokileng tsa bona

li sa kang tsa lebaloa.

₁₁Leruo la bona le tla jeoa

ke litloholo tsa bona,

'me lefa le ea ho litloholoana tsa bona.

₁₂Litloholo tsa bona li pheeletse

selekaneng,

le bana ba tsona ba etsa joalo

ka baka la bona.

₁₃Litloholo tsa bona li tla 'ne li tsoele

pele ka ho sa eeng kae,

'me tlotla ea bona

ha e ka ke ea nyamela.

₁₄Litopo tsa bona li ne li patoe

ka khotso,

'me lebitso la bona le tla hopoloa

ke meloko le meloko.

₁₅Machaba a tla phatlalatsa

bohlale ba bona,

'me phutheho e bolele

lithoko tsa bona.

₁₆Enoke a khahlisa Morena

'me a nkeloa holimo,

'me e bile mohlala oa pako

ho meloko eohle.

₁₇Nooe a fumanoa a phethehile,

a lokile;

mohla letsatsi la khalefo

a khethoa ho ba lehlomela.

Ka hona lesalla la siuoa lefatšeng

mohla moroallo oa metsi.

₁₈Lilekane tse sa feleng

tsa etsoa le eena,

hore tsohle tse phelang

li se hlole li timetsoa ka moroallo.

₁₉Aborahama e bile motsoali

e moholo oa matšoele a lichaba,

'me ha ho le ea mong ea ileng

a fumana tlotla e kang ea hae.

₂₀A boloka molao oa Ea holimo-limo,

'me a kena selekaneng le eena.

A etsa letšoao la selekane

nameng ea hae;

'me eare ha a lekoa,

a fumanoa a tšepahala.

₂₁Ka hona Morena

a mo tiisetsa ka kano,

hore lichaba li tla hlohonolofatsoa

ka lesika la hae,

le hore o tla mo atisa

joaloka lerole la lefatše,

a phahamise litloholo tsa hae

joaloka linaleli,

'me li je lefa la naha e tlohang

leoatleng le leng ho isa ho le leng,

'me e tlohang Nokeng ho isa

lipheletsong tsa lefatše.

₂₂Le Isaka Molimo a mo tiisetsa,

ka baka la Aborahama ntat'ae,

hlohonolofatso ea batho bohle.

₂₃A bea selekane sa hae

holim'a hlooho ea Jakobo.

A mo tiisetsa hlohonolofatso tsa hae;

'me a mo fa naha e le lefa la hae,

a ba a e arola likoto,

ho li abela meloko e leshome

le metso e 'meli.