Jobe 9

₂“Empeleni ngiyati kutsi loku kuliciniso.

Kodvwa umuntfu loludzaka lolubolako

angaba ngulolungile kanjani embikwaNkulunkulu?

₃Umuntfu nome abengafisa kuphindzilitana naye,

abengeke akhone kuphendvula ngisho munye

emibutweni yakhe leyinkhulungwane.

₄Kuhlakanipha kwaNkulunkulu kujulile,

emandla akhe abanti kakhulu.

Ngubani nje lowake wacinisa inhloko kuye,

wachubeka waphumelela angulote sici?

₅Ugudlukisa tintsaba nato tingakwati loko,

atigubuncelise ngentfukutselo yakhe.

₆Unyikanyisa umhlaba netisekelo tawo,

tinsika tawo tichachatele.

₇Ukhuluma nelilanga kutsi lingakhanyi,

lingete laphuma,

usibekela kukhanya kwetinkhanyeti.

₈Yena yedvwa wendlala emazulu,

anyatsele emagagasi elwandle.

₉Nguye uMdali weliBhele, neweMtsentse,

neweSilimela,

newetinkhanyeti taseningizimu.

₁₀Wenta tigemegeme letingaphenyeki,

netimangaliso letingeke setibalwe ngumuntfu.

₁₁Nome endlula ngakimi, ngingeke ngimbone,

nakendlula ngendlela yami, ngingeke ngimuve.

₁₂Nakukhona lamhlwitsako,

ngubani longaba nemandla ekummisa?

Ngubani kona longambuta atsi: ‘Wentani?’

₁₃Nkulunkulu akajiki angatfukutsela,

ngisho nemabutfo akaRahabi

akhotsama etinyaweni takhe.

₁₄“Mine-ke ngingaphindzilitana kanjani nalonjalo?

Ngingawatfolaphi wona emavi ekuncakulisana naye?

₁₅Nome bengingaba msulwa kangaka,

bengiyawubate imphendvulo kuye.

Lebengingakwenta nje bengingamane ngitincengele kuye,

ngilale tibutsa kuMehluleli wami,

ngicele umusa wakhe.

₁₆Ngisho nome bengingambita avume ete,

angiboni kutsi abengangilalela.

₁₇Abenganginyatsela ngesangcotfo,

andzise emanceba ami ngaphandle kwesizatfu.

₁₈Abengeke angivumele

ngiphindze ngitfole umphefumulo wami,

kodvwa abeyawungifumbela ngekudzabuka nje.

₁₉Nangabe kukhulunywa ngetemandla, unemandla!

Nangabe kukhulunywa ngetekulunga,

ngubani longahle abhejelane naye?

₂₀Ngisho nome bengimsulwa,

umlomo wami bewungangilahla.

Nome ngabe bengingenakusoleka,

bewutakutsi nginelicala.

₂₁“Ngisho naloku ngimsulwa nje, ngingenasici,

anginandzaba nalomtimba wami.

Kwamine ngiyayeya imphilo yami.

₂₂Mine sekuyangifananela nje,

ngiko nje ngitsi:

‘Ubhubhisa labalungile nalababi.’

₂₃Nangabe inhlupheko

iletsa kufa ngekushesha,

uyabahleka labamsulwa, nabaphelelwa litsemba.

₂₄Live naliniketelwe etandleni tebantfu lababi,

emehlo ebehluleli balo uyawaphumphutsekisa.

Nakungesiye, ngubani-ke?

₂₅“Emalanga ami agijima ashiye inyosi,

andiza abaleke

angasakuboni nakancane nje lokujabulisako.

₂₆Endlula ngelihubo njengemikhumbi

yetitfombo tephaphira,

nanjengelusweti lusukela kudla kwalo lokuphansi

luphatima njengembane.

₂₇Kube ngitsi:

‘Ngitawukhohlwa ngalokukhonona kwami,

ngitawujika nasebusweni ngimandzatele,’

₂₈nanyalo ngisatfutfumela

ngako konkhe lokuhlupheka kwami,

ngobe ngiyati kutsi Nkulunkulu ngeke

asho kutsi ngimsulwa embikwakhe.

₂₉Njengobe vele sengitfolakele nginelicala-ke,

ngisahluphekelani, ngihluphekele lite?

₃₀Ngisho nome bengingatigeza ngensipho,

netandla tami ngitigeze ngasota wekugeza,

₃₁Nkulunkulu abetangifaka emgodzini weludzaka lwekungcola,

kuze ngisho netimphahla tami tingenyanye.

₃₂“Nkulunkulu akasiye umuntfu njengami

kutsi bengingaze ngiphendvulane naye,

nekutsi bengingabukana naye

buso nebuso enkhundleni.

₃₃Kube mane bekungaba nemlamuli emkhatsini wetfu,

kube abengabeka sandla sakhe etikwetfu sobabili,

₃₄umuntfu labengesusa umzaca waNkulunkulu kimi,

kuze kwesabisa kwakhe kungabe kusangetfusa.

₃₅Nami-ke bengingakhuluma ngingasamesabi,

kodvwa njengobe kunjena nje kimi, ngingeke.”