Tobiase o itokisetsa leeto
1Eaba Tobiase o araba ntat'ae Tobite, o re: “Ntate, ke tla etsa tsohle tseo u ntaetseng tsona. 2Empa ke tla fumana joang chelete eo ho eena? Ha a ntsebe, le 'na ha ke mo tsebe. Ke tla mo fa pontšo efe hore a tle a ntsebe, e le hore a nkholoe, a be a mphe chelete eo? Le tsela tse ka mphihlisang Media, ha ke li tsebe.” 3Ke moo Tobite a ileng a araba mora oa hae Tobiase, a re: “Re ngotse lengolo le tekenetsoeng ke rona bobeli. Ka le tabola ka lehare, hore e mong le e mong oa rona a fumane sekoto. Ka siea chelete ho eena, 'moho le sekoto sa bobeli sa lengolo la bopaki. Kajeno e s'e le lilemo tse mashome a mabeli ke siile chelete eo ho eena. Joale, ngoan'a ka, ipatlele motho ea tšepahalang ea ka u felehetsang, eo re tla mo lefa ho fihlela le khutla, 'me u e'o lata chelete eo ho Gabaele.”
Tobiase o teana le lengeloi Rafaele
4Tobiase a tsoa ho ea batla motho ea tsebang tsela 'me ea ka mo felehetsang ho leba Media. Hoba a tsoe, a fumana lengeloi Rafaele le eme ka pele ho eena, empa ha aa ka a tseba hore ke lengeloi la Molimo. 5A re ho lona: “U tsoa kae, oeso?” La araba, la re: “Ke e mong oa Baiseraele ba heno. Ke tlil'o batla mosebetsi.” A le botsa, a re: “Na u tseba tsela e eang Media?” 6Lona la re ho eena: “Hantle haholo. Ke ile teng hangata. Ke tloaetse, ebile ke tseba litsela tsohle tse eang moo. Ke etetse Media ka makhetlo, ke be ke robaletse ha Gabaele, ngoan'abo rona, ea ahileng Ragese e Media. Ho tloha Ekebatana ho ea Ragese, ke leeto la matsatsi a mabeli a tletseng. Ragese e har'a loti, athe Ekebatana e mabalane.” 7Tobiase a re: “Nkemele, oeso, ke sa il'o tsebisa ntate. Ke hloka hore u mphelehetse, ebile ke tla u lefa moputso oa hao.” 8La fetola, la re: “Ke hantle; ke tla u emela. Feela u se liehe.”
9Tobiase a kena ka tlung ho tsebisa ntat'ae hore o fumane motho eo e leng Moiseraele oa habo. Ntat'ae a re: “E-re motho eo a kene, ngoan'a ka, e le hore ke tsebe na ke oa lesika lefe le leloko lefe, le hore na ke ea ka tšepahalang ho u felehetsa.” Tobiase a tsoa, a ea mo lata, a re: “Oeso, ntate oa u bitsa.”
Tobiase o hlahisa lengeloi ho ntat'ae
10Lengeloi la kena ka tlung. Ea e-ba Tobite ea le lumelisang pele, 'me lona la araba ka ho mo lakaletsa khotso. Tobite a fetola, a re: “Ebe ke sa tla hlola ke e-ba le khotso? Ke foufetse, ke se ke sitoa ho bona leseli la leholimo. Ke aparetsoe ke lefifi joaloka bafu ba sa tl'o hlola ba bona leseli. Leha ke ntse ke phela, ke se ke baleletsoe har'a bafu. Ke utloa ha batho ba bua, empa ha ke ba bone.” La re ho eena: “Khothahala; Molimo o s'a le haufi le ho u folisa. Khothahala.” Tobite a re ho lona: “Mor'a ka Tobiase o rata ho ea Media. Na u ka mo felehetsa, ua 'montša tsela? Ke tla u fa moputso, ngoan'eso.” La mo araba, la re: “Nka mo felehetsa. Ke tloaetse litsela tsohle, ke ile Media hangata; ke haotse mabalane a sebaka seo, ke tseba maloti le litsela tsohle tsa moo.”
A re ho lona: “Ngoan'eso, u mohlobo mong, u oa leloko lefe? Ak'u mpolelle, ngoan'eso.” 11La re ho eena: “Leloko la heso, u le isa kae?” A re ho lona: “Ke rata ho tseba e le ka 'nete, ngoan'eso, hore na u mor'a mang, le hore na lebitso la hao u mang.” 12La fetola, la re: “Ke 'na Asariase, mor'a Ananiase e moholo, e mong oa ba heno.”
13Tobite a re ho lona: “Ke u amohela ka liatla tse peli: khotso, ngoan'eso. Se nkuke hampe, ngoan'eso, ha ke ne ke batla ho tseba 'nete malebana le mohlobo oa heno. Ke fumana hore u motho oa heso, oa lesika le letle 'me le hlomphehang. Ke tseba bo-Ananiase le Nathane, bara ba babeli ba Semeliase e moholo. Ba ne ba ee ba ee le 'na Jerusalema ho khumamela Molimo: ba ne ba sa tlole melao. Bana beno ke batho ba lokileng, u tsoa mothapong o motle. Ke u amohela ka khotso.”
14A tsoela pele, a re: “Ke tla u fa drakema ka letsatsi, ke be ke lefelle ka mokhoa o tšoanang tseo uena le mor'a ka le li hlokang. 15Felehetsa mor'a ka, ke tla u ekeletsa holim'a moputso oa hao.” 16Lengeloi la mo araba, la re: “Ke tla mo felehetsa. Se tšabe; re tla tsamaea hantle ho ea le ho khutla, tsela ena ha e na kotsi.” Tobite a re ho lona: “Mahlohonolo a ke a le aparele, ngoan'eso.” Eaba o retelehela ho mora oa hae, o re: “Ngoan'a ka, lokisa tsohle tsa tsela, u ntan'o itsamaela le ngoan'eno. E se eka Molimo ea maholimong a ka le sireletsa ha le le koana, a be a le khutlisetse ho 'na mona le ntse le phela hantle. Lengeloi la hae le ke le le felehetse 'me le le sireletse, ngoan'a ka.”
Hoba Tobiase a ake 'm'ae le ntat'ae, a tsoa, a kena tseleng. Tobite a re: “Tsela-tšoeu!” 17'M'a Tobiase a lla 'me a re ho Tobite: “Ho ea ka'ng hore u rome ngoan'a ka? Na hase eena lere leo re ikokotlelang ka lona, ea salang le rona lapeng ka mehla? 18Ke ka baka la'ng ha ho shejoa chelete hakalo? Na e ka bapisoa le bophelo ba moshanyana? 19Boemo ba bophelo boo Molimo a re fileng bona bo ne bo lekane.” 20Tobite a mo araba, a re: “Lahla khopolo tsena. Ngoan'a rona o tla tsamaea hantle ho ea le ho khutla. Mohla a khutlelang ho uena, u tla 'mona a nts'a iphelela hantle. 21Lahla khopolo tsena, se tšohe letho, ngoan'eso. Lengeloi le letle le tla mo felehetsa. Leeto la hae le tla ba letle, 'me o tla khutla a nts'a iphelela hantle.” Eaba 'm'a Tobiase o khaotsa ho lla.
