Eksodusi 29

₁“Naku lofanele ukwente nawunikela bo-Aroni nemadvodzana akhe kulenkonzo yekuba baphristi: Ubotsatsa inkunzana, netihhanca letimbili letingenasiyela. ₂Sebentisa sinkhwa lesite imbiliso, nemipotongwane lete imbiliso lahlanganiswe nemafutsa, kanye nemacebelengwane lagcotjiswe ngemafutsa; konkhe loko kwentiwe ngemphuphu yakolo lecolisakele. ₃Konkhe loko ukufake esitjeni ukunikele kimi kanye nalenkunzana naletihhanca letimbili.

₄“Uboletsa bo-Aroni kanye nemadvodzana akhe bete ekungeneni kwelithende lekuhlangana, bese ubageza ngemanti. ₅Ubobe sewembatsisa Aroni ngaletembatfo takhe tebuphristi: ingubo lete imikhono, nesidziya, nemjiva longetulu kwesidziya, nesembatfo sesifuba kanye nelibhande. ₆Ubomfaka lomshuculo wenhloko, ucoboshele kuwo loluphawu lwebungcwele lolungungcwengcwe lobhalwe kutsi: ‘Kwehlukaniselwe Nkulunkulu’. ₇Ubotsatsa lamafutsa emgcobo, uwatsele enhloko yakhe, umgcobe ngawo.

₈“Ubobe sewuletsa emadvodzana akhe, uwagcokise letingubo letingenamkhono, ₉uwabophe ngemabhande etinkhalweni tawo, uwafake nemishuculo etinhloko. Utamgcoba kanjalo-ke Aroni kanye nemadvodzana akhe. Bona netitukulwane tabo bayawuba baphristi bami phakadze naphakadze.

₁₀“Ubobe sewuletsa lenkunzana embikwalelithende lekuhlangana, Aroni nemadvodzana akhe bayawube sebabeka tandla tabo etikwenhloko yayo. ₁₁Lenkunzana uboyihlabela embikwaSimakadze, ekungeneni kwelithende lekuhlangana. ₁₂Ubotsatsa litsantana lalengati ngemuno ulibhoce etimphondvweni telilati; lengati lesele uyitsele esisekelweni selilati. ₁₃Emvakwaloko tsatsa onkhe lamanoni lembese kwangekhatsi, nemanoni lambonye sibindzi, nemanoni lembese tinso totimbili kanye nato, bese ukushisela etikwelilati. ₁₄Kodvwa inyama yalenkunzana, nesikhumba sayo, nemswane wayo ukushisele ngephandle kwenkambu, ngobe kungumnikelo wesono.

₁₅“Tsatsa lesinye setihhanca, bo-Aroni nemadvodzana akhe babeke tandla tabo etikwalenhloko yaso. ₁₆Sihlabe, utsatse ingati yaso uyifafate ndzawo tonkhe kutungeleta lilati. ₁₇Usisike ngekusihlahlela sibe ticucu; ugeze kwangekhatsi kwaso kanye nemilente yaso, ukubeke ndzawonye neticucu, nenhloko yaso. ₁₈Sonkhe lesihhanca usishisele etikwelilati sibe ngumnikelo wekushiswa kuSimakadze. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze.

₁₉“Ubotsatsa lesinye setihhanca, bo-Aroni nemadvodzana akhe babeke tandla tabo etikwenhloko yaso. ₂₀Sihlabe, utsatse litsantana lengati yaso ubhoce lihwandza lendlebe ya-Aroni yangesekudla, uphindze ubhoce emahwandza etindlebe tangesekudla temadvodzana a-Aroni, uphindze ubhoce netitfupha tangesekudla, uphindze ubhoce naboqukulu bangesekudla, lengati letawusala uboyifafata ndzawo tonkhe kutungeleta lilati. ₂₁Ubotsatsa lengati leselatini kanye nemafutsa emgcobo ufafate bo-Aroni nemadvodzana akhe kanye netingubo tabo; ngaloko bo-Aroni nemadvodzana akhe batawube sebanikelwe kimi kanye netingubo tabo.

₂₂“Kulesihhanca ubosika konkhe lokungemanoni: umsila, nemanoni lasetibilinini, nemanoni lambonye sibindzi, nemanoni lambonye tinso totimbili kanye nato letinso, nemlente wangesekudla; ngobe lesihhanca semgcobo. ₂₃Kulesitja lesinetinkhwa letite imbiliso letisembikwaSimakadze, ubotsatsa sinkhwa sibe sinye, nempotongwane munye wesinkhwa lesinemafutsa, nelicebelengwane libe linye. ₂₄Konkhe lokudla kwetfule etandleni ta-Aroni nasetandleni temadvodzana akhe, bakujikitisele kimi njengemnikelo lojikitiselwe kuSimakadze. ₂₅Ubobe sewuyakutsatsa kubo ukushisele etikwemnikelo wekushiswa loselatini. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze.

