Jobe 10

₁“Seyiyangicansula yona lemphilo yami.

Ngako-ke ngitawusola ngenkhululeko,

ngikhulume ngiphumisele

bumunyu bemphefumulo wami.

₂Ngitawutsi kuNkulunkulu:

Ungangilahli, kodvwa ngitjele

kutsi cala lini longibeka lona.

₃Kuyakujabulisa yini wena lokungicindzetela,

nekwedzelela umsebenti wetandla takho,

ulibale kumamatsekiswa ngemacebo lentiwa ngulababi?

₄Kantsi wena ubuka ngemehlo enyama yini?

Kantsi nawe ubuka njengobe

kubona umuntfu wemhlaba yini?

₅Emalanga akho anjengewemuntfu wemhlaba yini?

Yona leminyaka yakho injengeyemuntfu wemhlaba yini,

₆kutsi ungalibala kutakululana nemaphutsa ami nje,

nekutfungatsana netono tami?

₇Nawe wati kahle nje kutsi anginacala,

nekutsi kute nalongahle angisindzise esandleni sakho.

₈“Tandla takho tangeluka, tangibumba.

Senguwe njalo lotangibhubhisa futsi?

₉Khumbula kutsi nguwe lowangibumba njengelibumba,

senguwe njalo lotangibuyisela elutfulini futsi?

₁₀Akusiwe yini lowangitfulula njengelubisi,

wangiphehla njengelibhotela?

₁₁Akusiwe yini lowangembatsisa ngesikhumba nangetinyama,

wangeluka ndzawonye ngematsambo nangemisipha?

₁₂Wanginika kuphila, wangentela umusa,

nangekungilondvolota kwakho welusa umoya wami.

₁₃“Kodvwa loku wakufihla enhlitiyweni yakho,

futsi ngiyati kutsi loku kwakusenhlitiyweni yakho kutsi:

₁₄Kube ngake ngona, ngabe wawungibukile,

futsi bewungeke ungiyekele ungangijezisi.

₁₅Nako kimi nangabe ngingulomubi!

Nome ngabe anginacala,

bengingeke ngiyetfwale inhloko yami,

ngobe ngigcwele emahloni,

kuhlupheka kwami kuyangicwilisa.

₁₆Nangitsi ngiphakamisa inhloko yami,

wena ungihoshobela ungifunise kwelibhubesi,

uphindze futsi ungihluphe ngetigemegeme

temandla akho lesabekako.

₁₇Uyabandzisa bofakazi labemelana nami,

wandzise nentfukutselo yakho kimi,

utfumele emabutfo ngemabutfo lemelana nami.

₁₈“Wawungikhiphelani kwasesiswini?

Kube ngamane ngafa ngisengakabonwa nangulinye liso.

₁₉Kube ngafane ngangete ngaba khona,

nome ngavele ngayiswa emadlizeni.

₂₀Lamalanga ami lambalwa asengakapheli yini?

Ase umane ungishiye ngedvwa,

kumbe ngingamane sengitfole litfutjana lekujabula,

₂₁ngisengakayi eveni lengingasoze ngabuya kulo,

lekulive lelusizi nelebumnyama lobuphatsekako,

₂₂yebo, live lebumnyama lobukhulukati,

live lelitfunti lelikhulu nenhlakanhlaka,

lapho kukhanya kwakhona kufanana nebumnyama.”