Moshe
1Molokong oa Jakobo Morena
a hlahisa motho ea mohau,
ea ileng a amoheleha ho batho bohle,
a ratoa ke Molimo le batho,
e leng Moshe ea ntseng a hopoloa
ka hlompho.
2Morena o mo entse ea lekanang
le mangeloi ka tlotla,
'me a mo etsa ea matla
hoo lira li neng li mo tšaba.
3Ka lentsoe la Moshe, a etsa
mehlolo e mengata-ngata,
a mo tlotlisa ka pele ho likhosi.
Ka eena, a nea sechaba sa hae litaelo;
'me a mo bontša lehlaseli
la tlotla ea hae.
4A mo halaletsa ka baka la botšepehi
le bonolo ba hae.
'me a mo khetha har'a batho bohle.
5A mo lumella ho utloa lentsoe la hae,
'me a mo kenya ka har'a leru le letšo.
A mo nea melao ba talimane mahlong,
e leng molao oa bophelo le tsebo,
hore a rute Jakobo tsa selekane,
le Iseraele likahlolo tsa hae.
Arone
6A phahamisa Arone, motho
ea halalelang joaloka Moshe,
e bile e le ngoan'abo,
oa leloko la Levi.
7A etsa selekane se sa feleng le eena,
'me a mo nea boprista ba sechaba.
A mo hlohonolofatsa,
'me a mo khabisa;
a mo apesa liaparo tse tlotlehang.
8A mo apesa ka tse phethehileng,
tse rorisehang;
a mo fa matšoao a bohlomphehi,
e leng marikhoe a line,
seaparo se selelele le setipe.
9A pota-pota seaparo sena
ka likharenate,
le mangenengene a mangata a khauta
ho etsa molumo ha a tsamaea,
e le hore ho lla ha tsona
ho utloahale ka Tempeleng,
e le khopotso ho batho
ba sechaba sa habo.
10A mo fa seaparo se halalelang,
sa khauta le boputsoa le boperese,
mosebetsi oa ea etsang mekhabo.
A mo fa le mokhabiso oa sefuba
oa kahlolo, o nang le majoe a lotho;
11oona o entsoe ke setsebi
ka khoele e lohiloeng e khubelu,
o e-na le majoe a bohlokoa
a betliloeng joaloka letšoao,
a kentsoeng mekhabisong ea khauta
ke sebetli,
a nang le mabitso a khopotso,
ho ea ka palo ea meloko ea Iseraele.
12A mo roesa moqhaka oa khauta
katibeng ea hae,
oo ho oona ho ngotsoeng
bopaki ba khalaletso,
boo e leng letšoao la bohlomphehi,
mosebetsi o khethehileng,
o loketseng ho babatsoa,
mokhabiso o phethehileng.
13Pele ho Arone, lintho tse ntle hakaalo
li ne li e-so ka li e-ba teng;
ha ho motho ea tsoang ka thoko
ea kileng a apara tse joalo,
haese bara ba hae le litloholo tsa hae
litšiung tsohle.
14Mahlabelo a hae a chesoa lore,
habeli ka letsatsi ho se khaotso.
15Moshe a mo bea moprista,
a mo tlotsa ka oli e halalelang.
Ea e-ba ho eena selekane se sa feleng,
le ho litloholo tsa hae
ha feela leholimo le ntse le le teng,
e le hore a sebeletse Tempeleng
e le moprista,
'me a hlohonolofatse sechaba
sa Morena ka Lebitso la hae.
16A mo khetha ka har'a bohle
ba phelang
ho nyehela sehlabelo ho Morena,
mokubetso le monko o monate
oa sehlabelo sa khopotso,
ho etsa puseletso bakeng sa sechaba.
17A mo tšepela melao ea hae,
a mo fa matla a ho hlalosa
litaelo tsa eona,
a ho ruta Jakobo litšoanelo
le a ho lokolisetsa Iseraele
molao oa hae.
18Ba bang bao e seng ba habo
ba mo honohela,
ba mo rera lehoatateng.
e leng Dathane le Abirame
le batho ba bona,
le sehlotšoana sa Kora,
se neng se tlokoma ke khalefo.
19Morena a bona hono, 'me a khena;
pefong ea khalefo ea hae a ba timetsa,
a ba hlahisetsa limakatso,
a ba chesa malakabeng a mollo a hae.
20A ekeletsa Arone tlotla
'me a mo nea lefa.
A mo abela lilopotsia tse khethehileng,
'me ho feta tsohle a mo fa bohobe
ka bongata.
21Baprista ba ja tsa mahlabelo
a Morena,
ea a fileng Arone le litloholo tsa hae.
22Empa naheng ea sechaba sa habo
ha a na lefa,
a hloka seabo har'a batho ba habo;
Morena ka boeena ke seabo
le lefa la hae.
Finease
23Finease, mora oa Eleasare,
ke oa boraro tlotleng,
hobane o ne a le mafolo-folo
tšabong ea Morena,
a ema a tiile ha sechaba se koeneha,
a bontša cheseho le sebete
'me a fumantša Iseraele
tšoarelo ea libe.
24Ka baka leo Molimo a mo etsetsa
selekane sa khotso,
e le hore a okamele sehalalelo
'moho le sechaba sa habo,
hore eena le litloholo tsa hae
ba be le boprista bo boholo
ka ho sa eeng kae.
25Le teng selekane sa boela
sa hlongoa le Davida,
mora oa Jese, oa leloko la Juda:
lefa la khosi le tloha ho mora
ho ea ho mora feela;
athe lefa la Arone ke la litloholo
tsohle tsa hae.
26E se eka Morena a ka le nea bohlale
ka pelong tsa lona
ho ahlola batho ba sechaba sa hae
ka toka,
hore katleho ea bona e se nyamele,
le hore tlotla ea bona e pheelle
melokong eohle ea bona.