₂₆“Ubotsatsa umganga walesihhanca sekugcotjwa kwa-Aroni uwujikitisele kuSimakadze; kube ngumnikelo wekujikitiswa. Lomganga-ke usabelo sakho.

₂₇“Kufanele ungehlukanisele umganga lonikelwe ngekujikitiswa, nemlente lonikelwe ngekujikitiswa; yebo, wona lowo mganga nemlente lonikelwe ngekujikitiswa ngesikhatsi kugcotjwa bo-Aroni kanye nemadvodzana akhe. ₂₈Loko kutawuhlala kusabelo sa-Aroni nemadvodzana akhe ngesimiso saphakadze kuma-Israyeli. Njalo nje nakwentiwa umnikelo wekuthula, umganga nemlente kuyawuba kwebaphristi. Leso-ke sipho sebantfu labasinika mine, Simakadze.

₂₉“Tembatfo ta-Aroni letingcwele tiyawuba temadvodzana akhe, nasafile; ayawutembatsa nasagcotjiwe. ₃₀Indvodzana ya-Aroni leyawumlandzela itsatse inkonzo yebuphristi iyawutembatsa emalanga lasikhombisa, nayita kutewukhonta endzaweni lengcwele lesethendeni lekuhlangana.

₃₁“Ubotsatsa lenyama yesihhanca semgcobo wa-Aroni nemadvodzana akhe uyiphekele endzaweni lengcwele. ₃₂Bo-Aroni nemadvodzana akhe baboyidla kanye nesinkhwa lesisesitjeni, ekungeneni kwelithende lekuhlangana. ₃₃Loko bekukwemsimeto wenhlawulo nabagcotjwa, banikelwa, kubodliwa ngibo bodvwana; longesiye umphristi angakudli, ngobe kungcwele. ₃₄Nakwenteka lenyama yemgcobo, nome sinkhwa kusala kuze kube ngakusasa ekuseni, ubobe sewukushisa ngemlilo loku lokulibhadlela. Akukafaneli kudliwe, ngobe kungcwele.

₃₅“Lemisimeto yemgcobo uboyenta ku-Aroni nakumadvodzana akhe njengobe ngikuyalile, iyawutsatsa emalanga lasikhombisa. ₃₆Onkhe emalanga ubonikela ngenkunzi ibe ngumnikelo wetono, khona titawutsetselelwa; ngekwenta njalo utawuhlambulula lilati, uligcobe ngemafutsa ulingcwelise bese uyalinikela. ₃₇Loku ubokwenta onkhe lamalanga lasikhombisa. Lelilati litawuba ngcwele ngalokuphelele; lowo nome loko lokulitsintsako kutawulinyatwa ngemandla ebungcwele balo.”

₃₈“Naku-ke lotawunikela ngako elatini njalo ngemalanga onkhe: Uyawunikela emazinyane etimvu lamabili lanemnyaka munye budzala. ₃₉Lizinyane lelinye utabolinikela ekuseni, lelinye ulinikele entsambama nakushona lilanga. ₄₀Lelizinyane lelitabonikelwa ekuseni libohambisana nemphuphu yakolo locolisakele leyikhilogremu yinye, lebhicwe nelitha yinye yemafutsa emncumo. Utsele ilitha yinye yeliwayini ibe ngumnikelo wesinatfo. ₄₁Niyawunikela leli lelinye lizinyane entsambana kanye nalowo mnikelo walokutinhlavu nemnikelo wawo wesinatfo njengasekuseni. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze.

₄₂“Kuyawuhlala kungumnikelo wekushiswa titukulwane ngetitukulwane, wentiwe ekungeneni kwelithende lekuhlangana embikwaSimakadze; kulapho ngitabohlangana khona nebantfu bami, ngikhulume kuwe. ₄₃Ngitabohlangana lapho nema-Israyeli; lendzawo bese ingcweliswa yinkhatimulo yami.

₄₄“Lelithende lekuhlangana nelilati ngitawukungcwelisa; bo-Aroni nemadvodzana akhe ngitabehlukanisela inkonzo yekuba baphristi. ₄₅Ngitawuhlala emkhatsini wema-Israyeli, ngibe nguNkulunkulu wabo. ₄₆Bayawukwati kutsi nginguSimakadze longuNkulunkulu wabo, lowabakhipha eveni laseGibhithe, ngentela kuhlala emkhatsini wabo. NginguSimakadze longuNkulunkulu wabo.”