Eksodusi 30

₁“Ubenta lilati ngemgamba, libe lekushisela imphepho. ₂Kufanele libe nemihlubulo lelinganako: libe ngemasentimitha langaba ngema-45 imihlubulo, nemasentimitha langaba ngema-90 kuphakama. Timphondvo temakona alo omane kufanele tibe yintfo yinye nalo. ₃Kufanele uyembese ngegolide lecengekile yomine imihlubulo, ngetulu nangaphansi kanye netimphondvo talo; ulephetse ngegolide ndzawo tonkhe. ₄Yenta emajiva egolide ekuletfwala abe mabili, uwashayele ngaphansi kwemphetfo emihlubulweni ngala nangale, lapho nitawufaka khona timboko tekuletfwala. ₅Letimboko ubotenta ngemgamba, utembese ngegolide. ₆Lelilati ubolibeka embikwendvwangu levimbele libhokisi lesivumelwane lelinesihlalo semusa etikwalo, lapho ngitabohlangana nawe khona.

₇“Aroni utaboshisa imphepho lenuka kamnandzi, njalo nje ekuseni nakalungisa letibane. ₈Aroni kufanele aphindze akwente loko njalo nje embikwaSimakadze entsambana, nakakhanyisa tibane; lomnikelo wemphepho uyakwentiwa kuSimakadze njalo nje titukulwane ngetitukulwane. ₉Ungacali unikele etikwalo ngemphepho lengemukeleki, nome umnikelo wekushiswa nome umnikelo walokutinhlavu, ungacali utsele umnikelo weliwayini etikwalo. ₁₀Kanye ngemnyaka Aroni abenta inkonzo yekubuyisana kuSimakadze, ayentele etimphondvweni totine telilati; leyo nkonzo yekuhlawulela tono ngemnikelo wengati, iyakwentiwa njalo nje kanye ngemnyaka. Loko niyawukwenta titukulwane ngetitukulwane. Lelilati kufanele libe ngcwele lehlukaniselwe mine, Simakadze.”

₁₁Simakadze wakhuluma kuMosi, watsi: ₁₂“Nawenta lubalo lwema-Israyeli, ngulowo nalowo kufanele akhiphe inhlawulo yemphilo yakhe ngesikhatsi ubabala, khona angetikwehlelwa sishayo, nasangene elubalweni. ₁₃Ngulowo nalowo muntfu lowewelela kulabo lesebabaliwe kufanele akhiphe imali lekalwe nalejutjwe ngalokusemtsetfweni, lowo mnikelo awukhiphe kimi. ₁₄Wonkhe longenile kulolubalo losukela eminyakeni lengema-20 budzala kuye etulu kufanele awukhiphe lomnikelo waSimakadze. ₁₅Lonjingile akufanele akhokhiswe ngetulu, nalophuyile akukafaneli akhokhiswe ngaphansi kwalemali, lekuyinhlawulo yetimphilo tenu kuSimakadze. ₁₆Lemali leyinhlawulo uboyibutsa kuma-Israyeli, uyisebentise ekuchubeni nasekusekeleni inkonzo yelithende lekuhlangana. Lemali ngeyekuhlenga timphilo tabo, khona mine, Simakadze, ngitabokhumbula kuphephisa sive saka-Israyeli.”

₁₇Simakadze wakhuluma kuMosi, watsi: ₁₈“Yenta umgezelo welitfusi, kanye netibunu tawo letilitfusi, ube wekugezela. Ubowubeka emkhatsini welithende lekuhlangana nelilati, utsele emanti kuwo. ₁₉Aroni nemadvodzana akhe kufanele bageze kuwo tandla netinyawo tabo. ₂₀Ngaphambi kwekuba bangene ethendeni lekuhlangana nome nabasondzela elatini kutewufeza inkonzo yabo yekushisa umnikelo ngemlilo kuSimakadze, kufanele bageze kulamanti. Nabangakagezi batakufa. ₂₁Kufanele bageze tandla tabo netinyawo tabo, khona bangetikufa. Lona ngumyalo nemtsetfo labatawugcina bona netitukulwane tabo kuze kube phakadze naphakadze.”

₂₂Simakadze wakhuluma kuMosi, watsi: ₂₃“Tsatsa tinongo leticolisakele, emakhilogremu langaba sitfupha emure lemanti, nemakhilogremu langaba matsatfu esinamoni lenuka kamnandzi, nemakhilogremu langaba matsatfu ekalamu, ₂₄nemakhilogremu langaba sitfupha ekhasiya; konkhe kukalwe ngesikalo lesisemtsetfweni. Ubengeta emalitha langaba mane emafutsa emncumo, ₂₅bese wakha ngato emafutsa langcwele emgcobo, lahlanganiswe aba ngemakha, uwente njengengcweti yalomsebenti. ₂₆Ubowasebentisa ekugcobiseni ngawo lelithende lekuhlangana, nelibhokisi lesivumelwane, ₂₇nelitafula, netimphahla letihambisana nalelitafula, nelutsi lwetibane, netimphahla letihambisana nalolutsi lwetibane, nelilati lekushisa imphepho, ₂₈nelilati lekushisa iminikelo, netimphahla letihambisana nalelilati, nemgezelo kanye nesibunu sawo. ₂₉Tonkhe letimphahla ubotinikela, khona titewuba ngcwele ngalokuphelele; loko lokutitsintsako kutawulinyatwa bungcwele bato. ₃₀Ubogcoba bo-Aroni nemadvodzana akhe babe ngcwele, khona batewungikhonta njengebaphristi bami. ₃₁Ubokhuluma kuma-Israyeli utsi: ‘Lamafutsa ami langcwele emgcobo niyakuwasebentisa kuto tonkhe titukulwane tenu. ₃₂Akukafaneli atselwe emitimbeni yebantfu nje, futsi kufanele ningawakhi lamanye ngaletilinganiso talawa; angcwele, futsi nibowatsatsa ngekutsi vele angcwele. ₃₃Nangabe kungaba khona lowakha lafana nawo nome awasebentise kulomunye longesiye umphristi, uyawuncunywa esiveni sakubo.’ ”

₃₄Simakadze wakhuluma kuMosi atsi: “Tsatsa sikalo lesilinganako kuto tonkhe letinongo letimnandzi: sitakathi, ne-onkha, negalibhanume, nemakha lacengekile. ₃₅Tihlanganise ndzawonye njengengcweti yalomsebenti, utente tibe yimphepho yemakha lanongwe ngeluswayi, khona itawuba ngulehlantekile nalengcwele. ₃₆Lenye yayo uboyisila icolisakale, bese uyifaka ethendeni lekuhlangana uyifafate embikwelibhokisi lesivumelwane, lapho ngihlangana khona nawe. Lemphepho uboyiphatsa uyente ibe ngcwele. ₃₇Ningacali nente imphepho ngayo lendlela nangaletilinganiso; kini itawuba ngcwele, inikelwe kuSimakadze. ₃₈Lowo lowenta emakha lafanana nawo uyawuncunywa esiveni sakubo.”